Jeremia 30
30
Jeremia sien Troostbuakje
(30,1—31,40)
1Dit es eene Norecht, dee Jeremia von däm Harn kjrieech: 2Dit es waut de Har, dee Israel äa Gott es, sajcht: Schriew die aul daut waut ekj die jesajcht hab dol, en een Buak. 3Doa woat eene Tiet komen, sajcht de Har, dan woa ekj mien Volkj, beid Israel un Juda, daut loten bäta gonen; un ekj woa an trigj no daut Launt brinjen, woont ekj äare Elren jeef, daut see doa wonen kunnen. #Jer 29,14
4Dit es waut de Har to Israel un Juda sajcht:
5Dit es waut de Har sajcht: (Jie sajen:)
Wie hieren wäm ut Angst schrieen;
de Lied sent en Forcht un haben nich Fräd.
6Unjasieekjt emol neiw,
auf een Maun kaun een Kjint to Welt brinjen.
Ooda wuarom hoolen jane Mana äare Henj oppe Hoften
aus Frues dee en Weedoag sent?
Un wuarom sent äare Jesechta
aula soo blaus?
7Daut es een schlemma Dach,
soona aus nich ea jewast es,
eene furchtboare Tiet fa Jakob,
doch hee woat doa rut jeholpen woaren. #Joel 2,11; Zef 1,14-15
8Wan dee Dach kjemt, sajcht de Har, dee aules rejieet, woa ekj daut Joch von opp äa Jenekj tweibräakjen, un daut Säl, woont an oppjelajcht es, tweirieten. Dan woaren see nich mea Deena fa framde sennen, #(8 un 9) Jer 23,5; 27,12; Hes 34,23; Hos 3,5 9oba see woaren däm Harn, dee äa Gott es, deenen, un David, däm ekj aus Kjennich aunstalen woa.
10Un nu, Jakob, mien Kjnajcht,
hab nich angst, sajcht de Har;
Israel, sie nich mea doljeschloagen.
Horch emol, ekj woa die raden
von de Lenda, waut soo wiet auf sent,
un diene Nokomen von doa,
wua see faustjenomen sent.
Jakob woat trigjkomen
en Fräd un Jeborjenheit,
un kjeena woat an enjsten. #Jes 43,5-6; Jer 46,27
11Ekj woa met die sennen,
sajcht de Har, daut ekj die raden kaun;
Ekj woa een Enj moaken met de Lenda,
en woone ekj die vestreit haud;
oba met die woa ekj nich een Enj moaken.
Ekj woa die strofen aus rajcht es,
un woa die nich onbelieet loten. #5Mo 8,5; Jer 10,24
12Dit es waut de Har sajcht:
Diene Wunden woaren nich veheelen,
dien Schoden woat nich wajchgonen. #Jer 15,18
13Kjeena steit die bie, daut du kaust Help kjrieen;
doa es kjeen Rot, kjeen Heelmeddel, fa die.
14Dee woone du goot wieescht,
haben die aula vejäten,
un froagen nich no die.
Ekj hab die onen Schomp aunjejräpen
un jeschloagen aus een Fient daut wudd,
wäajen aules, waut du schuldich best,
un aul de Sinden, dee du jedonen hast.
15Wuarom hielst du äwa diene Wunden,
un daut de Schoden nich heelen woat?
Ekj hab dit jedonen,
wäajen aules, waut du schuldich best,
un aul de Sinden, dee du jedonen hast.
16Oba doch woaren dee,
waut die vefreeten, vefräten woaren,
dee, dee die fientlich wieren, faustjenomen un wajchjefieet woaren,
dee, dee die bestoolen, bestolen woaren,
un dee, dee die beplindaden, beplindat woaren. #Jes 33,1; Hes 39,10
17Ekj woa die jesunt moaken,
un diene Wunden heelen, sajcht de Har.
Wiels see die, “De vestade”, nanden,
un, “Zion, om dee kjeena waut romjeft”, #Jes 57,18-19; Jer 33,6
18sajcht de Har nu:
Ekj woa mien Volkj wada en äa Launt oppbuen,
un woa an en äa Tus jenstich sennen;
de Staut woat wada opp sienen Boajch jebut woaren,
un de dikje Mia, soo aus sikj daut jehieet.
19Daut woat to hieren sennen,
woo dankboa un loosjeloten dee sent;
ekj woa an toonämen loten, un nich weinja woaren;
ekj woa an aunjeseenen moaken, un nich veacht.
20Doa woaren junge Mana sennen aus ieeschtemma,
see woaren opp eenen fausten Grunt ver mie stonen;
ekj woa aul dee bestrofen, dee an daut schwoa moaken.
21Äa Leida woat eena von äare sennen,
dee waut an rejieet, woat von äa Volkj sennen.
Ekj woa am dicht aun mie brinjen,
soo daut hee no mie komen woat.
Ooda wäa wudd sikj noch hanjäwen,
daut hee sikj no mie kjieren woat?
sajcht de Har. #Jer 30,9
22Un jie woaren mien Volkj sennen,
un ekj woa jun Gott sennen. #Jer 7,23
23Paust opp, de Har haft een Owwada jeschekjt,
eenen dollen Kjrieselstorm;
daut woat de beese plazlich
oppem Kopp komen. #(23 un 24) Jer 23,19-20
24De Har lat sienen hunjschen Oaja nich no,
bat hee derchfieet un foadich moakt,
daut waut hee em Senn haft.
Dee Tiet woat komen,
dan woa jie dit kloa vestonen.
Currently Selected:
Jeremia 30: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
