Salmos 14
14
Na'su Chigave in'jambe canse'cho
1A'i sumbija tise injama'choni
“Chigaja jimbi” qquen su.
Ju, poiyi'cco tsu egae dapa ñoa'me in'jangae tsincon'fa.
Me'i'on tsu ñotsse tson'suve.
2Na'su Chigaja sefacconi can'jemba
va ande'su aindeccuma caña'jen.
Camba ñotssiave in'jan'cho a'ive ttatta'je,
majan tisema ttatta'suve.
3Tsa'ma poiyi'cco ega tsaiqui'ye
qquepa jacanqquia'caen fae'ngae egae tsincon'fa.
Me'i'on tsu ñotsse tson'suve.
Nane ni fae'ccoyi'qque ñotssiaja jimbi.
4¿Minga'ni tsu egae tsonsundeccuja pañamba in'jan'faya?
Nane Na'su Chigave in'jambipa tsu ña aindeccuma,
panma anqquia'caen, an sefaen'fa.
5Tsa'ma Chigaja tise ño'an pañasundeccui'ccu can'jensi
egae tsonsundeccuja ñoa'me oshambipa dyopa ttun'dundu'je'faya.
6Nane que'i egae tsinconsundeccu
qui va'chandeccu in'jan'choma se'pi'fa.
Tsa'ma tsendeccu Na'sunga jisi
tiseja tise'pama coiraya.
7¡Ronda'je'fa gi cuintsu Zión ccotta'cco'ye
Na'su jipa israendeccuma ccushaeñe!
Nane tsequi a'ta Na'su tise aindeccunga
ñotssiave ccase anttesi, Jacob dushundeccu,
nane poiyi'cco israendeccuja avujatssi'faya.
Currently Selected:
Salmos 14: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
