Jeremia 38
38
Jeremia woat en eene Zista jestopt
1Schefatja, Matan sien Sän, un Gedalja, Paschhur sien Sän, un Juchal, Schelemja sien Sän, un Paschhur, Malkija sien Sän hieeden daut Jeremia to daut gaunze Volkj jesajcht haud: #Jer 21,1 2Dit es waut de Har sajcht: Wäa en dise Staut blift, dee woat vom Schwieet un Hunga un Krankheit stoawen motten, un dee waut rutgonen no de Chaldäa, woaren met daut Läwen doavon komen aus een Schauz, daut em Kjrich veschoont blift. #Jer 21,9 3De Har sajcht, daut dise Staut woat bestemt enne Macht von däm babelonischen Kjennich komen, un dee woat dee ennämen. 4Dan säden de Rejierungsmana to däm Kjennich: Du sust disen Maun aufschaufen, wiels, met daut, waut hee sajcht, moakt hee dee Soldoten, dee ons noch jebläwen sent, oppjäwrich, un uk daut gaunze Volkj. Dis Mensch prooft nich daut Volkj to halpen, hee brinjt daut bloos Schoden. #Amos 7,10 5Un de Kjennich Zedekia säd: Nämt am un doot waut jie wellen. De Kjennich kaun junt von nuscht opphoolen. 6Dan neemen see Jeremia un leeten am met Strenj en eene Zista nenn, opp däm Hoff von de Wajchta. De Zista jehieed däm Kjennich sien Sän Malkija. Doa wia kjeen Wota en de Zista oba Blott, un Jeremia sunk en dän Blott nenn.
7Em Paulaust hieed Ebed Melech, dee von Kusch en Afrika kjeem, un een jeschnädna Deena vom Kjennich wia, daut see Jeremia en eene Zista jeschmäten hauden. De Kjennich saut don jrod bie daut Benjamin Puat. #Jer 39,15-18 8Un Ebed Melech jinkj vom Paulaust nom Kjennich un säd to am: 9Mien Har un Kjennich, daut es nich rajcht, waut dise Mana Jeremia aunjedonen haben. See haben am en eene Zista jeschmäten, wua hee vehungren un stoawen woat, wiels doa nich mea Broot enne Staut es. 10Un de Kjennich säd to Ebed Melech, dee von Kusch kjeem: Nemm die dree Mana met un häw dän Profeet Jeremia ut de Zista rut, ea dee stoaft. 11Un Ebed Melech jinkj met de Mana no eene Stow em Paulaust, wua Sachen oppbewoat wieren, un hold waut Kodren, un dan leeten see dee met eenen Strank en de Zista nenn, no Jeremia. 12Un Ebed Melech, dee von Kusch kjeem, säd Jeremia hee sull sikj de Kodren unjare Oarms doonen, wua de Strenj kjeemen. Un Jeremia deed daut. 13Un see trocken Jeremia met de Strenj ut de Zista rut. Un Jeremia kunn oppem Hoff von de Wajchta bliewen.
De Kjennich rät met Jeremia
14Noch een aundret mol, leet de Kjennich Zedekia Jeremia no am komen. See troffen sikj biem dredden Engank vom Tempel. Un de Kjennich säd to Jeremia: Ekj well waut von die weeten. Du saust nuscht trigjhoolen. 15Un Jeremia säd to Zedekia: Wan ekj waut säd, wurscht du mie nich ombrinjen? Wan ekj die Rot jäw, horchst du doa nich no. 16Un doa unja vea Uagen, vespruak de Kjennich Zedekia Jeremia: Soo kloa aus de Har läft, dee ons daut Läwen jejäft haft, woa ekj die nich loten ombrinjen, un ekj woa die uk nich dee Mana enne Macht jäwen, dee die ombrinjen wellen. #Jer 38,5 17Un Jeremia säd to Zedekia: Dit es waut de Har, dee aules rejieet, un Israel äa Gott es, sajcht: Wan du woascht rutgonen no de bowaschte von däm Kjennich von Babel, dan woascht du aum Läwen bliewen, un dise Staut woat nich vebrent woaren. Dan woaren du un diene Menschen aum Läwen bliewen. 18Oba wan du die nich ver de bowaschte von däm Kjennich von Babel oppjefst, dan woat dise Staut en de Chaldäa äare Macht jejäft woaren, un see woaren dee dolbrennen. Un du woascht selfst nich von an wajchkomen. 19De Kjennich säd to Jeremia: Ekj sie besorcht daut ekj woa enne Macht von de Menschen von Juda jejäft woaren, dee no de Chaldäa äwajegonen sent, un daut dee mie kjwälen woaren. 20Un Jeremia säd: Du woascht nich en dee äare Henj jejäft woaren. Wan du daut deist, waut de Har sajcht, soo aus ekj die daut saj, dan woat die daut goot utkomen, un du woascht aum Läwen bliewen. 21Oba wan du nich rutjeist, dan es dit waut de Har mie jesajcht haft: 22Horch emol, dan woaren aule Frues, dee noch en dien Paulaust sent, faustjenomen woaren von de bowaschte Mana von däm babelonischen Kjennich, un de Frues woaren sajen:
Diene goode Frind haben die väajeloagen
un die em Bosch jeleit;
nu daut du met diene Feet em Blott jesunken best,
gonen see dän aundren Wajch.
23De Chaldäa woaren aul diene Frues un Kjinja faustnämen, un du selfst woascht nich wajchkomen von an. Du woascht von dän babelonischen Kjennich faustjenomen woaren. Un de Staut woat doljebrent woaren. #Jer 32,4; 34,3
24Un Zedekia säd to Jeremia: Lot kjeenem weeten waut du mie jesajcht hast, un dan woat die kjeena waut aundoonen. 25Un wan de Rejierungsmana doahinja komen, daut ekj met die toopjewast sie, woaren see weeten wellen, waut du met däm Kjennich jerät hast. Dee woaren froagen, waut wie jesajcht haben un vespräakjen daut see die nich ombrinjen, wan du an aules sajchst waut wie säden. 26Oba saj an bloos, du hast däm Kjennich jeprachat, daut hee die nich wada wudd en Jonatan sien Hus nämen loten, wiels doa wurscht du stoawen. 27Dan kjeemen aul de Rejierungsmana no Jeremia un fruagen am ut, un hee säd an, waut de Kjennich am jesajcht haud, daut hee sajen sull. Un aus see nuscht ut am rut kjrieejen, leeten see am toch. 28Jeremia bleef opp däm Hoff von de Wajchta gaunz bat Jerusalem enjenomen wort. #Jer 37,21
Currently Selected:
Jeremia 38: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
