Matäus 17

Dree Jinja seenen Jesus en Harlichkjeit vewaundelt

(Mrk 9,2-10; Luk 9,28-36)

1No sas Doag neem Jesus Petrus, Jakobus un Jakobus sienen Brooda Johanes met sikj opp een huagen Boajch nopp, wua see auleen wieren. #Mat 26,37; Mrk 5,37; 13,3; 14,33; Luk 8,51 2Un hee wort ver an vewaundelt, un sien Jesecht jlenzt aus de Sonnenschien, un siene Kjleeda worden witt aus daut Licht. #(2 un 5) 2Pet 1,16-18; Opb 1,16 3Un dan sagen see opp eemol Moses un Elia met Jesus räden. 4Dan säd Petrus to Jesus: Har, daut es goot daut wie hia sent. Wan die daut soo rajcht es, dan woa ekj hia dree Booden buen, eene fa die, eene fa Moses un eene fa Elia. 5Oba aus hee noch räd, kjeem eene dache Wolkj äwa an. Un horcht, von en de Wolkj säd eene Stemm: Dit es mien leewa Sän, met däm ekj sea tofräd sie. Horcht no am! #Mat 3,17 6Aus de Jinja daut hieeden, follen see dol met daut Jesecht opp de Ieed un ferchten sikj sea. 7Un Jesus jinkj han un foot an aun un säd: Stot mau opp un enjst junt nich! 8Un aus see oppkjikjten, sagen see sest kjeenem aus Jesus. 9Aus see vom Boajch rauf kjeemen, befool Jesus siene Jinja, daut kjeenem to sajen, waut see opp däm Boajch jeseenen hauden, bat de Menschensän wudd vom Doot oppjestonen sennen. #Mat 16,20

Elia un Johanes, de Deepa

(Mrk 9,11-13)

10Dan fruagen de Jinja am: Wuarom sajen de Schreftjelieede dan, daut Elia ieescht komen mott? #Mat 11,14 11Jesus auntwuad un säd to an: Daut es soo daut Elia ieescht komen mott un aules trajchtstalen. 12Oba ekj saj junt: Elia es aul hia jewast, bloos see haben am nich aunerkjant un deeden met am krakjt waut see wullen. Un de Menschensän woat jrod soo derch an lieden motten. #Mat 14,9-10 13Dan vestunden de Jinja, daut hee von Johanes dän Deepa räd. #Luk 1,17

De Mangel aun Gloowen

(Mrk 9,14-29; Luk 9,37-43a)

14Un aus see trigj nom Volkj kjeemen, kjeem een Maun no am, kjneed sikj ver am un säd: 15Har, hab Metleet met mienen Sän! Dee haft sea unja Aunstoot to lieden. Hee felt foaken em Fia un foaken em Wota. 16Un ekj brocht am no diene Jinja, oba dee kunnen am nich jesunt moaken. 17Dan säd Jesus: Jie vedreide Jennerazion, daut jie nich Gloowen haben! Woo lang saul ekj noch bie junt bliewen? Woo lang saul ekj mie noch met junt aufjäwen? Brinjt am eemol häa! 18Dan räd Jesus iernstlich to am, un de Soton veleet, un de Jung wia von dee Stund aun jesunt. 19Dan kjeemen de Jinja no Jesus aus see auleen wieren un säden: Wuarom kunn wie dän nich utdriewen? #Mat 10,1 20Hee säd to an: Wiels jun Gloowen soo kjlien wia. Jleeft mie: Wan jie eenen Gloowen hauden soo groot aus een Sampkuarn, wudd jie to disen Boajch sajen: Stal die dort han! un dee wudd sikj dort hanstalen, un junt wudd nuscht ommäajlich sennen. #Mat 21,21; Luk 17,6; 1Kor 13,2 21(Emmahan, soowaut aus dit es bloos derch Fausten un Bäden rut to driewen.) #17,21 Eenje oole Schreften haben disen Varsch nich.

Jesus rät toom tweeden Mol von sienem Doot

(Mrk 9,30-32; Luk 9,43-45)

22Aus see en Galiläa bleewen, säd Jesus to an: De Menschensän woat de Menschen en de Henj jejäft woaren. #(22 un 23) Mat 16,21; 20,18-19 23Dee woaren am dootmoaken, un om dree Doag woat hee vom Doot oppstonen. Doaräwa wieren siene Jinja sea truarich.

Wäa tolt Tempeltaks

24Aus see no Kapernaum kjeemen, kjeemen de Tempeltaks Kollakjta no Petrus un säden: Betolt jun Liera nich dän Tempeltaks? #2Mo 30,13; 2Kjen 12,5-6 25Hee säd: Jo. Un aus hee no Hus kjeem, ea hee waut sajen kunn, fruach Jesus am: Waut denkjst du, Simon? Von wäm kollakjten de Kjennichs opp de Ieed äaren Taks, von äare Birja ooda von de framde? 26Un aus hee säd: Von de framde, säd Jesus to am: Dan sent de Birja frie. 27Oba, om daut see sikj äwa ons nich oajren, go nom Mäa un schmiet diene Angel nenn, un dän ieeschten Fesch dän du rut trakjst, dän nemm. Un wan du däm daut Mul opmoakst, woascht du een Jeltstekj doa bennen finjen; daut nemm un betol dän Tempeltaks fa mie un fa die.

Currently Selected:

Matäus 17: PB

Highlight

Copy