Hiob 13
13
Hiob mucht sikj met Gott derchräden
1Jleeft mie daut, ekj hab daut aula selfst uk jeseenen,
ekj hab daut aula jehieet un vesto daut.
2Soo väl aus jie weeten, weet ekj uk,
daut es nich weinja met mie aus met junt.
3Ekj mucht met däm räden, dee aule Macht haft,
un met Gott mucht ekj mie derchholen.
4Jie moaken mie aula waut väa,
aus wan waut met Kaulkj beschmäat woat;
jie sent Doktasch dän äa Rot kjeenem waut halpt.
5Wan jie bloos wieren stell jebläwen,
dan wia jie kluak jewast. #Spr 17,28
6Horcht emol, woo ekj mie daut trajcht laj,
un paust goot opp no waut ekj saj.
7Meen jie, jie kjennen Gott veteidjen,
met daut, waut nich soo es un veleiden deit?
8Woa jie siene Sied nämen,
un fa Gott räden un fa am enstonen?
9Woat junt daut goot utkomen, wan hee junt unjasieekjt?
kjenn jie am hinjat Licht fieren,
soo aus eena dän aundren Mensch deit?
10Hee woat junt secha beschuljen,
wan jie em stellen Sieden nämen.
11Wudd siene Pracht junt nich enjsten,
wudd jie junt nich fa am ferchten?
12Waut junt jelieet es, daut jie sajen sellen,
halpt soo väl aus Ausch;
waut jie väabrinjen es een Klompen Ieed.
13Siet emol stell, un lot mie waut sajen,
lot met mie passieren, waut doa dan passieet.
14Waut kaun ekj doonen?
Ekj jäw mie en Läwensjefoa
un sat mien Läwen opp Spell.
15Kjikjt doch, hee woat mie ombrinjen,
ekj kaun mie daut nich aundasch väastalen;
ekj woa krakjt ver am sajen, waut ekj väatolajen hab.
16Ekj mott ver am komen, daut ekj kaun jerat woaren;
kjeen gottloosa kaun ver am komen.
17Paust goot opp no daut, waut ekj saj,
un horcht no daut, waut ekj väabrinj.
18Ekj sie gaunz reed met daut, waut ekj sajen woa,
un ekj weet, daut ekj jerajcht jehoolen woa.
19Es doa wua eena, dee mie doavon aufräden woat?
Dan must ekj stell sennen un oppjäwen.
20Ekj froag bloos no twee Dinja,
dan woa ekj mie nich ver die vestäakjen:
21Nemm diene Haunt wajch von äwa mie,
un enjst mie nich mea met dien Schrakjen. #Hiob 9,34
22Dan roop mie, un ekj woa auntwuaten,
ooda lot mie räden, un du mie auntwuaten.
23Waut hab ekj veschulcht? Waut deed ekj orrajcht?
Lot mie weeten wua ekj too wiet jegonen sie,
ooda wua ekj jesindicht hab.
24Wuarom latst du die nich seenen,
un deist, aus wan ekj dien Fient sie? #Hiob 19,11
25Woascht du soon vepitschtet Blaut aus mie enjsten,
ooda soonen drieejen Haulm nostonen?
26Wuarom latst du dit betre äwa mie komen,
un drajchst mie de Sinden von miene Jugent no? #Psa 25,7
27Du kjlamst miene Been en eenen Klotz,
un kjikjst no aules waut ekj doo;
un sitst de Spoaren von miene Feet aula no.
28Eena vekjemt aus een vefuldet Stekj Holt,
un soo aus een mottenfrosjet Kjleet.
Currently Selected:
Hiob 13: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
