Deuteronomio 31
31
Moisés Josuénga manda'cho
1Ccase Moisés israendeccuma condapa qquen su: 2“Tayo ciento veinte canqque'fave an'biamba gi ti'tsse que'ima angacañe oshambi. Toya'caen Na'suja ñama se'pi Jordán Na'ema iseye. 3Tsa'ma Na'su que'i Chiga tsu que'ima o'tie jayipa tsa ande'su aindeccuma patsupa nepiaña que'i tseni can'jen'faye. Na'su suqquia'caen Josué tsu que'ima mandapa angacaña. 4Nane Na'suja amorreo nasundeccu, Sehón toya'caen Ogma fi'ttipa tise'pa andema'qque patsupa nepianqquia'caen tsu tsa ande'su aindeccuma'qque nepiaña. 5Na'su tsa'caen anttesi que'i tsa andesundeccuma patsu'ta ña que'inga mandaqquia'caen tise'pama tson'faya'cho. 6Que'i injama'choma ñoñamba quinse'tsse iyicco'faja. Dyombe'yi tise'pai'ccu geraen'faja. Nane Na'su que'i Chiga tsu que'ima catimbe'yi que'i'ccu fae'ngae iyiccoya.”
7Tsomba tse'i Moisésja Josuéma ttu'sepa, poiyi'cco israendeccu paña'jen'ni, tisenga qquen su:
“Que injama'choma ñoñamba quinse'tsse tsonjan. Nane que qui va aindeccuma angacaña Na'su Chiga tise'pa tayopisundeccu'yenga tansintsse su'choi'ccu afeye qquen su'cho andeni. Queja tise'pama mandasi tsu tsa andema patsupa an'bian'faya. 8Na'su que Chigaja quema o'tie japa quei'ccu can'jeña. Tiseja quema catiya'bi ni chi'gaya'bi. Tsa'cansi dyojama ni injansejama.”
Manda'cho tevaen'jema an'bian'cho
24Tsomba Moisés pa'cco manda'choma tevaen'jenga tevaen nanimba 25leví aindeccunga, tsa Na'su Chiga a'i'ccu injancco'fa'cho cafonma angasundeccunga, qquen su:
26“Va manda'cho tevaen'jema isupa Na'su, que'i Chiga a'i'ccu injancco'fa'cho cafon utufanga ejian'faja. Tsa'caen an'bian'faja que'i egae tsincon'choma injan'jeñe.”
Currently Selected:
Deuteronomio 31: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
