Jeremia 3
3
Israel un Juda haben nich dän Gloowen jehoolen
1De Har säd to mie: Wan een Maun sikj von siene Fru scheeden deit, un see dan eenen aundren Maun friet, doaf de ieeschta dan noch wada no ar gonen? Soont wudd daut Launt orrein moaken. Un nu hast du, Juda, met väle romjeschwient, un west noch trigj no mie, sajcht de Har. #5Mo 24,1-4
2Kjikj emol opp de kole Boaj un dan woascht du seenen,
wua hast du die nich aulawäajen hanjejäft?
Du setst aun de Kaunt Wajch aus een Reiba enne Wiltnis;
du moakst daut Launt äakjlich met romschwienen un sindjen. #Hos 4,13
3Daut es wuarom de ieeschte Räajen nich kjemt,
un wuarom de lota Räajen utblift.
Du best soo onveschämt aus eene Gaussenmumkje;
die schämt nuscht.
4Du hast noch jrod jeroopt: “Mien Voda,
wie sent ons emma goot jewast. #Jes 63,16; Jer 3,19; 31,9
5Woascht nu opp emma doll sennen,
un woat dien Oaja emma bliewen?”
Daut es waut du sajchst,
un deist oba aule Sinden waut du kaust.
6Un dan, en dee Tiet aus Josia Kjennich wia, säd de Har to mie: Hast du jeseenen waut dee onjehuarsome Israel deed? See jinkj opp jieda huagen Boaj, un unja jieda jreenen Boom, un dreef doa Schaund. #Jer 2,20 7Un ekj docht, wan see daut jedonen haft, woat see trigj no mie komen. Oba see kjeem nich trigj. Un äare Sesta, de veloagne Juda, sach daut. #(7-9) 2Kjen 17,18-19; Hes 23,2-11 8Un ekj paust opp. Ekj haud de onjehuarsome Israel eenen Scheedungsbreef jejäft, un haud ar wajchjeschekjt, wiels see Schaund jedräwen haud. Oba de veloagne Juda haft doa kjeene Lia von aufjenomen. Dee es uk wajchjegonen un haft Schaund jedräwen. 9Un met äa onveschämdet romschwienen haft see eene Schaund opp daut Launt jebrocht. De Lied deenen eenen Steen un een Stekj Holt, aus wan daut äa Gott es. 10Un no aul dit, kjeem de veloagne Juda nich met äa gaunzet Hoat trigj. See bleift mie bloos waut väa, sajcht de Har.
11Un de Har säd to mie: De onjehuarsome Israel haft sikj nich soo veschulcht aus de veloagne Juda. 12Go un stal die han, daut du nom Nuaden kjikjst, un saj:
Komm wada trigj, du onjehuarsome Israel,
sajcht de Har,
dan woa ekj nich met junt doll bliewen.
Ekj sie doch jenstich,
un woa mie nich opp emma oajren,
sajcht de Har. #2Mo 34,6
13Bekjan bloos waut du orrajcht jedonen hast,
un daut du jäajen dän Harn dienen Gott jegonen best,
daut du best opp de Wäaj von framde Jetta jegonen,
daut jie unja jieda jreenen Boom Jetta jedeent haben,
un nich sent jehuarsom jewast to waut ekj säd,
sajcht de Har.
Gott dinjt met Juda
14Komt trigj, jie onjehuarsome Kjinja,
jie jehieren mie, sajcht de Har.
Eenem von jieda Staut un twee von jieda Famielje,
woa ekj junt trigj no Zion brinjen. #Jes 6,13
15Un ekj woa junt Hoads jäwen
dee soon Hoat haben aus ekj hab;
dee woaren junt met Vestentnis
un met Weisheit besorjen. #Jes 44,28; Jer 23,3-4; Hes 34,23
16Un wan dee Tiet kjemt, un jie junt vemieet haben, un en daut Launt utjespreet haben, sajcht de Har, dan woa jie nich mea von däm Harn siene Bundeskjist räden. Jie woaren junt dee nich mea denkjen kjennen, un jie woaren doa nich no froagen. Junt woat dee nich fälen, un jie woaren nich noch eene moaken. #(16 un 17) 4Mo 10,33-36; 2Kjen 25,8-9; Heb 4,14-16 17Wan dee Tiet kjemt, woat Jerusalem “Däm Harn sien Troon” jenant woaren. Un aule Velkja woaren sikj doahan vesaumlen, om dän Harn en Jerusalem to ieren. Un dee woaren nich mea stekjsennich äaren ieejnen beesen Wajch gonen. #2Mo 17,16; Jes 2,2-4; Micha 4,2 18Wan dee Tiet kjemt, woaren Juda un Israel toop vom Nuaden häakomen en dit Launt nenn, woont ekj june Vodasch jeef, daut et junt sennen sull.
19Ekj haud mie väajenomen, die aus mienen Sän auntonämen, un die een scheenet Stekj Launt to jäwen. Daut sull daut baste Poat sennen von mank de Velkja. Un ekj docht, du wurscht mie dien “Voda” nanen, un wurscht nich opphieren mie tru to sennen. #5Mo 7,6; 8,7; 32,6; Jer 3,4 20Oba soo aus eene Fru, dee äaren Maun nich tru es, best du, Israel, mie nich tru jewast, sajcht de Har.
21Doa es eene Stemm oppe kole Boaj,
een jaumalichet hielen von de Israeliten,
wiels see eenen vekjieeden Wajch jinjen
un dän Harn äaren Gott vejäten haben. #Jer 3,2
22Komt trigj, jie onjehuarsome Kjinja.
Ekj woa junt heelen von junen onjehuarsomen Wajch.
Jie sajen: Wie komen trigj,
wiels du best de Har, dee ons Gott es.
23Waut opp de Humpels passieet,
un opp de Boaj väajeit,
kaun ons nich halpen.
De Help fa Israel
es auleen em Harn, dee ons Gott es.
24Von don, aus ons Volkj aunfunk,
haft de onveschämda Aufgott
daut wajchjefräten, waut onse Vodasch,
en Schop un Vee, un Säns un Dajchta,
toopjesaumelt hauden.
25Nu mott wie en onse Schaund ligjen,
un ons met Schaund bedakjen.
Wie haben jäajen däm Harn, dee ons Gott es,
jesindicht. Wie un onse Vodasch
sent von don, aus wie een Volkj worden,
onjehuarsom jewast to daut,
waut de Har, dee ons Gott es, jesajcht haft. #Jer 14,7.20
Currently Selected:
Jeremia 3: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.