Éxodo 14
14
Yoijajeivetacari egiptosati ishanincajeitaniri Israel iraajeitavajerime
1-2Ari iquemajiri Moiseshi Tasorentsi, icantajiri:
“Pincantajeri pishanincapee impiajeitanajeta anta Pi-hahirot, montetarori Migdol jero Baal-sefón ora incajarequiniri; aitaque pisaviquimojeitapeerori. 3Incantashitempata pincatsari: ‘Yora ishanincajeitaniri Israel timpinacajeitaque impeashijeiteani caaraiteriqui, te iriojeiteji jaocarica inquenajeitanajeri.’ 4Iro cantaincha naro cantacaashiretacayearine inquisoshiretantajeari iroijanajeitantavetavajempiri, irosati nonijaajeitanteari notasorenca. Impoijiquea iriojeitanaque egiptosati narotaque Tasorentsisanori.”
Ari iquemisantajeitaqueri ishanincapee Moiseshi, irosati ipiajeitantanaja. 5Ari ipocashitaqueri ishanincapee pincatsari, icantapaaqueri: “Jajeitaji ishanincajeitaniri Israel.” Irosati iquenqueshireacojeitantavetajari, icantavacaajeitanaca: “¡Paitaquea ashinejeitantajariri ijajeitaji! ¡Yojocajeitanajeero yantaveejeiteeni!”
6Irosati yapatojeitantanacari oshequi manajeitachari; ari icantiri: “¡Pishintsite, povetsiquenaro noshiacomento!” 7Irosati yovetsicantayetacaro ocarataque 600 shiacomentotsipee iroperori jero pashinipee timayetatsiri. Inteyetanaqueari aparopee jivatacairiri aisati manatachari caratiriri. 8Ari icantacaashireacaajari Tasorentsi pincatsari iquisoshiretantanajari yoijanajeitantavetajariri, ineavetavacari isoquijajeitantanajari yonijaaqueri Tasorentsi antearoite itasorenca.
9Irosati ijatacantajeitanacari maaroni manajeitachari itejeitanaca ishiacomentopeequi. Irio itsipapee iquijacojeitanacari cavaayopee yoijanajeivetanacari. Ineajeivetapaajari anta otsapijaqui incajare, montetarori Pi-hahirot jero Baal-sefón, ivancotimojeitapaacaro. 10Yamenantajeitanacari, ineajeitavaitiiri ipocajeitaque oshequi catsini egiptosati. Ari itsaroasanojeitanaque catsini ishanincapeeni Israel. Irosati yamenantanaca jenoqui, yaventajeitanacari Tasorentsi, icantajeitanaqueri: “¡Notasorentsite, poavisaacojeitena!” 11Irosati icantajeitantanacari iriori Moiseshi:
—¡Paita pamajeitantajanari aca nosavicajeivetaca Egiptoqui, poamaacantajeitantenari aca caaraiteriqui! Aitaque noncamajeitemeri anta Egiptoqui. 12Tempa aitaque nocantajeivetaquempi ‘Pishinejeitena nantaveejeitenerita egiptosati. Iro cameetsavetachari imperanajeitename, eiroquea nocamajeitantame aca caaraiteriqui.’
13Ari icantanaqueri iriori Moiseshi:
—Eiro pitsaroajeititsi, irointi pishintsishirejeitanaque, pinquenqueshirejeitanaqueri Tasorentsi, tempa iriotaque oavisaacojeiteeneri. Yonta egiptosati pineajeitaqueri, eiro catsini aneajeitajiritsi aisati. 14Eiro piquenqueshireacojeitatsi ancamajeite, irio Tasorentsi piacoventajeiteene.
Imonteajeitanacaro ishanincajeitaniri Israel incajare Quitioncari
15Ainiroquera icatiajeitaca, irosati icantantacari Tasorentsi Moiseshi:
—¡Paita icantashijeitantacari pishanincapee! ¡Caarimpa ishirejeitantana! Pincanteri: ‘¡Tsame ajajeiteta!’ 16Aviroquea vanquerone pinchaquiire, pijicotantearo incajare; ontencareajatantanaqueari nianqui ompirijatanaqueta, pavisajeitantanaqueari intatiqueronta. 17Naroquea cantacaashiretacayearine maaroni egiptosatipee inquisoshirejeitanajeta, iroijanajeitantapempiri. Nonijaasanojeitanteariri notasorenca, nontsoncajeiteri pincatsari jeri manajeivetachari carajeivetariri, tejeivetachari shiacomentotsipeequi aisati quijacoyevetariri cavaayopee. 18Ariorica nonijaajeitaqueri notasorenca, impoijiquea iriojeitanaque maaroni ishanincapee narotaque Tasorentsisanori. 19Irosati ishoncantapaaca Inampire Tasorentsi itimantacaro mencori, iquenajeitapaaquenta ishanincajeitaniri Israel. Tempa iriotaque jivatapinijeitaqueriri. 20Ari ocatiatsantsaatapaaca otsitenitacotasanojeitapaaqueri egiptosati. Irotaque caari imajeitanta inquempejijeitavajeari. Irintiquea ishanincajeitaniri Israel, oquitasantetacotasanojeitaqueri.
21-22Ari yoancanaquero Moiseshi iraco ijicotantanacaro incajare, irosati itiancantacaro Tasorentsi antearoite tampea. Ocantani ojeoncapinitaque tsiteniriqui, irosati otencareajatantanaca. Oticaajatanaca acaquerocapeequi, opirijatanaque nianqui imajeitantanacari yavisajeitanaque intatiqueronta ishanincajeitaniri Israel.
23Ari ishiacojeivetapaaca iriori egiptosati yoijajeivetapaacari irosati nianqui incajare. 24Ari irotimatajantsi onquitaiteaje, irosati yamenantanacari Tasorentsi mencoriquinta amorecaquenta paamari icomitacaajeitacari egiptosati ivaraashijeitanaca. 25Aisati ocarajayetanaque oiti ishiacomentopee. Oshequi opomerentsitimojeitanacari intsiquero icantajeitanaca. Irosati icantavacaajeitantanaca.
—¡Tsame ashiapitsajeitanajerita ishanincapeeni Israel! ¡Oshequi ipiacoventajeitacari Itasorentsite!
26Irosati icantantajari Tasorentsi Moiseshi:
—Poancajero paco, pijicotajero incajare ompiajatantapaajeari, ontsoncajeitantanaqueariri aajeitanaqueri shiacoyevetapaachari jeri quijacoyevetariri cavaayopee.
27Ari yoancanajiro Moiseshi iraco ijicotanajiro incajare. Irosati opiantapaaja oquempeveitani, quitaiteanaji oni. Yora epiptosatipee icoajeivetanaja irishiapitsajeitanaquerome. Iro cantaincha itsitoncajeitacaro nija. Aitaque ocantari yoimitsitiajeitantacariri Tasorentsi. 28Opiantapaajari nija oquempeveitani, omitsitiajeitaquero maaroni shiacomentotsipee, quijacoyetariniri cavaayo aisati manajeitacharini oijajeivetapaacariri ishanincapeeni Israel. Tecatsi aparoni avisacotajantsine. 29Irintiquea ishanincajeitaniri Israel monteajeitanaincha. Yaniijeitanaquero nianqui pirijatanaintsiri, oticaajatanaca incajare acaquerocapeequi.
30Ora quitaiteriqui aitaque yoavisaacojeitaqueriri Tasorentsi ishanincajeitaniri Israel yoijanajeivetantavajariri egiptosatipeeni. Ari yamenacojeitapaaqueri otsapijaqui incajare, ineajeitaqueri yentayetapaaca egiptosatipeeni. 31Ineajeitantacarori maaroni ishanincajeitaniri Israel itasorenca Tasorentsi yonijaasanotaqueriri egiptosati, irosati ipincatsajeitantanacari. Ishiretasanojeitanacari, aisati iquempetanaqueri Moiseshi yora quemisantiriri.
Currently Selected:
Éxodo 14: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
