Rechta 3
3
De framde Velkja waut em Launt jebläwen sent
1Dit sent de Velkja waut de Har em Launt äwaleet, om de Israeliten derch an oppe Proow to stalen. #Rech 2,22 2Wiels see von däm Kjrich jäajen Kanaan aul nuscht wisten, wull hee an doamet uk kjamfen lieren. 3Dit wieren de Volkjsgruppen: De fief Volkjsleida von de Filista un aule Kanaanita, dee von Sidon un de Hiwita waut aun de Libanon Boaj wonden, von däm Boajch Baal Hermon aun bat aun Hamat. #Jos 13,3 4Dise bleewen, om de Israeliten auftoproowen. De Har wull seenen, auf see siene Jebooten jehorchen wudden, waut hee äare Vodasch derch Moses jejäft haud. 5De Israeliten wonden medden mank de Kanaanita, Hetita, Amorita, Perisita, Hiwita un Jebusita. 6See neemen dee äare Dajchta to Frues un jeewen de Junges von de Velkja äare Dajchta to Frues un deenden äare Jetta. #5Mo 7,3
De Rechta Otniel
7De Israeliten deeden, waut däm Harn schlajcht jefoll, un vegauten däm Harn, äaren Gott, un deenden de Kanaanita äare Jetta, dän Baal un de Aschera. 8Dan brend däm Harn sien Oaja äwa Israel opp, un hee jeef an en de Jewault von Kuschan Rischatajim, däm Kjennich von Mesopotamien. Acht Joa worden see von Kuschan Rischatajim unjadrekjt. 9Dan schrieejen de Israeliten nom Harn om Help, un de Har deed an eenen Rada beroopen: Otniel, Kenas sienen Sän, Kaleb sien jinjsta Brooda. #Rech 1,13; Jos 15,17-18 10Däm Harn sien Jeist kjeem opp am, un hee wort Rechta en Israel un jinkj toom Kaumf. Un de Har jeef Kuschan Rischatajim, dän Kjennich von Mesopotamien, en siene Jewault, soo daut hee däm Kjennich von Mesopotamien trigjschlonen kunn. #Rech 6,34 11Dan haud daut Launt 40 Joa Fräd. Un Otniel, Kenas sien Sän, storf.
Ehud rad Israel derch eene Lest
12Oba de Israeliten deeden wada, waut däm Harn schlajcht jefoll. Doawäajen leet de Har Eglon, dän Moabita Kjennich, äwa an Macht jewennen. 13Un Eglon stunt sikj toop met de Amonita un de Amalekita, un jinkj un besiejd de Israeliten un besad de Staut Jericho. #Rech 1,16 14Un de Israeliten deenden Eglon, däm Moabita Kjennich, 18 Joa. 15Dan schrieejen see nom Harn om Help, un de Har beroopt an eenen Rada: Ehud, Gera sienen Sän, ut däm Staum Benjamin. Hee wia linkjsch.
Un aus de Israeliten am doatoo bestemden, äare Aufgowen no däm Moabita Kjennich Eglon to brinjen, 16muak hee sikj een kortet, tweeschniedjet Schwieet un bunk sikj daut unja sien Kjleet aun siene rajchte Sied aun. 17Hee brocht Eglon, däm Moabita Kjennich, de Aufgowen. Eglon wia een sea fata Maun. 18Aus hee de Aufgowen aufjejäft haud, leet hee de Mana, waut dee doahan jedroacht hauden, trigjgonen. 19Hee selfst wonk om bie Gilgal bie de jeschnizte Steena un jinkj trigj no Eglon un leet am sajen: Ekj hab eene jeheeme Norecht fa die! Un Eglon säd to siene Deena: Got rut! Dan jinjen dee aula rut. 20Un Ehud kjeem nenn no am. Hee oba saut en de kjeele Bowastow, waut fa am auleen bestemt wia. Ehud säd to am: Ekj hab fa die eene Norecht von Gott. Un hee stunt von sienem Stool opp. 21Ehud oba foot met de linkje Haunt no daut Schwieet opp siene rajchte Sied un spekjt am daut em Buck nenn. #2Sam 20,9-10 22Daut gaunze Schwieet, un soogoa uk noch de Jräp, veschwungen en sienem Buck, un sien Fat bedakjt daut Schwieet, wiels hee daut nich ut sienem Buck rutjetrocken haud. 23Ehud oba jinkj derch de näakjste Stow rut. De Däaren to de Bowastow haud hee toojemoakt un veräajelt.
24Aus hee dan rut jegonen wia, kjeemen däm Kjennich siene Deena un sagen, daut de Däa veschloten wia, un säden: Hee es veleicht em Stofkje opp siene Jeschaften jegonen. 25Aus see ieescht lang jewacht hauden un kjeena de Däa von de Bowastow opmuak, neemen see dän Schlätel un schlooten op. Un dan lach äa Har doa doot oppe Flua. 26Ehud oba haud sikj en dee Tiet fuatjebrocht, aus see doa jewacht hauden. Hee jinkj aun de jeschnizte Steena vebie un kjeem bat Seira. 27Un aus hee doa aunkjeem, blosd hee met de Posaun opp daut Boajlaunt en Efraim. Un de Mana von Israel jinjen met am vom Boajch rauf un hee jinkj veropp. 28Un hee säd to an: Komt mie schwind hinjaraun! De Har haft june Fiend, de Moabita, en june Henj jejäft! Dan jinjen see met am met un besaden de Äwajenj äwa däm Jordan, waut no de Moabita jinjen, un leeten doa kjeenem äwa. 29See schluagen aun däm Dach von de Moabita soo bie 10.000 Mana doot, aules stoakje Kjrieja; soo daut kjeena doavon kjeem. 30Soo worden de Moabita to dee Tiet unja de Jewault von Israel jebrocht. Un daut Launt haud 80 Joa Fräd.
De Rechta Schamgar
31Hinja Ehud kjeem Schamgar, Anat sien Sän. Dee schluach 600 Filista met eene Ossenpikj doot. Soo rad uk hee de Israeliten von äare Fiend. #Rech 5,6
Currently Selected:
Rechta 3: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
