Éxodo 18
18
Ipocashitantacariri Jetró Moiseshi
1Yora Jetró, antaveetiniriri Tasorentsi anta quipatsiqui Madián, iriconquiri Moiseshi, iquemacotaquero maaroni imatacaaqueriri Tasorentsi itineri aisati ishanincapee, yoimishitoajeitajiri Egiptoqui. 2-4Yora Moiseshi itianquitajaro ijina Séfora osaviquimotapaajiri iri jeri apitetatsiri itomi. Yora jivatatsiri itimi ipajitaqueri Guersón; tempa icanti: “Naro pashinisati atiri, caari nonampi oca quipatsi.” Irio itsipa ipajitaqueri Eliézer. Icanti aisati: “Yora Tasorentsi ipincatsatiri apa, iriotaque amitacotaquenari aisati oavisaacotaquenari iroacantantenameri pincatsari.”
5Yora Moiseshi isavicajeitantapaacari caaraiteriqui iquempejitapaacaro toncaari inashitacaari Tasorentsi. Irosati ijatashitantacari Jetró irineavajeri. Itsipatanajaro ijina Moiseshi jeri apiiteroqueti otomi. 6Icantapaaqueri:
—Naro piconquiri Jetró. Nopoqui noneavajempi. Namajimpiro pijina jeri aisati apiiteroqueti pitomi.
7Irosati isotoantanaca Moiseshi yovetsatavacari. Yoivotashitapaacari aisati inintavorotapaaqueri. Irosati iqueacantajeitanacari ivancojaniquiqui. 8Ari icamantayetavaqueri maaroni jaoca icantajeitaqueriri Tasorentsi pincatsarini aisati egiptosatipee yoashinoncaajeitantacariri, yamitacotantacariri ishanincapee Israel. Jero maaroni pomerentsitimoyevetacariri nianquipeequi avotsi aisati jaoca icantacari Tasorentsi yoavimanasaacojeitantacariri.
9Ari iquimoshireventasanotanaqueri Jetró Tasorentsi. Tempa icavintsaasanojeitaqueri ishanincapee Israel yoavisaacojeitantajariri, yoashinoncaasanojeivetacari egiptosatipee. 10Icantanaque:
—Icameetsatasanotiri Tasorentsi, iriotaque matacayetaquempirori poipacaacoventantajariri pishanincapee Egiptoqui, iperanajeitantavetacariniri pincatsari. 11Meecaquea niotasanotaquero, tecatsi catsini quempetearine Tasorentsi; yanaacoyetiri ijitasorentsitashiyevetari.
12Ari yaaque Jetró aparo virantsi, itaasanotaqueneri Tasorentsi ipincatsataqueri. Impoiji yaaque pashini yoaqueneriri. Impoiji yora Aarón jeri maaroni jivatacaajeitiriri ishanincapee, ijajeitaque iroajeitea, incarajeiteri iriconquiri Moiseshi, iroimojeitanteariri Tasorentsi.
Icoyeaque Moiseshi jivatacantayetatsineri
(Deut. 1.9-18)
13Ari pashiniqui quitaiteri isavica aisati maaroni manajeivetacharimanaque Moiseshi iroameetsajeitantajeneriri ishanincapee; yantaqueri paitapeerica pomerentsitimoyetiri aisati yantavacayetarica. Icatiacaajeitamanacari irosati ishaavijijatashiyetariri. 14Ineantacariri Jetró icatiacaajeitacari, irosati isampitantacari:
—Nioti, ¿paitaquea pantacaajeitiriri pishanincapee icatiajeitamanaca, meeca ishaavijiitacojeitaquempi? Avintiquea savicaintsi.
15Ari yacanaqueri:
—Te nontsataashiteaji nosavique. Tempa ipocashijeitana icamantayetanaro paitapeerica pomerentsitimotariri, noncantacoventanteariri Tasorentsiqui. 16Ariorica ompomerentsitimojeiteari iquisavacaajeita, ipocashijeitana. Nosampitanteariri: ‘¿Jaanica poneacantacarori?’ Impoijiquea niotacaasanojeiteri icantacantayetiri Tasorentsi.
17-18Irosati icantantacari iriconquiri:
—Te oncameetsateji oca pantaqueri, ario pimaotanaque aisati imaojeitanaque iriori pishanincapee. Eiro pamavetirotsi, aisati eiro pimatirotsi apaniro poameetsajeitero pomerentsiyetachari. 19Pinquemisantasanotero oca noncantempiri, Irio amitacotempine Tasorentsi. Aviro cantacoventerine Tasorentsiqui paitapeerica pomerentsitimoyetariri. 20Aviro poametasanoteri maaroni icantacantayetiri, irotaque piotacaasanojeitanteariri jaoca incanteari irisavicajeitanteari cameetsa aisati paitapeerica irantayeteri. 21Iro panteri meeca. Pincoyeajeite coasanotatsiri irijivatacante: pincatsatiriri Tasorentsi, neanatatsiri cameetsa, caari coasanotatsi impinayeeteri quimota. Pincoyeajeite jivatacaajeiterine apatotashiyetainchari pishanincapee carajeitatsiri 1,000 aisati pashinipee jivatacaajeiterineri apatotashiyetainchari carajeitatsiri 100 jeri pashinipee jivatacaajeiterineri apatotashiyetainchari carajeitatsiri 50, irio pashinipee jivatacaajeiterineri apatotashiyetainchari carajeitatsiri 10. 22Iriojeitaque oameetsajeitenerine paitapeerica pomerentsitimojeitariri. Irompa iroorica pomerentsitasanotachari, ocameetsati impocashijeitempi poameetsayetantajeanariri. Iroquea caari pomerentsitasanotacha iriojeitaque oameetsajeitajenerine iriotaque amitacojeitempineri, eiroquea opomerentsitimotasanotantajimpitsi. 23Ariorica pimataquero oca, aisati icoacaaquempirorica Tasorentsi, aitaque pamavetaquero. Aisati irineacameetsajeitanaquero pishanincapee inquimoshirejeitanaque; cameetsa irijajeitanaje ivancopeequi.
24-25Ari iquemisantaquero Moiseshi icantaqueriri iriconquiri, irosati icoyeantajeitaca jivatacaajeiterine ishanincapee apatotashijeitainchari carajeitatsiri aparopeeni 1,000, 100, 50 aisati 10. 26Ari imajeitaquero yovetsicayetiniri ishanincapee pomerentsitimoyetariri. Iroquea pomerentsitasanoyetachari, irio Moiseshi vetsicajeitiniriri irinti. Iroquea caari pomerentsitacha irotaque yovetsicajeitiri iriori. 27Avisanaque aparopee quitaiteri, irosati yovetsatanajari Jetró itineri, ipianajaro inampiqui.
Currently Selected:
Éxodo 18: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
