Psalmen 94
94
De Rechta von de gaunze Welt
1Oo Har Gott, du Racheewa, oo Gott, dee du Rach eewen deist, komm verendach! #5Mo 32,35 2Sto du Weltrechta opp, un tol de stolte trigj, waut see vedeent haben! #1Mo 18,25
3Woo lang woaren de gottloose, oo Har, woo lang woaren de gottloose prolen? 4Dee räden stolte Wieed; aul dee, waut Jewault eewen puchen met sikj selfst. 5Dee klunjen opp dien Volkj rom un ploagen dien ieejnet Volkj. 6De Wätfrues un de framde brinjen see om, un de Weisen moaken see doot. 7See sajen: De Har sitt daut nich, un Jakob sien Gott kjemmat sikj nich doarom, waut wie met an doonen. #Psa 10,11
8Denkjt emol doaräwa no, jie Noaren em Volkj; wanea woa jie to Besennunk komen? 9Sull dee, dee daut Ua jeschaufen haft, nich uk hieren? Deit dee, dee daut Uag jeschaufen haft, nich seenen? #2Mo 4,11 10Deit dee, dee de Velkja belieet, junt nich strofen? Fält däm, dee aundre lieet, daut selfst aun Erkjantnis? 11De Har weet, waut Menschen denkjen! Hee weet, woo nuzloos daut es. #1Kor 3,20
12Jesäajent es dee Maun dän du strofst, un derch dien Jesaz belieren deist; #Hiob 5,17 13daut du am Ru jefst un utem Trubbel ratst, bat fa de gottloose een Grauf jegroft es. 14Wiels de Har woat sien Volkj nich vesteeten un sien ieejen Volkj niemols veloten. #Jes 37,33-35 15Wiels Jerecht woat wada opp Jerajchtichkjeit stonen, un wäa von Hoaten opprechtich es, woat sikj doatoo freien.
16Wäa steit fa mie un jäajen de gottloose? Wäa steit fa mie un jäajen de onjehuarsome? 17Wan de Har mie nich jeholpen haud, wudd miene Seel boolt haben em stellen Grauf jeläajen. #Psa 115,17 18Aus ekj säd: Mie jleppen de Feet, dan hilt diene truhoatje Leew, oo Har, mie opprajcht. 19Aus ekj ennalich sea beduat wia, freid miene Seel sikj to dienen Troost. #2Kor 1,4-5
20 Har, sust du irjentwaut to doonen haben met gottloose Harschoften, dee daut Jesaz brucken toom daut schlajchte to rajchtfoadjen? 21See baunen sikj toop jäajen de jerajchte, un vedaumen de oschuldje toom Doot.
22Oba de Har es miene vesechade Staut jeworden, un mien Gott aus een Steen, hinja dän ekj secha sie. 23Hee woat an fa äare Ojjerajchtichkjeit strofen, un fa äare Sinden ombrinjen; de Har, ons Gott, woat dee äwatsied brinjen.
Currently Selected:
Psalmen 94: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
