Jeremia 11
11
Israel un Juda haben dän Bunt nich jehoolen
1Dit es de Norecht, dee Jeremia von däm Harn kjrieech: 2Horcht emol no disen Bunt, un sajcht de Lied en Juda un de Enwona en Jerusalem dän. 3Sajcht an: De Har, dee Israel äa Gott es, sajcht: Een Fluch saul opp dee komen, dee nich no de Väaschreften von disen Bunt horchen, #5Mo 27,26 4woonen ekj june Vodasch aun dän Dach jeef, aus ekj an ut Ägipten, dän jlieejenden Owen, rutbrocht. Ekj säd: Paust opp waut ekj saj, un doot aules waut ekj von junt velang. Dan woa jie mien Volkj sennen, un ekj woa jun Gott sennen. #Jer 7,23 5Dan woa ekj daut Vespräakjen hoolen, woont ekj june Vodasch opp eenen Eit jeef. Ekj säd, ekj wudd an een Launt jäwen, wua Malkj un Honnich ranen, soo aus jie daut vondoag haben. #2Mo 3,8
Un ekj säd: Har, mucht daut soo sennen.
6Un de Har säd to mie, daut ekj sull no de Städa en Juda, un oppe Gaussen en Jerusalem gonen, un sull to de Lied sajen: Horcht emol no waut de Bunt sajcht, un doot waut dee sajcht. 7Von dän Dach aun, aus ekj june Elren ut Ägipten brocht, hab ekj junt emma wada denkjen jeholpen un jesajcht, daut jie sullen horchen no daut waut ekj säd. #(7 un 8) Jer 25,4 8Oba jie horchten nich doano, un deeden nich waut ekj säd. Jie jinjen, een jiedra opp sienen ieejnen beesen Wajch. Doawäajen hab ekj daut nu bat opp daut latste utkomen loten, waut de Bunt säd, dän ekj junt oppjeef un jie nich hilden. #5Mo 28,15-68; Jer 3,17; 7,26; 13,10; 18,12
9Un de Har säd to mie: Doa es een Wadastaunt mank de Lied en Juda, un mank de Enwona en Jerusalem. 10See sent trigj jegonen, un doonen dee Sinden, woone äare Elren deeden, aus dee nich no mie horchten. See jinjen no framde Jetta un bäden dee aun. Nu haben beid, de Israeliten, un de Menschen von Juda, dän Bunt jebroaken, woonen ekj met äare Elren jemoakt haud. 11Un doawäajen sajcht de Har nu: Ekj woa eenen grooten Schoden loten opp junt komen, dän jie nich woaren ut däm Stich gonen kjennen. Un wan jie mie sullen fa Help roopen, woa ekj nich doano horchen. #Psa 18,42; Jes 1,15; Hes 8,18 12Un de Lied en de Städa en Juda, un de Enwona en Jerusalem, woaren gonen un de Jetta aunroopen, fa woone jie Ruakopfa jemoakt haben; oba dee woaren junt nich halpen kjennen jäajen dän Schoden. #(12 un 13) Jer 2,28; 5Mo 32,37-38 13Jie haben soo väl Jetta aus jie Städa en Juda haben, un doa sent soo väl Aultoaren en Jerusalem aus doa Gaussen sent. De Aultoaren, opp dee jie fa Baal Ruakopfa moaken, sent eene Schaund. 14Un du, Jeremia, froag no nuscht fa dit Volkj un bäd nich fa an, wiels ekj woa nich horchen, wan see mie wäajen äaren Trubbel aunroopen woaren. #Jer 7,16
15Ekj sie junt sea goot,
oba waut fa een Rajcht hab jie
en mien Tempel to komen,
wan jie soo väl Sinden begonen?
Kjennen feine Vespräakjen,
un daut Fleesch von de Opfa
june Strof aufwäaren?
Woo kjenn jie junt en dit freien? #Hos 8,13; Reema 11,28
16To eene Tiet säd de Har:
Jie sent een jesunda Oliewenboom,
dee goot lat un schmocke Frucht haft.
Oba nu woat hee doa een Fia unja saten,
un daut woat goot ruzhen,
un aul siene Asta woaren dolbräakjen.
17De Har, dee aules rejieet, dee die aunjeplaunt haft, haft Schoden vesproaken, wäajen daut beese, waut de Israeliten un de Lied un Juda jedonen haben. Dee haben mien Oaja jehoakt met äare Ruakopfa fa Baal.
De Plon jäajen Jeremia sien Läwen
18De Har leet mie weeten, waut see wullen, un hee wees mie, waut see deeden. 19Ekj jinkj en vetruen aus een Laum, daut rut jeleit woat toom schlachten, un wist nich waut see jäajen mie jeplont un jesajcht hauden.
Well wie dän Boom met de Frucht toop
dolhaken un daut Läwen vedoawen,
soo daut onse Menschen wiedahans
nich mea von am räden. #Jes 53,7
20 Har, dee du aules rejieescht,
dee du rajcht rechten deist,
un weetst aules waut de Menschen denkjen,
lot mie seenen, woo du met an veräakjenst.
Ekj äwajäw die dise miene gaunze Sach. #Psa 7,10; Jer 17,10; 20,12
21Doa wieren waut Mana en Anatot, dee Jeremia no sien Läwen stunden. Un dee säden, hee sull nich mea em Nomen vom Harn räden, wan see am nich ombrinjen sullen. Un de Har säd, wäajen dise Mana: #Jer 1,1 22Dit es waut de Har, dee aules rejieet, sajcht: Horch emol, ekj woa met an veräakjnen. Äare junge Mana woaren vom Schwieet omjebrocht woaren, un äare Säns un Dajchta woaren vehungren un stoawen. 23Doa woat kjeena von äare Menschen äwabliewen, en de Tiet wan ekj dän grooten Schoden opp Anatot brinjen woa.
Currently Selected:
Jeremia 11: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
