Deuteronomio 30

Chiga ccase in'jañe tsoña'cho

Toya'caen Moisés poi israendeccuma ttu'sepa qquen su: 1“Ñajan que'inga conda osha'cho ñotssia toya'caen osha'cho egae da'choma cuintsu que'i majame in'jan'da tsama tson'faye. Na'su que'i Chiga faesu andeni que'ima shequian mañasi can'jen'da qui tsane asi'ttaen'faya. 2Asi'ttaemba Na'suma ccase in'jamba que'i, que'i dutssiyendeccu'qque pa'cco injama'choi'ccu pa'cco canse'pai'ccu tisema pañamba ña ja'ño mandaqquia'caen tson'jen'fa'ninda 3tsu Na'su que'i Chiga que'ima mende'yepa ñotssiama ccase que'inga afeya. Poi andeni tise que'ima shequian maña'cho ande'ye tsu que'ima ttu'sepa boñaña. 4Nane que'i aindeccu ñoa'me ti'tsse biani'su andeni can'jen'fa'ni'qque tsu Na'su que'i Chigaja tsendeccuma'qque tta'ttapa iya. 5Que'i tayopisundeccu'ye can'jen'cho andeni isi qui ccase tseni can'jen'faya. Ccase tseni can'jensi tsu Na'suja que'ima ñotsse tsomba que'i tayopisundeccu'yema ti'tsse'tsse atapoeña. 6Tise que'i'ccu injancco'fa'choma tsu que'i injama'chonga tevaemba que'i dutssiyendeccu injama'chonga'qque tevaeña cuintsu pa'cco injama'cho, pa'cco canse'pai'ccu tisema in'jan'faye. Tsa'caen in'jamba tsu ñotsse canse'faya. 7Toya'caen Na'su que'i Chiga tsu osha'cho egae daqque'suve que'i enemigondeccunga tsoña, que'ima chi'gapa noñangiansundeccunga'qque. 8Tsa'ma que'ija toequi Na'sunga jipa qui pa'cco ña ja'ño manda'choma pañamba tson'faya. 9Que'i tsa'caen tsonsi Na'suja antteya que'i osha'cho tsoña'choma ñotssiave naniñe. Tsain'bio du'shuve atapapa tsain'bio aiña'chove'qque qui atapoen'faya. Toya'caen que'i jomba'cho'qque ñotsse sho'yosi qui injantsse tai'je'faya. Na'su que'i Chiga que'i tayopisundeccu'yenga ñotsse tsomba avujatssiqquia'caen tsu ccase que'inga ñotsse tsomba avujatssiya. 10Nane Na'su que'i Chigama ñotsse pañamba va tise tevaen'cho manda'choma'qque pañamba tson'ninda tsu tiseja avujatssiya. Toya'caen pa'cco que'i injama'choi'ccu, pa'cco canse'pai'ccu toequi Na'sunga jipa in'jan'ninda tsu tiseja avujatssiya.

11“Ña ja'ño a'ta que'inga conda'cho manda'choja panshaen aiye'pambi tsu ni osha'masiambi tsu. 12Nane sefacconiñi manda'chombi tsu cuintsu que'i suye: ‘¿Majan tsu ingine sefacconi japa pañamba jipa condasesi gi pañamba tsa'caen tson'faya?’ 13Ni mar jonifaniñi manda'chombi tsu cuintsu que'i suye: ‘¿Majan tsu ingine marma isepa pañamba jipa condasesi gi pañamba tsa'caen tson'faya?’ 14Tsa'ma va manda'cho que'i'ccu pporotssisi qui tayo pañamba tsane asi'ttaemba in'jan'fa. Nane tayo pañamba qui tsa'caen tsoñe osha'faya.

15“Que canjan, ja'ño a'ta gi canseya'chove ñotssiama isuya'chone que'inga condapa toya'caen paya'chove egama isuya'chone'qque conda que'i majame in'jan'da tsama isu'faye. 16Nane ña ja'ño que'inga conda'choma pañamba Na'su que'i Chigama ñotsse in'jamba tisei'ccu jacanqquia'caen omboemba tise manda'choma tise su'choma'qque pañamba tson'da qui bo'tsse cansepa tsain'bio du'shuve atapa'faya. Toya'caen tsu Na'su que'i Chiga que'ima ñotsse tsoña que'i can'jeña'cho andeni can'jensi. 17Tsa'ma osha'choma chi'gapa pañambipa ccaningae daqquia'caen faesu chigandeccunga ccarupa iñajan'da 18qui ñoa'me pa'faya. Nane ja'ño gi que'ima su, tsa'caen tson'da bo'tsse can'jen'faya'bi qui que'i Jordán na'en jonifani isepa patsuya'cho andeni. 19Sefacco, ande jin'ni gi ja'ño ñoa'metsse que'inga conda cuintsu que'i majame in'jan'da tsama isu'faye: canseya'cho tsambi'ta paya'choma isuye, toya'caen Na'su inginga ñotsse tsoñe tsambi'ta ingima egae tsoñe. Tsa'cansi canseya'choma isu'faja que'i, que'i dushundeccu'qque canse'faye. 20Na'su que'i Chigama ñotsse in'jan'faja. Tisema ñotsse pañamba tise suqquia'caen tson'faja. Nane tise tsu que'ima cansian'su. Que'ima cansiansi qui bo'tsse canqque'fave can'jen'faya, que'i tayopisundeccu'yenga afeye su'cho andeni. Nane que'i tayopisundeccu'yenga Abraham, Isaac toya'caen Jacobnga'qque tsu Na'su Chigaja, ñoa'me su'choi'ccu tsa'caen su.”

Currently Selected:

Deuteronomio 30: con

Highlight

Compare

Copy