Salmos 89
89
Chiga Davidi'ccu injancco'fa'cho
1Na'su, tsangae gi que ingima ñotsse in'jan'chone settapoen'jeña.
Queja que tansintsse suqquia'caen ño'ame tsonsi gi
anttembe'yi ña aya'fai'ccu tsane condase'jeya.
2Tsangae que ingima ñotsse in'jansi
sefacco cambiambiqquia'caen
que tansintsse su'cho'qque cambian'masia.
Tsane gi a'tatsse condaya.
3Davidi'ccu fae'ngae injancco'fa'choma afapa
qui tsa que in'jan'cho shondo'sui'ccu
qquen tansintsse su:
4“Que omba'su dutssiyendeccunga gi tsoña
cuintsu tsangae na'suve dapa
quia'caen que manda'choma manda'faye.”
19Tayopi queja queve in'jan'cho shondosundeccunga
attiamba conda:
“Ñambeve gi ña aindeccu'su dyombi'tssia tsandie chu'ama ttu'se.
Ttu'sepa gi tisema fuitepa joccapitssia've tson.
20¡Attepa gi ttu'se ñama shondo'su Davidma!
Ttu'sepa gi ña ñotssia aseitei'ccu tise tsovenga
fiñamba na'suve tson.
21Minga'ni'qque ña tisema fuite'je'choja shacaya'bi.
Nane ña quin'sui'ccu gi tisema quiñaeña.
22Tisema iyiccayesundeccu'qque tisema geraen'faya'bi.
Egae tsinconsundeccu'qque tisema patsu'faya'bi.
23Nane tisema iyiccayesundeccuma gi ccuchaya.
¡Minguite tsu tsendeccuma ccase tiseja atteya!
Tisema chi'gasundeccuma'qque gi sefaeña.
24Ña tisema in'jan'cho, ña tisei'ccu can'jen'chove'qque
injan'jemba tsu ti'tsse quin'an manda'suve daya.
25Ña anttesi tiseja Mediterráneo mar'ye Eufrates na'enga
pa'cco andema an'biamba mandaya.
26Tiseja ñama suya: ‘Queja ña yaya.
Nane queja ña Chiga, ñama ccushaen'su.
Ñama coira'su qui.’
27Tsa'caen susi gi dutssi'ye coenzanga antte'choma
tisenga antteya cuintsu tiseja
poi ande'su nasundeccuma ti'tsse'tsse daya.
28Tsangae tisema ñotsse in'jamba gi
Ña tisei'ccu injancco'fa'choma cambiaña'bi.
29Tise pasi tise dutssiyendeccuja
tise manda'je'choma manda'faya.
Nane sefacco toya jin'ninda tsu toya
tise dutssiyendeccu'qque can'jemba manda'je'faya.
30Tsa'ma tise dutssiyendeccu ña nafattiamba
manda'choma chi'gapa ccaningae cansepa,
31toya'caen ña mandapa su'choma shacapa
ñoa'me pañambipa tson'fambi'ninda gi
32tise'pa injama'choma somboemba
quini'ccoi'ccu ma'ppiqquia'caen
tise'pa egae tsincon'chone tise'pama vanaeña.
33Tsa'ma tsa'caen tson'an'qque anttembe'yi
gi David aindeccuma toya ñotsse injan'jeña.
Antteya'bi gi tise'pama coira'je'choma.
34Ña tise'pai'ccu injancco'fa'choma catiya'bi
ni ña tise'panga su'choma ccaningae tsoña'bi.
35Nane tsangae ñotssiapa gi fae seyi ñoa'me su'chove tsangae afapa
David aindeccunga afopoeña'bi.
36Tise omba'su dutssiyendeccu tisia'caen
tsangae manda'faya qquen susi
tsa'caen tsu tson'faya.
Nane coejechiga tsangae chanjunqquia'caen tsu
tise dutssiyendeccuja tsangae mandapa chanjun'faya.
37Cose'suchiga tsangae chanjunqquia'caen,
toya'caen sefacco tsangae jinchoqquia'caen
tsu tsangae manda'faya.”
Currently Selected:
Salmos 89: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
