Psalmen 42

Daut tweede Buak

(Psalmen 42 – 72)

Hopninj en de groote Noot

1Een Psalm von Korach siene Säns väatosinjen. #1Chr 6,16.22; 2Chr 20,19 2Soo aus een Ree een velangen no freschet Wota haft, soo haft miene Seel een velangen no die, oo Gott. 3Miene Seel darscht no Gott, no dän läwendjen Gott. Wanea woa ekj bat doa komen, daut ekj ver Gott stonen kaun? #Psa 63,2; 84,3; 143,6 4Miene Tronen sent Dach un Nacht mien Äten jewast, un de Menschen sajen dän dachäwa: Wua es dien Gott? #Psa 79,10 5Wan ekj mien Hoat en mie selfst utschedd, denkj ekj doaraun woo froo un dankent ekj veropp jinkj, met väle aundre toop, em Gotteshus Heljedoag to fieren. #Psa 27,4 6Wuarom best du soo bedrekjt, oo miene Seel? Wuarom soo orruich en mie? Velot die opp Gott! Wiels ekj woa am noch danken, mien Heilant un mien Gott. #Psa 116,7

7Miene Seel en mie es doljedrekjt. Doawäajen denkj ekj noch aun die von don aus wie aum Jordan wieren, aun dän huagen Hermon, opp dän kjlienen Boajch. 8Soo aus daut Jeruzh von de Wotafellen äwa mie kjeemen, soo komen diene toobende Walen nu äwa mie. 9De Har haft vesproaken äwadach met siene truhoatje Leew om mie to sennen. En de Nacht sinj un bäd ekj to am, dee Gott von däm mien Läwen kjemt. 10Ekj saj to Gott, mienen sechren Steengrunt: Wuarom hast du mie vejäten? Wuarom mott ekj truarich romgonen, wan miene Fiend mie unjadrekjen? #5Mo 32,4 11Waut miene Fiend mie toosaten, es soo aus wan mie de Knoakes em Kjarpa jebroaken woaren; dän dachäwa sajen see: Wua es dien Gott? 12Wuarom best du soo bedrekjt, oo miene Seel? Un wuarom soo orruich en mie? Velot die opp Gott! Wiels ekj woa am noch danken, mien Heilant un mien Gott.

Currently Selected:

Psalmen 42: PB

Highlight

Compare

Copy