Spricha 30
30
Agur siene Wieed
1Dit sent däm Agur, Jake von Massa sienen Sän, siene wichtje Räden vom Harn.
Gott, ekj hab mie bemieecht;
ekj hab mie sea bemieecht,
oba ekj mott daut tochloten. #1Mo 25,12.14
2Ekj sie eena dee daut nich bejriepen kaun;
Menschenvestaunt hab ekj nich.
3Ekj hab nich jelieet weis to sennen;
ekj hab nich kunt dän Heiljen kjanen lieren.
4Wäa es nopp jefoaren nom Himmel un dan trigj jekomen?
Wäa haft dän Wint en siene Haunt nenn jenomen?
Wäa haft sikj de Wotasch em Schalduak enjebungen?
Wäa haft de Welt Enja faustjestalt?
Waut es sien Nomen, un woo heet sien Sän?
Saj mie, wan du daut weetst. #Hiob 38,28-34
5Aul Gott siene Wieed sent fälaloose;
hee es een Schilt fa aul dee, dee sikj opp am veloten. #Psa 12,7
6Doo nuscht bie Gott siene Wieed biesaten,
daut hee die nich vemont un aus Lieeja stampelt. #5Mo 4,2
7Om tweealei bedd ekj die, Har,
un jeff mie dee ea ekj stoaw.
8Hool Faulschheit un Läajes wiet auf von mie;
un moak mie nich oam uk nich rikj,
oba jeff mie bloos aule Dach mien Broot. #1Tim 6,6-8
9Wan ekj too väl haud, kunn ekj die aufsajen,
un sajen: Wäa es de Har?
ooda wan ekj too oam wort, kunn ekj stälen,
un doaderch dän Harn veonieren. #2Mo 5,2
10Doo eenen Kjnajcht nich bie sienem Harn vekloagen,
daut hee nich eenen Fluch opp die lajcht un du de Schult droagen motst.
11Doa sent soone dee äare Vodasch flieekjen,
un äare Mitta nich säajnen.
12Doa sent uk dee, dee en äare ieejne Uagen rein sent,
un sent oba nich von äaren Drakj jewoschen. #Spr 20,9
13Doa sent dee, dee emma huach äwakjikjen
un aules veachten waut see seenen.
14Doa sent uk dee, dee Tänen haben soo aus Schwieed un Massasch,
un doamet de aufhengje un oame em Launt ombrinjen.
Zolenspricha un aundre Rotschläaj
15De Blootworm haft twee Dajchta, dee schrieen: “Jeff! Jeff!”
un doa sent dree Dinja dee niemols tofräd sent,
nä, vea dee niemols sajen: “Daut es jenuach.”
16Daut Grauf;
eene Fru onen Kjinja;
Launt daut niemols wotasaut woat;
un Fia daut niemols sajcht: “Jenuach!”
17Wan een Kjint dän Voda vespott un de Mutta äa Wuat veacht,
woaren de Kraujen däm de Uagen utspekjen,
un de Oshakasch aun de Läacht woaren däm oppfräten. #Spr 20,20
18Doa sent dree Dinja dee fa mie too wundaboa sent;
nä, vea kaun ekj nich vestonen:
19Woo een Odla en de Loft flicht;
woo eene Schlang opp dän Steen kjript;
woo een Schepp medden opp daut Mäa foat;
un woo een Jung un eene Mejal sikj toopfinjen.
20Dit es eene ehebräakjarische Fru äaren Wajch:
See at un wescht sikj daut Mul
un sajcht: Ekj hab nuscht schlajchtet jedonen.
21De Ieed woat derch dreeatlei orruich,
nä, vea kaun see nich vedroagen:
22Wan een Kjnajcht Kjennich woat;
wan een Noa sikj saut jejäten haft; #Liera 10,6-7
23wan eene Fru sikj met eenen Maun befriet, dee ar nich goot es;
un wan eene Deenstfru äare Wieetsche äaren Plauz nemt. #5Mo 24,1-4
24Vea sent kjlien opp de Ieed, oba butajeweenlich kluak:
25de Eemskje sent mau schwak, oba dee schaufen sikj em Somma äa Äten toop; #Spr 6,6-8
26de Kanienkjes sent mau schwak, oba dee buen sikj äa Hus em Steen;
27de Graushoppa haben kjeenen Kjennich, un doch flieejen dee no äare Ordnunk;
28un de Äajdakjs jeit en de Haunt to nämen,
un doch es see em Kjennich sienen Paulaust.
29Dreeatlei haben eenen väanämen Gank,
nä, vea haben eenen stolten Schrett:
30de Leiw, jewaultich mank de Tieren, dee fa nuscht trigj jeit;
31de Winthunt;
de Kosenbock;
un een Kjennich dee siene Armee om sikj haft.
32Wan du best een Noa jewast, doamet daut du die selfst huach jestalt hast,
ooda wan du beeset jeplont hast, dan hool die de Haunt äwa daut Mul un sie stell.
33Soo aus eena kaun Schmaunt schliesren, daut et Botta jeft,
un de Näs too sea schnuwen, daut dee blat,
soo deit Oaja aunreizen, Striedarie brinjen.
Currently Selected:
Spricha 30: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
