Salmos 32
32
Shacama joqquitssian'cho
1Avujatssi tsu tsa a'ija
tise egae tsincon'cho tayo joqquitssisi.
Nane tise in'jangae tsincon'choma ccuchasi
avujatssi tsu.
2Avujatssi tsu tsa a'ija
tise injama'choni afopoembe cansesi
Na'su tise egae tsincon'choma agattombisi.
3Tisu egae tsincon'choma condambipa
pa'cco a'ta attuse'jesi ña ai'voja tombu.
4A'ta, cose'qque qui que tivei'ccu
ñama pisachoqquia'caen ñama quimbian.
Nane te'ta coe'jenga pandiqquia'caen gi quimbi.
5Tsa'caen dapa gi in'jamba
ña egae tsincon'choma quenga conda.
Jongoesuveyi'qque a'tumbitsse gi in'jamba su:
“Na'sunga gi ña egae tsincon'choma condaya.”
Condasesi qui tsa egae tsincon'cho shacama joqquitssian.
6Tsa'cansi tsu poiyi'cco Chigave in'jan'chondeccu
quema iñajaña'cho.
Nane que can'jensi atteye osha'ta
tsu iñajaña'cho maqui a'ta vana'jen'cho
ji'ni'qque opatsse can'jeñe.
7Quenga ca'niqquia'caen gi opatsse canse.
Queja ñama coira jongoesu ñama dañosa'ne.
Ñama qui ttupa an'bian patsuye settapoen'choi'ccu.
8Qquen tsu Na'suja su:
“Ñajan quema caña'jemba gi quema atesian'jeña.
Nane quema in'jaemba gi
candusiaña ma'caen canseya'chove.
9Cavayo ni boro'caen tsincoña'bi qui.
Nane tsendeccu atesuye osha'fambisi
queja yoshavama tise'pa aya'fanga botaemba
mani jaya'chove tansian'jen.
Tsa'caen tsombi'ninda quema paña'fambi.”
10Tsain'bitssi tsu egae tsincon'su vana'jeña'cho.
Tsa'ma Na'su ñotsse in'jan'cho tsu tisema
pañasundeccuma ttupa coira'je.
11Que'i ñotsse da'chondeccu avujatssi'faja.
Avujatssipa Na'suma ñotsse afa'faja.
¡Nane ñotsse afapa avujatsse fundo'je'faja!
Currently Selected:
Salmos 32: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
