Salmos 10
10
Chiga fuiteya'chove iñajan'cho
1Na'su, ¿jongoesie qui biani can'jen?
Ingi vana'jensi ¿jongoesie qui a'tu?
2Egae tsincon'suja, tisuja ñotssia qquen in'jamba
oshambi'choama tta'ttapa indi.
Tsa'ma injama'choni ma'caen qqueñañe in'jamba
qquendeccopa tisuyi tsanga indiye.
3Egae tsincon'suja tise injama'choni
in'jangae in'jamba avujatsse tsane condase.
Panshaen osha'chove in'jamba egae afapa Na'su Chigama afase.
4Nane tsofa'tuma janchiamba quinsepoemba su:
“Chigaja jimbi.
Me'i'on tsu ña injama'choma somboen'suve.”
Tsa'caeñi tsu tiseja in'jan.
5Jongoesuve tsonsi ñotsse tsu naningeya.
Majan tise injama'choma somboen'su can'jembisi
attembipa tisei'ccu iyiccosundeccuma afasepa feña'jen.
6Nane majañi'qque tisema joqquitssiañe oshambisi
tsangae vanambe'yi can'jeña qquen tsu in'jan.
7Tise aya'fa'qque anttembe'yi afasepa
afopoemba cca'ima daño'jen.
Nane tise aya'fai'ccu tsu tise noñangiamba
vanae'choma a'tien'jen.
12¡Na'su, jangipa que quin'suma canjaenjan!
¡Vanasundeccuma aqque'pajama!
15¡Egae tsonsundeccumbe tivema u'ccaqquia'caen
tise'pa tson'jen'choma se'pija!
¡Tise'pa egae tsincon'cho shacama iñajanjan
pa'ccoma fi'ttiya'ngae!
16Nane tsangae tsu Na'su Chigaja manda'jeya.
¡In'jambindeqquia tsu tise ande'ye joqquitssiange'faya!
Currently Selected:
Salmos 10: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
