Psalmen 135

135

Gott woat fa emma jeloft woaren

1Haleluja! Loft dän Harn. Loft dän Harn sien Nomen. Loft am, jie dän Harn siene Deena! 2Jie dee en dän Harn sien Hus deenen, em Hoff bie onsen Gott sien Hus. 3Loft dän Harn, wiels de Har es goot; loft sinjent sienen Nomen, wiels daut es scheen. 4Wiels de Har haft Jakob fa sikj jewält, Israel aus sien Ieejentum. #2Mo 19,5-6

5Ekj weet daut de Har groot es, un daut ons Har jrata es aus aule Jetta. #Psa 86,8 6De Har deit aules waut Hee well em Himmel uk opp de Ieed, em Mäa un aules waut doa unja noch deepa es. 7Hee lat von wiet auf Wolkjen oppkomen. Hee moakt dän Blitz toom Räajen un brinjt dän Wint ut siene Väarotskoma rut. #Jer 10,13 8Hee deed de Ieeschtjebuarne en Ägipten ombrinjen; beid von Menschen uk Vee. #2Mo 12,29 9Oo Ägipten, hee leet siene Tieekjens un Wunda mank junt komen, jäajen dän ägiptischen Kjennich un aul siene Deena. #Psa 78,42-52 10Hee brocht väl Velkja om, un muak jewaultje Kjennichs doot. #(10-12) 4Mo 21,21-35 11Sihon, de Amorita äa Kjennich, Og, Kjennich von Baschan, un aule Kjennichs von Kanaan. 12Hee jeef äa Launt no de Kjinja Israel aus äa Oafgoot, aus äa Oafgoot jeef hee an daut. #Jos 12,1-6

13Dien Nomen, oo Har, blift eewich! Har, von die woat emma aus Gott jerät woaren. #Psa 102,13 14De Har woat sien Volkj to äa rajcht vehalpen, un äwa sienen Kjnajcht metliedent sennen. #5Mo 32,36

15De Velkja äare Jetta sent von Selwa un Golt, von Menschenhenj jemoakt. #(15-20) Psa 115,4-11 16Dee haben Miela, oba kjennen nich räden, Uagen, oba kjennen nich seenen. 17Dee haben Uaren, oba kjennen nich hieren; dee haben uk Miela, oba kjennen nich odmen 18Wäa dee moakt, woat soo sennen aus dee, un soo uk aul dee, dee sikj opp an veloten.

19Oo jie von Israel, loft dän Harn! Oo jie von Aaron, loft dän Harn! 20Oo jie von Levi, loft dän Harn! Jie, dee däm Harn ferchten, loft dän Harn! 21Loft dän Harn von Zion, dän, dee en Jerusalem wont. Haleluja!

Currently Selected:

Psalmen 135: PB

Highlight

Compare

Copy