Salmos 51
51
Mendeyeya'chove iñajan'cho
1Chiga Quitsa, que pa'cco in'jan'choi'ccu
ñama anttembe'yi in'jamba mendeyeja.
Que ñama mendeye'choi'ccu
ña in'jangae tsincon'choma joqquitssianjan.
2Cashi catija ña in'jangae tsincon'choma.
Ccucha catija ña egae in'jan'choma.
3Atesu gi ña egae tsincon'choma.
Pa'cco a'ta asittaen'bai'ccu gi
canse ña in'jangae tsincon'chone.
4Quema gi da'ño, tansien quene gi shacapa.
Tansien que su'choyi tsu ñoa'me su'cho.
Que ñama injama'choma somboeñe su'chota
tsu ñoa'me ñotsse su'cho.
5Chuitepie gi egae tsincon'su.
Ña mama isuttie gi egae tsincomba canse.
6Tsa'ma queta qui injama'cho tsosipie
ñotsse in'jamba canse'chove ñombi'ye.
Tsa'caen ñama'qque in'jaenjan
cuintsu ña'qque atesuye.
7Canttini'cco tosei'ccu ñama cashija tsayita gi giya'tssiya.
Ñama cashija cuintsu
ñajan chandisu'ccoma ti'tsse tototssiye.
8Ña tsosinama fettaja cuintsu
avujatssiama ña ccase pañañe.
Ña ai'vo ñoquimbipa chapeqquia'caen da'choma
ccase avujaenjan.
9Ña egae tsincon'cho'ye joqquitssipa cambe canjan.
Pa'cco ña egae tson'choma ccucha catija.
10Chiga Quitsa, ña injama'choma cuname agattoenjan.
Ccase ñama quiñaejan ña egae tsonsa'ne.
11Que'ye ñama joqquitssianjama.
Que Qquendya'pa ñani jinchoma itsajama.
12Ña tayoe que ccushaen'choi'ccu avujatssiqquia'caen
ccase ñama avujaenjan.
Ñama in'jaenjan cuintsu ña ccase
que in'janqquia'caeñi canseye.
13Tsayita gi que manda'choma
in'jangae tsinconsundeccunga atesiaña.
Qque'chondeccu'qque tsu ccase quema in'jan'faya.
14Chiga Quitsa, Chiga ñama ccushaen'su,
chigáne ña a'ima fi'tti'choma aqque'paenjan.
Tsa'caen tson'ninda gi
que ñotsse tson'jen'choma in'jamba settapoeña.
15Na'su, ña aya'fama fettaja.
Ña menzanza'fama favoenjan,
que ñotsse tson'chone afapa settapoeñe.
16Osha'cho va andeni'suma afe'cho tsu quenejan barembi.
Bare'choecan'da gi afeye'can.
17Tsa'ma ñoa'me tisu egae tson'choma chi'gapa
Chigama in'jamba iñajan'cho tsu Chigama avujaen.
Tisu egae tsincon'chone ñombi'ye'ninda
tsu Chigaja chi'gaya'bi.
18Que tsa'caen in'jan'da Ziónga ñotsse tsonjan.
Jerusalén canqque'su patu ttuccuma ccase ttuja.
19Tsa'caen tson'da qui
ingi oque oraen'chomajan isuya.
Pa'cco osha'choma oque oraen'choma'qque qui isuya.
Tsa'cansi gi vaura quitsa'ye du'shuma
oque oraemba afeya.
Currently Selected:
Salmos 51: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
