Éxodo 36
36
1“Aitaque incanteari Besalel jeri Aholiab aisati maaroni iotacaaqueri Tasorentsi, irovetsicantayetearori cameetsa paitapeerica coachari irantaveeyetanteari Irinanteariqui Tasorentsi.”
Yamajeitaque ishanincapee maaroni timimoyetiriri
2Ari icajemaqueri Moiseshi Besalel jeri Aholiab aisati maaroni iotacaaqueri Tasorentsi vetsicayeteroneri paitapeerica, coashitasanotachari iramitacojeiteri. 3Ari yaajeitaquero ipaqueriri Moiseshi maaroni yamayetaqueri ishanincapee, irintantearori irantero coasanotachari irantaveeyetanteari Irinanteariqui Tasorentsi.
Icantani ishanincapee yamapinijeiti maaroni quitaiteripeequi ipashijeitacariri Tasorentsi. 4-5Yora vetsicajeitirori yoipacanaquero yantaveere, ijatashitaqueri Moiseshi icantapaaqueri: “Shequiapaaque oni, yamapinijeitaqueri ashanincapee moncarataca ontsocanteari icantaqueri Tasorentsi.”
6Ari icantacantajiro Moiseshi eiro yamajeitantajatsi aisati. Irosati te iramajeitajeji ishanincapee. 7Tempa shequiapaaque oni ovetsicanteari, ari ontimaarantapaaque.
Yovetsicantacarori ovancoteari Irinanteari Tasorentsi
(Éxo. 26.1-37)
8Yora iotasanoyetatsiri ari yovetsicashitaquero Irinanteari Tasorentsi. Yovetsicaque 10 ompashicanaqueari quiricachari lino, quitioncamaonirori, quisaamaonirori, quitioncamaori isataacotantacariri apite ishiacantiri inampire Tasorentsi. 9Aparopeeni imoncarayetaquero ocarayetaque 12 metro otsantsataque ari nianqui. Iro 2 metro oquimotsarancataque aisati oquempeyetaca maaroni. 10Ora caratatsiri 5 ompashicanaqueari yoaviyetaquero pashinipee aisati iquempetaquero pashini caratatsiri 5. 11Impoiji iyempitatantayetacaro quitioncatsanirori ocaramaotapaaque intacari. Aisati ocaramaotapaaque pashini. 12Ora intacari iyempitayetaquero ocarataque 50 aisati iquempetaquero otsipa aparopeeni ontsitacavacanteari. 13Aisati yovetsicaque 50 oro tapoitachari, iraacotantayetearori otsipa tocoyapee, ompashicantanaqueari maaroni Irinanteari.
14Yora Besalel itijacotaque aisati ivitipee chiivo ocarataque 11 iroicoterori jenioquiji. 15Aparopeeni imoncarayetaquero ocarayetaque 13 metro otsantsataque ari nianqui. Iro 2 metro oquimotsarancataque aisati oquempeyetaca maaroni. 16Ora caratatsiri 5 itsipataayetaquero yorimpitaquero, iro otsipa caratatsiri 6 inashitacaacaro yorimpitaquero. 17Impoiji yovetsicaque 50 iyempitayetaquerori ocaramaotapaaque intacari, aisati 50 iyempitayetaquerori ocaramaotapaaque otsipa. 18Aisati yovetsicaque 50 bronce tapoitachari iraacotantayetearori otsipa tocoyapee ompashicantanaqueari maaroni Pancotsi.
19Aisati yovetsicaque imeshinapee ovisha, yajacantayetacaro quitioncajari. Impoiji yovetsicaque jentameshinatatsiri meshinantsipee, iroyeri iroicoterori jenoqui. 20Aisati yovetsicaque taaverapee inchato acacia itampaticayetaquero cameetsa. 21Aparopeeni imoncarayetaquero 4 metro otsantsayetaque ari nianqui, iro 65 centímetro oquimotaroquitaque. 22Aisati iquichatencayetaquero apite ontsitacavacantayeteari aisati iquempetaquero maaroni. 23-24Ocarataque 20 taaverapee iroyeri acaqueroca quirincaniri. Aisati yoayetaquenero 40 plata yovetsicaqueri oatiantanaqueari ishaaviji. Aparopeeni taavera otimayetaque apitepee ishaaviji oatiantanaqueari. 25-26Aisati acaqueroca catonconiri yovetsicaque 20 taaverapee jero 40 plata oatiantayetanaqueari. Aisati otimayetaque apitepee ishaaviji oatiantanaqueari aparopeeni taavera. 27-28Aisati acaqueroca pashini iqueapiniti catsirincaiteri yovetsicaque 6 taaverapee. Impoiji yovetsicaji apite iroyeri osorinaquiqui. 29Ora taaverapee ontsipatavacaayetaquea ishaaviji aisati jenoqui intsipataacotantaquearo tapoitachari. Aisati iquempetaquero apitetatsiri iroyeri osorinaquiqui. 30Ari ocarataque 8 taaverapee jero plata oatiantayetanaqueari ocarataque 16. Aparopeequi taavera otimayetaque ishaaviji apite oatiantayetanaqueari. 31-32Aisati yovetsicaque inchato acacia antancotashiyeteari taaverapee ocarataque 5 ashi acaqueroca aisati 5 ashi araquerora impoiji 5 ashi iqueapiniti catsirincaiteri. 33Ora antancotashiteari onquenanaquero nianqui taaveraqui, irosati acaqueroca otsipa. 34Impoiji yovichaacotaquero oro taaverapeequi. Irisati iyempitayetaquerori iroiminqueantearori atancotashiropee yovichaacotaqueri.
35Aisati yovetsicaque oticaashiro quitioncamaonirori, quisaamaonirori, quitioncamaori jero lino tijacotachari. Yovetsicacotaqueri ishiacantaqueri apite inampire Tasorentsi. 36Impoiji yoayetaque 4 tapoitachari oro intsatantayetearori oticaashiro, aisati 4 otincamipee inchato acacia yapinaicantacaro oro, aisati 4 plata oatiantayetanaqueari.
37Aisati yovetsicaque inqueantapinitearori Pancotsiqui oticaashiro: quitioncamaonirori, quisaamaonirori, quitioncamaori lino quiricatsatachari yoameetsayetaquero. 38Aisati yovetsicaque 5 otincamipee yapinaicantacaro oro, iro 5 bronce oatiantayetanaqueari. Jero tapoitachari ontsatsatantayetanaqueari oticaashiropee.
Currently Selected:
Éxodo 36: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
