Éxodo 15

Ivampoyeane Moiseshi

1Irosati ipampoyeaventantanacari Moiseshi Tasorentsi, ipincatsatasanotanaqueri; icarajeitaqueri maaroni ishanincapee. Jero oca ivampoyeane:

“Nompampoyeaventeri Tasorentsi;

tempa iriotaque noneacameetsatiri.

Tempa imatasanojeitaquero caari aneapinijeiti,

yomitsitiacojeitaqueri quijacoyevetariri cavaayopee.

2Iriotaque nopampoyeacoventiri;

tempa irio mayetaquenari paitapeerica, yoavisaacojeitantajanari.

Iriotaque Notasorentsite, noncamantacoteri: Icameetsati;

aisati iriotaque Tasorentsi iquemisantajeitaqueri intacantajeitaquenaniri;

ocameetsati nompincatsajeiteri.

3Iriotaque Tasorentsi manatincari.

Irotaque ivajirosanori:

Tasorentsi Timitachaniri, Aneashitachari.

4Iriotaque Tasorentsi omitsitiajeitaquerori incajarequi ishiacomentopeeni

aisati manajeitacharini carajeivetariri pincatsarini.

Yora neaperoyevetachari amitacoyetiriniri

itsitiajeitanaque incajarequi Quitioncari,

5Itsitiasanojeitanaque saanajariqui,

iquempejeitanacaro mapi;

omitsitiasanojeitaqueri incajare; te inconijatajeji.

6Notasorentsite, ponijayetaqueri pishintsitasanoti,

pitsoncajeitantacariri quisajeivetaquempiniri.

7Oshequi Pitasorentsitasanotaque catsini,

pimatasanojeitantacariri coajeivetachari iranaacojeitempime.

Piquisasanotanaca, pitsoncajeitantacariri,

iquempejeitanacaro casaveshi itayeetiri.

8Tempa pitasoncaajataquero nija pitasorencaqui,

otencareajatantanacari.

Oticaajatanaca acaquerocapeequi,

oquisoiteantanacari nianqui quipatsi.

9Yora coajeivetachari iroajeitavajename icantavacaajeivetaca:

‘Aitaque aijanajeitanaqueri irosati areejeitantavajeari,

antsoncasanojeitavajerita avajeitavajeri.

Aapitsajeitavajerita paitapeerica yashiyetari,

impoiji ampaarantavacaajeitearo,

irosati anquimoshirejeitantanaquea.’

10Iro cantaincha pitasoncaajatajiro,

opiaajatantapaajari antearo omotoncane.

Iquempejeitanacaro plomo ariorica irojoqueetero saanajariqui.

11Notasorentsite,

¡tecatsi aparoni ijitasorentsiyeevetari quempetempine!

¡Tecatsi catsini quempetempine cameetsatatsine, pipincatsaritasanoti!

¡Aviro mayetirori paitapeerica covencayetatsiri

caari ineapinijeiti atiri!

Ocameetsati incantacoyeetempi: Picameetsati.

12¡Ponijaasanotaqueri pitasorenca,

ora quipatsi otsoncajeitaqueri

oquempeveta oniajeitaqueri!

13Oshequi pinintasanojeitaquena,

irotaque pijivajeitantaquenari.

Tempa narojeitaque pishanincapee,

irotaque poavisaacojeitantajanari.

Paajeitantanajenari pitasorencaqui

anta quipatsiqui pinashitacaacari Pinanteari.

14Ariorica inquemacojeitaquero savicayetatsiri nampitsipeequi oca pimayetaqueri,

intsaroajeitanaque catsini, impioncashijeitanaquea.

Irioquea filisteopee omapoqueri incatsinentashijeitanaquea.

15Yora jivatacaayetiriri anta quipatsiqui Edom

eiro ineaperotanajatsi.

Jeri iriori jivatacaayetiriri anta quipatsiqui Moab

intsaroasanojeitanaque catsini

savicayetatsiri anta quipatsiqui Canaán,

eiro ineaperotanajatsi.

16Notasorentsite, ¡aitaque oncanteari

intsaroacaasanotearo pitasorenca!

¡Eiro ishevajeitanajatsi, inquempejeitanaquearo mapi,

irosati yavisantajeitanaqueari pishanincapee yora pashijeitacari!

17Notasorentsite, paajeitanajena anta toncaariqui pinashitacaari,

ora picoyeaqueri pisavicanteari,

oncanteani ontime.

18¡Icantaitatiani Tasorentsi ipincatsaritasanoti!”

Ovampoyeane María

19Iquiacojeitantavetapaacari pincatsari ishiacomentopeequi aisati iyavaayotepeequi incajarequi, itasoncaajatajiro Tasorentsi opiaajatantapaajari aisati, irosati oimitsitiantajeitacari maaroni. Irintiquea ishanincajeitaniri Israel jajeitanaintsi pirijaitanaintsiri anta intatiqueronta. 20Ari otimi iritsiro Aarón, opajita María, itasoncaventaquero Tasorentsi ojivatacaaquero otsinaneroronte. Ari aaque pantereta opampoyeacaajeitaquero, cameetsa ovairatimentajeitaqueri Tasorentsi. 21Jero meeca ovampoyeane:

“Tsame ampampoyeaventajeiteri Tasorentsi;

tempa iriotaque nijaajeitaqueerori itasorenca caari aneapinijeiti.

Yomitsitiajeitantacariri incajarequi cavaayopee jeri quijacoyevetariri.”

Yoameetsajatajiro Tasorentsi nija quepishijatatsiniri

22Impoiji yovaacanajari Moiseshi ishanincapee, yojocanajiro incajare Quitioncari. Iquenajeitanaquero caaraiteriqui pajitachari Sur, ocarati mava quitaiteri yaniijeitanaque, tecatsi catsini irineimate nija. 23Irosati yareejeitantacaro nija quepishijatatsiri, te irimajeiteroji irirajeitero. Tempa quepishijataque oni, irosati ipajitantacaro irineanequi iriori Mará, icanteetiri Quepishijari.

24Yora atiripee intanacaro icantimataqueri Moiseshi, aisati isampitaqueri: “¡Jaocaquea meeca ayerori nija irajeiteri!” 25Iquemajeitantacariri Moiseshi, ari iquenquetsatacaaqueri Tasorentsi, irosati yonijantacari inchashimpojaniqui. Ari yoviincaquero, irosati ocameetsajatantanaja.

Aitaque anta ineantacariri Tasorentsi, aisati yoametaqueri intimantajeiteari cameetsa. 26Icantasanotiri: “Ariorica pinquemisantasanotaquena aisati pimajeitaquerorica maaroni nocoacaajeitaquempiri aisati pimoncarataquerorica nocantacantiri; irotaque pintimantajeiteari cameetsa, eiro notiancajeitimpirotsi oashinoncantsi quempetarori notiancaqueneriri egiptosati. Tempa narotaque Tasorentsisanori oavisaacotempine, tecatsitacaajeitimpiri caari pimantsiajeitanta.”

27Ari yovaajeitanaja irosati yareetantacaro Elim. Aitaque otimayetapairi amotoaajapee nija ocarati 12, aisati opatiquiayetapaa compiroshipee ocarati 70. Aitaque ivancotimojeitapaacarori.

Currently Selected:

Éxodo 15: cni

Highlight

Copy

Compare