Salmos 91
91
Na'su ingima coira'su
1Majan a'i Osha'choma Oshacho'cho Chigai'ccu can'jen'da
tsu Ñoa'me Joccapitssia Chigambe tumbianccunga ño'faya.
2Ña gi Na'sune afapa qquen suya:
“Tiseja ñama coira'supa ña ta'etssia tsa'oa'can tsu.
Ña Chiga tsu, ñama ñotsse'yi tson'su.”
3Ñoa'me tsu tiseja quema ccushaeña cca'i quema indisa'ne.
Quema tsu ega paqque'su'ye ccushaeña.
4Nane arapa tise sanccopai'ccu du'shuma
piccoqquia'caen tsu tiseja quema coiraya.
Tise sanccopa tsosiccuni can'jensi
tiseja ñotsse'yi quema tsomba
quema piccoqquia'caen a'tupa an'biaña.
5Tsa'cansi qui cose dyombe jacansi
a'ta'qque battittianccu ja'cho quema deya'bi.
6Paqque'su'qque sinttia'ye tta'ttaqquia'caen
quenga setsaye oshambi ni a'ta'su'qque catseya'bi.
7Nane mil a'i setsayepa que pavefanga pa'fa'ni'qque queja ccushaya.
Toya'caen diez mil que tansifanga amppi'fa'ni'qque quengaja catseya'bi.
8Vanambe'yi aqquia tso'fei'ccu camba qui
egae tsinconsundeccu vana'jen'choma atteya.
9Nane Na'su Chigai'ccu can'jensi
Joccapitssia quema coira'jesi
10jongoesu ega'ja ccatsse quema patsuye oshaya'bi.
Toya'caen jongoesu paqque'su'qque
que tsa'onga ca'niña'bi.
11Nane Na'suja tisema sefacconi'su shondosundeccuma mandaya
cuintsu mani que jacan'ni'qque coira'je'faye.
12Tise'pa tivei'ccu quema opipa ñotsse coira'faya
que tsu'tte patunga iñaccasa'ne.
13Ttesi can'jen'ttinga jacamba
tsambi'ta canjansiacan'nga japa toya'caen
iyonga tsui'a'qque qui vanaña'bi.
14Nane Na'suja su: “Tise ñama ñotsse in'jansi
gi tisema ccushaeña.
Tise ñame in'jansi gi coiraya cca'i tisema dañosa'ne.
15Ñama iñajansi gi pañamba afaya.
¡Nane ña gi tisei'ccu can'jeña!
Tise injama'choma gi vuiquiaña cuintsu opatsse can'jeñe.
Toya'caen gi tisema ñotssiave tsoña.
16Nane tisema ccushaemba gi bo'tsse canseya'chove
antteya cuintsu avujatssiye.”
Currently Selected:
Salmos 91: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
