Salmos 22
22
Ñombi'ye'a'qque ñotsse afa'cho
1Ña Chiga, ña Chiga, ¿Jongoesie qui ñama cati'je?
¿Mingapa qui ñama ccushaeñe jimbi?
¿Mingapa qui ña ina'jen'choma pañambi?
2Ña Chiga, a'ta, cose ña quema iñajan'ni'qque
qui ñama afapa ño'faembi.
3Tsa'ma que qui ñotssia. Que qui Na'su.
Poi israendeccu quema ñotsse afa'fa.
4Ingi coenzandeccu quema in'jamba paña'fa.
Paña'fasi qui tise'pama ccushaen.
5Tise'pama fuiteye iñajansi qui fuitepa vuiquian.
Nane quema paña'fasi qui tise'pama afopoembi.
6Tsa'ma ñanda gi a'imbipa yosia'can.
A'ija ñama chi'gapa barembi qquen tsu su'fa.
7Poiyi'cco ñama attepa afase'fa.
Ziñomba fi'ttiqquia'caen tsovema fenonomba su'fa:
8“Tise Na'su Chigave in'jan'ninda
cuintsu Na'su tisema ccushaemba vuiquianjan.
Ñoa'me tisema in'jan'da
cuintsu tisema ccushaenjan.”
9Que qui tson cuintsu ña mama ñama isuye.
Ña mamama chocho'jesi que qui coira.
10Nane toya isumbi'te qui
ñama in'jamba tayo coira'je.
Isu'ni'qque qui ña Chiga.
11¡Ña'ñe joqquitssijama!
Vanae'su ñanga catse'ma'caen gi vanaña.
Me'cho gi ñama fuite'suve.
12Vaura quitsaye ñama shoquendi'e ttuqquia'caen
tsu ñama chigasundeccuja ñama iyicca'ye'fa.
Nane putsa'su Basán ande'su vaura'caen tsu ñama iyicca'ye'fa.
13Ttesi putsa'su iyicca'yepa sharupa
fundoqquia'caen tsu ñama afase'fa.
14Ñanda gi tsa'ccuma fiña'jenqquia'can.
Ña tsu'tta'su bacco'choja battiqquia'can tsu.
Ña injama'cho tsu tuñoa'caen tssutssu'je ña injama'ttinga.
15Tsa'o'su ccaque coe'jesi sambaqquia'caen
tsu ña aya'faja samba.
Ña menzanza'fa'qque santsse dapa aya'fanga setsa.
Ñajan tayo papa andenga ccuiqquia'caen
ccuisi qui ñama cati.
16Ain shoquendi'e catseqquia'caen tsu
ega aindeccuja ñama ttu'fa.
Nane ttupa tsu ña tive, tsu'ttema'qque canshaen'fa.
17Pa'cco ña tsu'ttama gi agattoye osha.
Anttembe'yi ñama chigasundeccuja can ccutsu'fa.
18Gana qquen co'fepa tsu
ña ondiccu'je'cho sarupama attufaemba isu'fa.
19Tsa'ma Na'su, queta qui ña quin'an.
¡Ña'ñe joqquitssijama!
¡Junde jija ñama fuiteye!
20Ñama ccushaenjan matichi'ccu pasa'ne.
Ñama ccushaenjan va ainfavo ñama fi'ttisa'ne.
21Ñama ccushaenjan va a'i ttesia'caen ñama ansa'ne.
Ñama ccushaenjan vaura quitsaye tise can'choi'ccu
noñangianqquia'caen ñama fi'ttisa'ne.
22Quene gi afaya ña antiandeccunga.
Aindeccu bo'fa'chonga gi
quene ñotsse avujatsse afaya.
23Poiyi'cco que'i majan Na'suve in'jan'da,
¡Tisema ñotsse afa'faja!
Poiyi'cco Jacob omba'su dutssiyendeccu,
“¡Tiseja ñotssi!” qquen su'faja.
Nane Israel omba'su dutssiyendeccu,
¡tisema dyoe'sui'ccu in'jan'faja!
Currently Selected:
Salmos 22: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
