Jesaja 48
48
De Har woat de Jefolne halpen
1Horcht emol no dit, dee jie von Juda jekomen sent,
un waut sikj Israeliten nanen,
dee jie von Juda aufstaumen:
Jie moaken jun vespräakjen met een Eit em Harn sienen Nomen
un beroopen junt opp Israel äaren Gott,
oba nich en eenen woarhauftjen un rechtjen Senn. #Jes 51,1
2Jie sajen jie sent von de heilje Staut,
un veloten junt opp Israel äa Gott,
dee de Har es, dee aules rejieet.
3Lang trigj säd ekj, waut komen wudd.
Daut kjeem von mie un wort bekaunt jejäft;
don deed ekj daut met eemol plazlich.
4Ekj weet daut du stieekoppich best;
daut du eene iesane Sän em Jenekj hast,
un een bronsnen Stiern aum Kopp.
5Daut es wuarom ekj die em verut säd:
Ea daut rom kjeem, leet ekj daut weeten,
soo daut du nich sajen wurscht,
daut dien Aufgott daut jedonen haud,
ooda daut diene jeschnizte un jegotne Formen daut deeden.
6Jie haben jehieet, waut jesajcht wort,
un nu kjikjt, kjenn jie daut nich toostonen?
Un von nu aun woa ekj junt nieet sajen,
soont, waut jie bat nu nich wisten.
7Daut es nich emma doa jewast.
Ekj hab daut mau nu jedonen,
un jie haben doa nich ea von jehieet.
Jie woaren nich sajen kjennen,
daut jie daut aul ea wisten.
8Jie haben daut nich ea jehieet ooda jewist,
wiels jie hauden june Uaren nich op doano.
Ekj wist woo hinjarigjsch jie wieren;
daut jie von kjlien aun, aus jäajenaun bekaunt wieren.
9Wiels ekj dee sie, soo aus jie mie kjanen,
leet ekj mien Oaja nich opp junt komen;
wäajen de Iea dee mie traft, hilt ekj mie trigj,
soo daut jie nich gaunz vedorwen worden.
10Horcht emol, ekj hab junt jereinicht,
oba nich soo aus Selwa en eenen Schmeltowen;
ekj hab junt en eene Bak von Älent aufjeprooft. #5Mo 4,20
11De Dinja waut ekj doo, doo ekj om mient haulwen;
om mient haulwen paus ekj opp, daut mien Nomen rein blift;
de Iea, dee mie jehieet, lot ekj kjeenem aundren haben. #Jes 42,8
12Horcht emol no mie,
dee jie von Jakob aufstaumen,
jie Israeliten, dee ekj mie jeroopt hab:
Ekj auleen sie Har,
ekj sie de Ieeschta un ekj sie de Latsta.
13Met miene Krauft hab ekj de Ieed hanjestalt,
un de Stierns un dän Himmel utjespreet;
ekj jäw daut Wuat, un dan sent see doa.
14Komt aula toop un horcht emol häa.
Woona von de Jetta haft dit jesajcht?
Deejanja, wäm de Har jleicht,
woat aun Babel doonen, waut de Har haben well,
dee woat siene Macht jäajen de Chaldäa wiesen. #Jes 41,2
15Ekj sie dee, wäa daut jesajcht haft, un ekj roopt am;
ekj hab am jebrocht un woa am daut jlekjen loten.
16Komt dicht bie un horcht waut ekj saj:
Ekj hab von Aunfank aun nich plietsch jerät;
wan doa waut jeworden es, sie ekj doa jewast.
Un nu schekjt Gott de Har mie derch sienen Jeist. #Jes 45,19
17Dit es waut de Har, dee die vom Fient rat,
dee wäa en Israel heilich es, sajcht:
Ekj sie de Har, dien Gott,
un ekj lia die daut, waut goot fa die es,
un wies die dän Wajch, dän du gonen saust.
18Wan du bloos hautst no miene Jebooten jehorcht,
dan wurscht du Fräd jehaut haben, soo aus een Riefa,
un Sachen wudden bie die soo rajcht stonen aus de Walen oppem Mäa. #5Mo 5,29
19Du wurscht sooväl Nokomen jehaut haben
aus doa Saunt aum Mäa es;
de dienje wudden emma ver mie sennen
un ekj wudd junt nienich utroden. #1Mo 22,17
20Velot Babel! Rant von de Chaldäa!
Sajcht de aundre dit un freit junt!
Lot aulem daut weeten, aulawäajen!
De Har haft sienen Deena Jakob loosjekoft! #Jer 51,6; Opb 18,4
21Aus de Har sien Volkj derch de drieeje heete Wiltnis leid,
wieren see nich darschtich.
Hee muak Wota utem Steen ranen.
Hee spoold dän Steen opp
un doa rand Wota rut. #2Mo 17,6
22Oba dee, woone mie nich jehuarsom sent,
woaren nienich tofräd sennen, sajcht de Har. #Jes 57,21
Currently Selected:
Jesaja 48: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
