Jeremia 37
37
Jeremia rät uk wan daut jefäadlich fa am es
1De babelonischa Kjennich Nebukadnezar stald Zedekia, Josia sien Sän, aun aus Kjennich von Juda, enne Städ Jojachin, Jojakim sien Sän. #2Kjen 24,17 2Oba hee un siene Rejierungsmana un daut Volkj em Launt jehorchten nich waut de Har derch däm Profeet Jeremia jesajcht haud. 3De Kjennich Zedekia schekjt Juchal, Schelemja sien Sän, un däm Priesta Zefanja, Maaseja sien Sän, no däm Profeet Jeremia, daut see am fruagen, waut de Har, dee äa Gott wia, äwa an säd. #Jer 7,16; 42,2 4Dit wia ea Jeremia faustjenomen un enjestopt wort, un don jinkj Jeremia noch frie em Volkj rom. 5Dan schekjt emol de Kjennich von Ägipten siene Armee rut; un aus de Chaldäa, dee rom Jerusalem jeloagat wieren, doavon hieeden, trocken see sikj trigj von Jerusalem.
6Un Jeremia kjrieech dise Norecht von däm Harn: 7Dit es waut de Har, dee Israel äa Gott es, sajcht: Sajcht däm Kjennich von Juda, dee junt no mie jeschekjt haft dit to froagen: Horch emol, de Armee von däm ägiptischen Kjennich es junt entjäajen jekomen, daut dee junt halpen, oba dee woaren wada trigj no Hus gonen, 8un de Chaldäa woaren wada komen un rom dise Staut äa Loaga saten, un see woaren de Staut ennämen un dolbrennen. #Jer 34,22 9De Har sajcht: Treest junt nich met dän Jedanken, daut de Chaldäa wajchjegonen sent. Dee woaren nich wajchbliewen. 10Un wan jie uk de gaunze chaldäische Armee, dee jäajen junt es, dolschlonen wudden, un doa mau weinich vewunde Soldoten bleewen, wudden dee doch een jiedra en sien Zelt oppstonen, un dise Staut dolbrennen.
11Aus de chaldäische Armee sikj von Jerusalem trigjtrock, wäajen de Armee von däm ägiptischen Kjennich, 12wull Jeremia emol ut Jerusalem rut, no daut Launt Benjamin gonen, daut hee sien Oafgoot von sien Frintschoft kjrieech. #Jer 32,8-9 13Bie daut Benjamin Puat, wia don jrod een Wajchta, Jirija, Schelemja sien Sän un Hananja sien Grootsän. Un de Wajchta hilt Jeremia opp un säd: Du west woll äwa gonen no de Chaldäa. 14Un Jeremia säd: Nä, ekj well nich no de Chaldäa äwagonen. Oba Jirija haud kjeene Uaren fa waut Jeremia säd, un neem am faust un brocht am no de Rejierungsmana. 15Un de Beaumte worden fuchtich äwa Jeremia un leeten am schlonen, un hilden am faust en dän Schriewa Jonatan sien Hus, woont see to een Jefenkjnis jemoakt hauden. #Jer 20,2 16Opp dän Wajch kjeem Jeremia en een Loch unja daut Hus, wua hee lang bliewen must.
17De Kjennich Zedekia schekjt emol un leet Jeremia no am komen, daut hee am gaunz stell en sien Hus waut froagen kunn. De Kjennich fruach: Es doa een Wuat vom Harn? Un Jeremia säd: Jo. Du woascht däm babelonischen Kjennich enne Macht jejäft woaren. #Jer 34,21 18Un Jeremia fruach däm Kjennich Zedekia: Waut hab ekj jäajen die un diene Rejierungsmana, ooda jäajen daut Volkj jedonen, daut ekj mott em Jefenkjnis bliewen? 19Waut hab jie met aul dee Profeeten jedonen, dee säden, daut de babelonischa Kjennich wudd nienich en dit Launt nenn komen? 20Un Jeremia prachad am, daut hee nich wada wudd en däm Schriewa Jonatan sien Hus nenjebrocht woaren un doa stoawen. 21Un de Kjennich Zedekia bestald, daut Jeremia sull oppem Hoff bie de Wajchta bliewen, un daut hee aule Dach sull en Broot von de Bakja Gaus kjrieen, bat doa nich mea Broot enne Staut wia. Un von don aun bleef Jeremia oppem Hoff bie de Wajchta. #Jer 32,2
Currently Selected:
Jeremia 37: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
