Spricha 31
31
Rotschläaj fa eenen Kjennich
1Dit sent Kjennich Lemuel siene wichtje Wieed, dee siene Mutta am lieed. #Spr 30,1
2Du mien Sän, mien Sän von mienem Lief,
mien jewenschta Sän.
3Vebruck diene Krauft nich aun Frues,
un go nich dee Wäaj, dee Kjennichs en de Grunt brinjen. #5Mo 17,17; 1Kjen 11,1.4
4Lemuel, daut es nich fa Kjennichs;
Wien drinkjen es nich fa Kjennichs,
un stoakjet saul een Aunjestalda nich emol drinkjen wellen, #Spr 20,1
5daut dee nich drinkjen un vejäten waut daut Jesaz lieet,
un dan de bedrekjte Menschen nich mea rajcht rechten.
6Jeff dee, dee aum omkomen sent, daut stoakje to drinkjen,
un jeff de truarende Seelen dän Wien.
7Lot dee drinkjen, daut see äare Oamoot vejäten,
un nich mea aun äa Ojjlekj denkjen.
8Räd fa dee, dee nich fa sikj selfst räden kjennen;
räd fa aul dee, dee eensom un veloten sent;
halp dee, daut see rajcht jerecht woaren. #Hiob 29,12
9Moak dien Mul op un sto doafäa en
daut de oame un Halploose rajcht jerecht woaren.
Eene Fru, dee to lowen es
10Wäa eene goode Fru jefungen haft,
haft waut, waut väl mea wieet es aus diere Steena. #Spr 18,22
11Äa Maun sien Hoat kaun sikj ruich opp ar veloten.
See woat daut aun nuscht fälen loten.
12See deit am goodet un nuscht schlajchtet soo lang aus see läft.
13See sieekjt Woll un Flaus un oabeit wellich met äare Henj.
14Soo aus een Haundelsmaun sien Schepp,
brinjt see äare Noarunk von wiet auf.
15See steit zemorjes tiedich bie diesta opp,
un vesorcht de äaje met Äten,
un haft uk fa äare Husoabeida to äten.
16See besitt sikj een Flekj Launt un kjaft daut,
un met daut waut see sikj toopjeoabeit haft, plaunt see eenen Wiengoaden.
17See moakt sikj reed to oabeiden.
18See sitt daut äa Haundel goot enbrinjt,
un äa Licht jeit uk de Nacht nich ut.
19See strakjt eene Haunt ut nom Spenstock
un äare aundre Haunt helt daut Spoolkje.
20See moakt äare Henj op un jeft de oame,
see strakjt äare Henj no dee, dee Help fält.
21Wan de Schnee kjemt, steit ar nich Forcht ut fa de äaje;
dee haben aula scheene Kjleeda auntotrakjen.
22See moakt Dakjen fa sikj selfst;
äare Kjleeda sent von feinet Lienzeich un wolnet bleiwroodet Zeich.
23Äa Maun es em Stautsrot goot aunjeseenen,
wan hee met de Leidasch em Launt toop sett,
wua de Volkjs un Laundes Berodungen beschloten woaren.
24See moakt Lienzeich Kjleeda un vekjaft dee,
un moakt fa äare Haundelslied Gorts toom ombinjen.
25See es met Krauft un Iea jekjleet,
see es nich om dän morjeschen Dach beduat.
26See moakt äa Mul weislich op,
un kaun truhoatich un leeftolich belieren.
27See woakt äwa aulem em Hus, un sitt waut doa väajeit;
see at nich een Fulenza Broot.
28Äare Kjinja stonen opp un säajnen ar,
un soo uk äa Maun; hee loft ar.
29“Väle Frues haben goot jedonen,
oba du steist äwa an aula,” sajcht äa Maun.
30Schmock loten es nuscht un daut straume vejeit,
oba eene Fru, dee dän Harn fercht, saul jeloft woaren. #Spr 11,22
31Jäft ar dän Loon dän see vedeent haft,
un lot äare ieejne Woakjen ar bie de Menschen lowen.
Currently Selected:
Spricha 31: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
