Salmos 106
106
Israel pañambipa tson'jen'cho
1¡Ñotssi tsu Na'su Chigaja!
Na'su Chigaja ñotssia tsu.
Tisema avujatsse afa'faja.
Tsangae ingima in'jan'cho tsu.
Tisema avujatsse afa'faja.
2¿Majan tsu Na'su ti'tsse'tssia tson'chone condaye osha?
¿Majan tsu pa'cco tisenga ñotsse afaya'chove afaye osha?
3Nane avujatssi tsu majan a'i ñotsse tson'suja.
Anttembe'yi ñotsse tsomba tsu anttembe'yi avujatssi.
4Na'su, que aindeccuma ñotsse tson'jemba ñama aqque'pajama.
Ccushaeñe ji'ta ñama'qque fuiteja
5cuintsu ña'qque que in'jan'chondeccui'ccu ñotsse can'jemba
que aindeccui'ccu avujatssiye.
Nane quene isusundeccui'ccu gi fae'ngae quema ñotsse afaya.
6Ingi tayopi'su coenzandeqquia'caen gi egae tsincon'fa.
In'jangae tsincomba gi egae tson'fa.
7Ingi tayopisundeccuja Egiptoni can'jemba
que ti'tsse'tssia canjaen'choma chi'gapa
que tise'pama ñotsse in'jan'choma aqque'pa'fa.
Tsa'caen aqque'papa Cu'a mar jin'ttinga
quema'qque chi'gapa cati'fa.
8Tsa'ma Chigaja tise inisema ñotsse canjaeñe
tise'pama ccushaensi tsu tise quin'suma attepa in'jan'fa.
9Na'suja Cu'a marma iyu'upa samboen
tise'pa a'i menia santsse
jaqquia'caen santsseyi isiañe.
10Tsa'caen tise'pama iyiccayesundeccu'ye tise'pama ccushaemba
tise'pama chi'gasundeccu'ye tise'pama somboen.
11Nane mar tsa'ccu tise'pa enemigondeccuma piccosi
ni fae'ccoyi'qque ccusha'fambi.
12Na'su Chiga tsa'caen tsonsi
aindeccuja tise tansintsse su'chove in'jamba
tisema avujatsse settapoen'fa.
13Tsa'ma junde tsu Chiga ñotsse tson'choma aqque'papa
ron'daye in'jan'fambi tise in'jan'choma atesuya'chove.
14Tseni, a'i menia tisupayi can'jemba
tise'pa in'jangae in'jan'chove iñajamba
Chigama qqueñacañe iñajan'fa.
15Iñajan'fasi Chigaja tise'pa in'jan'choma afepa
ega paqque'suma'qque afe cuintsu poiyi'cco pa'faye.
16Tise'pa can'jeni can'jemba Moisés,
toya'caen Chiga in'jamba ttu'se'cho Aarónma'qque injama'choni se'pi'fa.
17Injama'choni tsa'caen se'pi'fasi
Chigaja andema fettasi andeja cundeqquia'caen
tsa Datánma toya'caen poi Abiram aindeccuma'qque tsangae nepian.
18¡Si'nge'qque anchandapa
tise'pa aindeccuma metsse sefaen!
¡Nane anchandapa tsu
egae tsinconsundeccuma metsse oque cati!
19Horeb ccotta'cconi aindeccuja
ñoña'cho vaura du'shuve ñoña'fa.
Corima tssutssiamba ñoña'cho chigave ñoñamba
tsanga iñajan'fa.
20¡Nane sefacconi'su Joccapitssia Chigama catipa
shoshovima anqque'su vaura quitsayea'can
ñoña'chove in'jamba iñajan'fa!
21Chiga, tise'pama ccushaen'suma aqque'papa
Tise Egiptoni ti'tsse'tssia've tson'choma'qque aqque'pa'fa.
22Cam andeni tsa'caen ti'tsse'tssia've canjaemba
Cu'a marni'qque ti'tsse camboenqque'suve tsonsi atte'ma tsama aqque'pa'fa.
23Tsa'can'fasi Chigaja tise'pama fi'tti
sefaeñe in'jamba susi Moisésja enttingenga ccutsupa Chiga iyicca'ye'choma vuiquian.
Vuiquipa Chigaja ingima fi'tti sefaembi.
24Omboe ñotssia andema chi'gapa
Chiga ñoa'metsse su'choma'qque in'jan'fambi.
25Tise'pa carpani Na'suma egae afapa
tise manda'choma pañambipa ccaningae tson'fa.
26Tsa'caen tsonsi Chigaja tansintsse su'choma canjaeñe tivema yasapa qquen su:
“Vandeccuja a'i menia pa'fasi
27tise'pa dushundeccu'qque poi andenga jajapa
poi Na'suve in'jambi'choa andenga pa'faya.”
28Cansembi'choa chigandeccunga afe'cho aña'choma amba
Baal-peorve in'jamba tsambe aindeccuve da'fa.
29Tsa'caen egae tsomba Chigama iyicca'yean'fasi
paqque'suja atapasi paye ashaen'fa.
30Tsa'ma Finees jangipa egae tsincomba shacaen'suma
fi'ttisi paqque'su pasasi a'ija ti'tsse pa'fambi.
31Finees tsa'caen tsonsi
Chigaja tisene ñotssiave in'jansi
poi omba'su aindeccu'qque tsama tsangae injan'jen'faya.
32Toya'caen Meriba tsa'ccu jini Chigama iyicca'yean'fa.
Tsa'caen tson'jemba Moisésma'qque vanae'fa.
33Nane tise injama'choma noñangian'fasi iyicca'yepa
ñotsse in'jambe'yi injanga egae afa.
34Na'su majan canqquema sefaeñe manda'ni'qque
israendeccuja tsa'su aindeccuma sefaen'fambi.
35Tsa'ma faesu chigandeccuve in'jan'chondeccui'ccu
fae'ngae can'jemba tsendeccu in'jan'chove atesupa tsa'caen canse'fa.
36Tsenisundeccu ñoña'cho chigandeccuma iñajan'fasi
tsesu chigambindeqquiaja tise'pama qqueña'fa.
37Qqueña'fasi israendeccuja tise'pa dutssiyendeccu,
onquengendeccuma'qque tsesu cocoyandeccunga
fi'ttipa afe'fa.
38Egave me'chondeqquia'be anjampama tssaña'fa.
Tise'pa dutssiyendeccu, onquengendeccumbe
anjampama tssañamba
Canaán ande'su chigandeccunga afesi
tsendeccumbe anjampaja pa'cco tsa andema
dañomba egave tson.
39Nane israendeccuja tsa'caen egae tsincomba
tisupama'qque egave tsomba tisupama afe'fa
osha'cho egae tsincon'chove tsoñe.
40Tsa'caen tson'jen'fasi Na'suja tise aindeccuma
ñoa'me iyicca'yepa tise in'jan'cho aindeccuma chi'ga.
41Chi'gapa faesu chigave in'jan'chondeccunga catipa
tise'pama iyiccayesundeccunga antte
cuintsu patsupa manda'faye.
42Tsendeccuja israendeccuma ñoa'me vanaemba
tise'pa quin'suma canjaemba quinsepoemba manda'fa.
43Chigaja tsain'bitsse tise'pama ccushaen'ñacca.
Tsa'ma tise'pa injama'choni ccaningae in'jamba
Na'su tson'choma chi'gapa ti'tsse egae tsincon'fa.
44Tsa'caen tson'jen'fa'ni'qque Chigaja
tise'pa vana'jen'choma attepa
tise'pa vana'jemba ina'jen'choma paña.
45Pañamba tise a'i'ccu fae'ngae injancco'fa'choma injan'jemba
tise ñoa'me ti'tsse in'jan'choma canjaemba
vuiquipa tise'pama ccaningae tson.
46Nane Na'su ccaningae tsomba in'jaensi
Israelma patsusundeccu'qque tise'pama
mende'yepa ñotsse tson'fa.
47¡Na'su, ingi Chiga, ingima ccushaenjan!
¡Ingi cca'tti, cca'tti can'jen'cho ande'ye
ingima ttu'sepa boña'jan cuintsu
ingi'qque que ñotssia inisema ñotsse afa'faye!
48¡Na'su Chigama ñotsse afa'faja!
¡Tiseja Israel Na'su tsu!
¡Tsangae tsu tisema ñotsse afa'faya'cho!
¡Ñotssi tsu Na'su Chigaja!
Currently Selected:
Salmos 106: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
