Salmos 34
34
Na'su Chigama ñotsse afa'cho
1Pa'cco a'ta Na'su Chigama ñotsse afapa gi
anttembe'yi ña aya'fai'ccu tise ñotssiama condaya.
2Injama'choni Na'suve in'jamba gi
dyombi'tsse tisene afa'je.
¡Vanasundeccu, ña su'choma pañamba avujatssi'faja!
3Fae'ngae ñai'ccu Na'suma ñotsse afa'faja.
Ñoa'me ti'tsse'tssi tsu tise iniseja.
4Na'suma tta'ttasi tiseja ñama paña.
Pañamba pa'cco ña dyopa in'jan'choma joqquitssian.
5Poiyi'cco majan Na'suve in'jamba
tise'pa camba'ju chanjunqquia'caen dapa
avujatsse can'jemba ccatsse ansange'faya'bi.
6¡Va'cha a'i gi!
Tsa'ma Na'suma iñajansi tiseja ñama paña.
Pañamba ña vana'jen'cho'ye ñama ccushaen.
7Nane Na'suma sefacconi'su shondo'suja
Na'suma pañasundeccuma ttupa ccushaen.
8Tsa'cansi Na'suma atesucamba canjan
tise ñotsse tson'choma atesuye.
¡Nane avujatssi tsu majan tisuma Na'sunga afe'su!
9Na'suve in'jan'chondeccu Na'suma ñotsse paña'faja.
Shacaya'bi tsu tisema paña'suja.
10Nane ricondeccuja va'chae dapa qquipoe'su'faya.
Tsa'ma Na'suma ttattasundeccuneja
jongoesuyi'qque ñotssiaja shacaya'bi.
11Jija ña dushundeccu.
Jipa ñama paña'faja.
Paña'faja ma'caen Na'suve in'jamba
canseya'chove ña atesian'choma.
12¿Bo'tsse canseye'ta ti qui in'jan?
¿Avujatsse can'jeñe'da ti qui in'jan?
13Tsa'caen in'jan'da que menzanza'fama se'pija egae afasa'ne.
Toya'caen minga'ni'qque que aya'fai'ccu afopoenjama.
14Tisuma ega'ye joqquitssiamba ñotsse tsonjan.
Opatsse canse'ya'chove tta'ttapa tsa'caen canseja.
15Na'su Chigaja tise've in'jamba
paña'suma ñotsse coirapa paña'jen
tise ttuse'je'choma pañañe.
16Na'su Chigaja egae tsinconsundeccuma chi'gapa
tisene injan'jen'choma ccuchaye in'jan majan
injan'jensa'ne.
17Nane Na'suve in'jamba paña'su ttu'sesi
junde tsu Na'suja tisema pañamba
pa'cco vana'jen'cho'ye tisema ccushaeña.
18Na'suja pporotssi tsu.
Nane majan injama'cho tsosipie ñombi'yepa oshambisi
junde tsu Na'suja tsama ccushaeña.
19Na'suve in'jamba paña'su'qque osha'chove vana'jeña.
Tsa'ma Na'suja osha'cho'ye tisema ccushaeña.
20Nane pa'cco tise tsu'ttama coira'je
tsa'su fae'cco uccasa'ne.
21Tise'pa egae tsincon'choyi tsu
egae tsinconsundeccuma fi'ttiya.
Toya'caen tsu Na'suve in'jamba pañasundeccuma
chi'gasundeccumajan injama'choma somboeña'cho.
22¡Tsa'ma Na'suja tise've in'jamba shondosundeccuma ccushaemba
tise'pa injama'choma somboeña'bi!
Nane tsendeccuja tise've in'jamba paña'fa.
Currently Selected:
Salmos 34: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
