Jesaja 51
51
Troost fa Jerusalem
1Horcht emol no mie, dee jie rajcht haundlen,
un sikj fa däm Harn bemieejen:
Kjikjt emol no dän Steen von woonen jie rutjebeitelt sent,
un no daut Loch, wua jie rutjegroft wieren. #5Mo 33,28; Jes 48,1
2Kjikjt emol no Abraham, junen Voda,
un no Sara von dee jie aufstaumen.
Dee wieren auleen un onen Nokomen aus ekj an roopt,
oba ekj säajend an un hab von an väle jemoakt. #1Mo 12,1-2; Jes 41,8
3De Har woat Zion treesten;
hee woat aul äare doljebroakne Städa un drieeje Stapen treesten.
Hee woat de Wiltnis to een Goaden Eden moaken,
un daut drieeje Launt aus däm Harn sien Goaden moaken;
Freid un scheen gonen woaren doa to finjen sennen
un Leeda dee danken un preisen. #1Mo 2,8
4Horcht no mie, mien Volkj,
un paust opp no waut ekj saj;
Doa woat eene Lia von mie komen;
waut bie mie rajcht es,
woat fa aule Velkja een Licht sennen.
5Ekj woa daut rajcht enfieren, un sea boolt,
mien Heil es aul oppem Wajch;
miene Oarms woaren de Velkja rajcht rejieren.
Aule Lenda luaren aul no mie
un hopen opp mienen Oarm. #Jes 42,4
6Kjikjt emol nopp nom Himmel, un rom junt opp de Ieed.
De Himmel woat aus Ruak vegonen,
un de Ieed woat vebrukt woaren aus Kjleeda,
un de Menschen woaren soo aus Flieejen doot gonen.
Oba mien Heil es opp emma;
ekj woa nich opphieren rajcht to haundlen. #Psa 102,26-27; Mat 24,35
7Horcht emol no mie, dee jie weeten waut rajcht es.
Jie Lied, dee miene Jesazen em Hoat haben:
Habt nich angst wan de Lied junt veachten,
un jäft nich opp wan see junt beschämen. #Mat 5,11
8Dee woaren vefaulen aus een mottenfrosjet Kjleet,
un woaren soo väl meenen aus een wormfrosjet wolnet Duak.
Oba ekj woa emma daut rajchte doonen,
un mien Heil es fa aule Tieden.
9Wakj opp, Har, wakj opp,
wies diene Krauft un diene Macht.
Wakj opp soo aus emol lang trigj;
hakst du nich aum Aunfank Rahab twei,
un vespekjst du nich daut Ojjeheia. #Psa 89,11
10Deetst du nich daut Mäa utdrieejen,
daut soon deepet Wota wia,
un em Boddem vom Mäa eenen Wajch moaken,
daut dee kunnen derch gonen,
waut vom Fient jerat worden? #2Mo 14,21-22
11Un soo woaren dee waut de Har looskjaft no Hus komen,
un woaren schrieen wan see no Zion komen.
Eene eewje Freid woat an kjreenen;
dee woaren jlekjlich sennen un lachen;
jrämen un duaren woaren veschwinjen. #Jes 35,10
12Ekj, ekj sie dee, wäa Troost jeft.
Waut es met die, daut du die fa Menschen enjst,
dee aula stoawen motten un soo aus Graus veschwinjen? #Psa 56,5; Jes 40,1.6; Mat 10,28
13Hab jie dän vejäten dee junt jemoakt haft,
dee wäa dän Himmel utjespreet haft
un de Ieed opp siene Grunt jesat haft.
Du enjst die dän gaunzen Dach fa de Wutt von däm Fient,
dee die dolschlonen wull.
Waut bediet däm Fient siene Wutt? #Jes 44,24
14De Jefangna saul boolt loos jeloten woaren;
un dee woaren lang läwen
un emma jenuach to äten haben.
15Ekj sie de Har, jun Gott,
dee daut Mäa en groote Walen opprieet,
ekj sie bekaunt aus de Har, dee aules rejieet. #Jer 31,35
16Ekj hab die miene Wieed en dien Mul jejäft,
un hab die em Schauten von miene Haunt beschizt.
Ekj spreed dän Himmel ut
un laj dän Grunt fa de Ieed.
Ekj saj to Zion: Jie sent mien Volkj.
17Wakj opp Jerusalem, wakj opp un sto opp,
du hast von en däm Harn siene Haunt
daut Kuffel met sien Oaja to drinkjen jekjräajen.
Du hast must stolpren wäajen daut Kuffel,
waut du ladich drinkjen must. #Psa 60,5; 75,9; Jer 13,12-13; Opb 16,19
18Kjeene von diene Kjinja es jegonen die to halpen,
kjeent von dee woone du groot jekjräajen hast
helt die diene Haunt.
19Twee Dinja sent äwa die jekomen,
un wäa haft die jeholpen dee to droagen?
Daut Launt es venicht un enne Grunt jebrocht,
un doa wia Hungaschnoot un daut Schwieet.
Un wäa haft die jetreest?
20Wiels see soo väl vom Harn
sienen Oaja un Strof jekjräajen haben,
ligjen diene Säns oppe Gaussen un sent veschmacht,
soo aus een Ree en een Jäaja sien Nat, #Kloag 2,11.19
21Oba nu horch, du veschechade,
du best bedieselt, oba nich von Wien.
22Dit es waut dien Har, de Har, dien Gott,
dee fa die ensteit sajcht:
Ekj näm daut Kuffel wajch,
wäajen woont du soo stolpren must;
du brukst nich mea von daut Kuffel drinkjen,
wua Gott sien Oaja bennen es.
23Nä, ekj woa dee daut jäwen,
waut die soo toojesat haben un sajen:
Schmiet die han, daut wie kjennen äwa die gonen.
Dee muaken die hanlajen un dien Rigjen hanjäwen,
daut see doa, aus oppe Gaus, bowen romjinjen. #Psa 129,3
Currently Selected:
Jesaja 51: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
