Salmos 19
19
Chigane ñotsse canjaen'cho
1Sefacco tsu conda Chigaja ñotssiave.
Nane tsani jincho'cho'qque
tise agattoen'choma canjaen'fa.
2Poi a'ta tsu a'tatssia've
atesianqquia'caen canjaen'jen.
Poi cose'qque tsu
tansintsse atesianqquia'caen canjaen'jen.
3Mapán tsa'caen canjaen'fa'ni'qque
tise'pa jongoesu qquen afa'chove qui paña'fambi.
4Tsa'ma poi andeni tsu
tise'pa condase'cho já attian'jen.
Nane sefacco já ccutsuni tsu attian'jen.
Tseni sefacconi tsu Chigaja ñoña
coejechiga canjeña'chove.
5Nane tsandie pusheye jayiqquia'caen
tsu coejechigaja tise can'jene sombo.
Quin'an tsandie buttoye tson'jenqquia'caen tsu sombo.
6Sefacco tsutopane ashaemba já ansundepa
ccafa'su tsutopani tsu amppi.
Majañi'qque tsu tise coe'jema a'tuye oshambi.
7Na'su atesian'choja ñoa'me tansintssi tsu.
Cuna injama'chove tsu ñoña.
Chiga mandaqquia'caen tsonsi
tsu in'jambi'choa a'i'qque injama'pave daya.
8Na'su Chiga in'jamba su'choja ñotssia tsu.
A'i injama'choma tsu avujaen.
Na'su manda'choja egave me'choa tsu.
A'i tso'fema tsu attian.
9Na'suma dyoe'sui'ccu in'jamba
tsu a'ija tsangae ñotssiave dapa canseya.
Na'suja mandapa tansintsse tsu manda.
Tsa'caen tsu tsoña'cho.
10Nane tise manda'choja ñotssia corima ti'tsse bare.
Tuño cuñajun'choa'caen tsu ti'tsse ñotssia.
11Ñajan quembe sema'supa gi
que manda'choma pañamba in'jan.
Pañamba gi ñotssiama isu.
12¿Majan tsu tisu egae tsincon'choma atesu?
Chigáne, Na'su, ña atesumbe
egae tsincon'choma joqquitssianjan.
13Toya'caen, egae tsincoñe in'jan'choma
ña'ñe joqquitssiamba ñama fuiteja
tsa in'jaen'cho ñama patsusa'ne.
Tsa'caen fuitesi gi shaca me'cho canseya.
Nane que fuitesi gi ñoa'me egae tsincon'cho
metsse dapa canseya.
14Na'su Chiga, que caña'jen'ni
cuintsu ña afa'cho, ña injama'cho
in'jan'cho'qque quenga ñotsse attiañe.
Que qui patuvo'choa'caen ñama coirapa an'bian'su.
Ñama ccushaen'su qui.
Currently Selected:
Salmos 19: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
