Éxodo 33
33
Icantajiri Tasorentsi Moiseshi: “Povaajeitanajea”
1Ari icantajiri Tasorentsi Moiseshi:
—Pijatajequeti meeca paajeitanajeri pishanincapee pomishitoajeitajiri Egiptoqui. Pijatacaajeiteri anta quipatsiqui ora nocantasanotaqueriri Abrahamani, Isaacani jeri Jacoboni. Irotaque nompajeiteriri pishanincajeitajeari. 2Nontianquempiri nonampire iriotaque jivatanaquempine. Irimatacaasanojeitantempiri pojocajeiteri cananeopee, amorreopee, hititapee, ferezeopee, heveopee jeri jebuseopee. 3Pijajeite anta oshiocasanoyetapai maaroni panquiveerentsiyetatsiri, eiro ocoiteimojeitapaajimpitsi paitapeerica. Iro cantaincha eiro nocarajeitanajimpitsi, notsoncajeitimpicari; tempa avirojei piatsari, oshequi catsini piquisoshirejeiti.
4-5Ari icamantapaajiri Moiseshi ishanincapee icantajeitiriri Tasorentsi:
—Avirojei piatsari, oshequi catsini piquisoshirejeiti. Ariorica quiso noajeitanajempi, aitaque nontsoncajeitaquempi. Meeca pinenquereajeitajeri paitapeerica pinenqueyetari; naro ioterone jaoca noncantajeitempiri.
Iquemajeitantavacarori, oshequi yoashiretasanojeitanaca. 6Aitaque ocantari anta toncaariqui Horeb, yora ishanincapee Israel yojocajeitajiro inenquejeitarine oropee.
Pancotsi yapatotimentantariri Tasorentsi
7Ari yovacantajiro Moiseshi pancotsijaniqui nijanteaji. Ipajitaquero: Yapatotimentanteetariri Tasorentsi. Aitaque ijatapinitiri jaanicarica coatsiri iriote paita icoacairiri Tasorentsi. 8Ariorica ijatapiniti Moiseshi anta, yora ishanincapee icantani icatiapinijeita iqueantapinitaroriqui ivancopee, yamenacotapinijeitantariri irosati inqueantanaquea. 9Ariorica iqueapinitiro, irosati osaviincantapinita mencori ocatiatsantsaatapinita iqueantapinitaroriqui. Osamani onapiniti iquenquetsatacaapinitantariri Tasorentsi Moiseshi. 10Ariorica ineapinijeitiro iriori ishanincapee, irosati itiyeroapinijeitanta ipincatsapinijeitantariri Tasorentsi.
11Yora Tasorentsi icantani iquenquetsatacaapinitiri Moiseshi, iquempetacantaqueri irio ishanincasanori, itsipatapinitari icantani iquenquetsatacairi. Impoiji ipiapinita isavicajeitaquenta. Irintiquea Josué, itomini Nun, amitacotiriri, icantani isaviqui tsompoina Pancotsiqui yapatotimentantariri Tasorentsi.
Yonijaaqueri Tasorentsi Moiseshi Itasorenca
12Icantiri Moiseshi Tasorentsi:
—Notasorentsite, aviro coacaaquenari nojivajeiteri noshanincapee. Iro cantaincha te pincamantenaji jaanica nontsipateari, aisati picantaquena: ‘Noshinetaquempi pincaratena pantaveetena, aisati pineacameetsatana.’ 13Queariotasanotaquerica oca picantaquenari, nocoi piotacayenaro ora picoiri pantayeteri, noshiretasanotantanaquempiri, aisati niotanteari irosatirica pincanteani pincavintsayena. Tempa narojeitaque pishanincapee.
14Ari icantanaqueri iriori:
—Narotaque quiso oajeitanajempine nosavicacaajeitempi cameetsa.
15Icantanajiri iriori Moiseshi:
—Eirorica quiso poajeitanajanatsi, eirota pishinejeititanatsi nojajeite. 16Eirorica pitsipajeitanajanatsi. ¿Jaoca noncanteari niotantearori picavintsaajeitaquena? Ariorica paajeitanajena, irotaque iriojeitantearori maaroni itsipapee atiri pinashitacaajeitaquena, te nonquempejeiteari pashinipee atiri.
17Ari yacanajiri iriori Tasorentsi icantiri:
—Oca picantaqueri, aitaque nomataquempiro. Tempa niotaque pimoncaratero nocoacaaquempiri, irotaque noneacameetsatantaquempiri.
18Irosati icantasanotantanacari Moiseshi:
—Notasorentsite, meeca nocoasanotaque nonempi jaoca picantari pipincatsaritasanoti.
19Ari icantanajiri iriori Tasorentsi:
—Coajica anta toncaariqui, ariorica navisanaquempi, aitaque nonijayempirori jaoca nocanta nocavintsanti aisati noncamantempiro novajiro. Aitaque piotasanotenari. Noneshinoncateri jaanicarica nocoaqueri aisati noncavintsaajeiteri jaanicarica nonintiri. 20Iro cantaincha noncantasanotempi, eiro pimatirotsi pineavorotena. Tecatsi aparo atiri materone irineena; jaanicarica neaquenane, aitaque incamaque.
21Icantiri aisati:
—Ainiro aca imperita, aitaque pincatiapeeri. 22Ariorica navisanaquempi notasorencaqui irotaque noiminqueantanaquempiri omoroqui, nomanantanaquempiro naco irosati navisantanaquea. 23Impoiji nojocareavacotajea pineantavaquenari notapiiqui. Aintiquea novoroqui, eiro pineanatsi.
Currently Selected:
Éxodo 33: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
