Salmos 105
105
Chiga Israelne ñotsse tson'jen'cho
1¡Na'su ñotsse tson'chone tisema avujatsse afa'faja!
¡Tise inisema'qque poiyi'cconga conda'faja!
Poi canqque'su aindeccunga
Tise tson'jen'choma conda'faja.
2Tise've in'jamba pañamba settapoen'choi'ccu canjaen'faja.
¡Tise ñotsse tson'jen'chone afa'faja!
3Tise ñotssia inisema atesupa avujatsse afapa canse'faja.
¡Nane poiyi'cco majan Na'suve ttattasundeccu
injama'choni avujatssi'faja!
4Anttembe'yi Na'suma can'faja.
Camba tise quin'sui'ccu canse'faja.
5Tise ñotsse tson'jen'choma aqque'pa'fajama.
Tise joccapitsse tson'jen'choma injan'jen'faja.
Tise supa manda'choma'qque injan'jen'faja.
6Que'ija tisema shondo'su Abraham omba'su dushundeccu.
Nane tise in'jan'cho Jacob dushundeccu qui.
7Tiseja Na'su, ingi Chiga tsu.
¡Pa'cco biani'su andema tiseja manda'je!
8Nane tise su'choja ñoa'me su'chosi
tsu mapán mil a'i canse'cho'ye pasa'ni'qque
toya tise a'i'ccu injancco'fa'choma aqque'paya'bi.
9Tsa injancco'fa'chomajan Abrahami'ccu afapa
Isaacnga tansintsse su'choi'ccu ccase afa.
10Toya'caen Jacobnga ccase manda'chove tsama afapa
israendeccui'ccu tsa tsangae injancco'fa'chove afapa su:
11“Que'inga gi Canaán andema afeya.
Nane que'inga afesi isu'cho ande tsu.”
12Tsequi a'ta israendeccuja re'riccopa,
faesu ande'su aindeqquia'caen can'jen'an'qque
13fae ande faesu andenga jacamba
fae manda'su faesu manda'sunga japa can'jen'fa.
14Tsa'ma Na'su Chigaja anttembi cuintsu
faesu ande'su aindeccu tise'pama noñangiañe.
Nane nasundeccu noñangiañe tson'jen'ninda tsu qquen iyu'u:
15“Ña in'jan'chondeccuma pporaenjama.
Ña aya'fama afasundeccuma noñangianjama.”
16Na'su afasi tsa andeni qquipoesuiteve dasi
jongoesuve añe me'i'on.
17Tsa'ma israendeccuma o'tie fae a'ima Egiptoni moe.
Tsaja José, índipa tsangae sema'suve chavaemba moe'fa'cho.
18Tise tsu'ttema candenai'ccu iñaccaemba
tise tsifoma'qque yoshavai'ccu andiamba an'bian'fa.
19Nane Na'su Chigaja José in'jan'choma atesuye in'jamba
tisema tsa'caen vanae José tisu
jai'ngae tsoña'chove su'choma tsoña'ngae.
20Tsonsi ande na'su, tsain'bio a'ima manda'suja
tisema somboemba ccushaen.
21Somboemba tise tsa'o na'suve Joséma ccutsian.
Pa'cco tise an'bian'choma mandapa coiraye antte
22cuintsu nasundeccu, coenzandeccuma'qque
atesiansi injama'pave da'faye.
23Omboe Israelja Egiptoni ji.
Tsaja Jacob tsu, faesu ande'su a'i.
Tsa'caen jipa Cam andeni can'jen.
24Can'jensi Chigaja tise aindeccuma atapoemba
injan'tssia've tsomba
Egiptondeccuma ti'tsse quin'anme tson.
25Tsa'ma Egiptondeccu injama'choma'qque in'jaensi
tsendeccuja tise aindeccuma chi'ga'fa.
Nane tisema shondosundeccuma afopoemba noñangian'fa.
26Tsomba tse'i Chigaja tisema shondo'su Moisés,
Aarónma'qque ttu'sepa tseni moe.
27Moesi jipa Chiga agattoen'choma Cam andeni tson'fa.
Nane tseni'su aindeccunga ti'tsse'tssia
canjaen'choma canjaen'fa.
28Chiga mandasi pa'cco andeja sintsse da.
Tsa'ma egiptondeccuja Chiga su'choma in'jan'fambi.
29Chiga mandasi na'en'su tsa'ccuja anjampaveyi dapa
pa'cco avuma fitti'tti.
30Sapoma'qque injan'tsse isi ande'qque on'ba'o.
Nane ande na'su anambaccu'qque sapoyi on'ba'o.
31Chiga afasi unjimba'ccoa'caen ocu,
toya'caen tenqquen'cho jipa Egipto andema picco.
32Unjinjan tsandapandaquive dapa amppisi
tsanda'qque veyaemba pa'cco andema oque.
33Tsa'caen tsomba o'fa tsaja,
higoma'qque daño sefaemba
pa'cco Egipto ande'su quini'ccoma'qque ucca'sho sefaen.
34Toya'caen Chiga afasi ttombu'qque ji'fa.
Nane agattoye oshambi'tsse jipa tsain'bio tsu.
35Jipa osha'cho sho'yoqque'suma an sefaemba
pa'cco ande'su teta'choma'qque an'fa.
36Tsomba teta'choma sefaenqquia'caen
a'i aisheve isu'chondeccuma'qque pporaemba
poiyi'cco Egipto'su dutssi'ye coenzama fitti'tti.
37Tse'i Chigaja tise aindeccuma Egipto'ye somboen.
Nane injan'tsse cori, totoacorima'qque andupa
dyombi'tsse quin'sui'ccu sombo'fa.
38Egiptondeccuja israendeccuma dyopa
avujatsse tise'pama can moe'fa.
39Ja'fasi Chigaja tise'pama piccoye unjimba'ccoma
attajaemba cose'qque si'ngei'ccu tise'pama attian.
40Israendeccu anqque'suve iñajansi
yayapa chivi'rima moe.
Toya'caen sefacconi'su panma tise'pa ttepputsse
shequian moe.
41Patuvo'choma'qque doñasi tsa'ye tsa'ccuja sombopa
na'en'caen a'i menia'su andengae ai'je.
42Nane Chigaja tisema shondo'su Abrahamga
tayopi tansintsse su'choma aqque'pambi.
43Chigaja tise in'jan'cho aindeccuma somboensi tsu
avujatsse fundopa Egipto'ye sombo'fa.
44Toya'caen faesu aindeccumbe andema itsapa afepa
tsa'su aindeccu tisu sema'cho'suma
taiya'choma'qque itsapa tise'panga afe
45cuintsu anttembe'yi Na'su atesian'choma in'jamba
tise manda'choma'qque pañamba tson'faye.
¡Ñotssi tsu Na'su Chigaja!
Currently Selected:
Salmos 105: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
