Jesaja 38

Hiskia siene Krankheit

(2Kjen 20,1-11)

1Dan wort Hiskia emol krank, un daut leet aus wan hee stoawen wudd. Dan kjeem de Profeet Jesaja, Amoz sien Sän, no am un säd: Dit es waut de Har sajcht: Moak die opp aules reed. Du woascht nich läwen; du woascht stoawen. 2Dan dreid Hiskia sikj no de Waunt un bäd däm Harn aun 3un säd: Har, du weetst doch, daut ekj met mien gaunzet Hoat tru jewast sie ver die, un woo ekj daut jedonen hab waut die jefelt. Un Hiskia hield sea. #2Kjen 18,3-6 4Dan kjrieech Jesaja een Wuat vom Harn, un daut säd: 5Go no Hiskia un saj am: Dit es waut de Har, dien Staumvoda David sien Gott, sajcht: Ekj hab dien Jebäd jehieet un diene Tronen jeseenen. Horch, ekj woa die noch 15 Joa mea läwen loten. 6Ekj woa die un dise Staut ut däm assierischen Kjennich siene Macht raden, un ekj woa dise Staut bewoaren. 7Un dit es daut Tieekjen, waut du vom Harn kjrichst, daut die daut soo woaren woat aus de Har jesajcht haft. De Har sajcht: 8Kjikj emol, ekj woa dän Schauten aun Ahas siene Sonnenklock loten tieen Sträakja trigj gonen, woone dee aul wia verwoats jegonen. Un de Sonn jinkj tieen Sträakja trigj aun de Sonnenklock.

Hiskia sien Leet aus hee krank wia

9Un Hiskia, de Kjennich von Juda schreef dit Leet, no däm daut hee wia krank jewast un wada jesunt jeworden wia:

10En miene baste Joaren wia mie met eemol soo

aus wan ekj stoawen wudd

un nich mien Läwen wudd utläwen kjennen.

11Mie wort angst ekj wudd nich wada

däm Harn seenen en de Welt von dee waut läwen;

un ekj wudd en dise Welt

nich mea Menschen seenen. #Psa 27,13

12Daut Huskje, en woont ekj läw,

wort von mie jenomen,

soo aus een Hoad sien Zelt von siene Städ,

ooda een Wäwa sien Zeich von sien Jestal,

wan hee dän Drot aufschnitt.

Dach un Nacht stunt mien Enj ver mie.

13Bat aum Morjen bäd ekj om Help,

oba hee brakjt mie aule Knoakes aus een Leiw.

Dach un Nacht steit mien Enj ver mie.

14Miene Stemm piepad aus een Schwaulemkje;

ekj ständ aus eene Duw.

Miene Uagen schielden no bowen;

Har halp mie en mien Älent.

15Waut kaun ekj noch to am sajen?

Hee haft jerät un haft dit jedonen.

Ekj läw aul miene Joaren en Deemoot,

wiels mien Läwen soo oppspell jesat wort.

16 Har, soo jehieet daut met de Menschen,

un ekj finj mien Läwen en daut waut du deist;

miene Jesuntheit kjemt von die,

lot mie noch lenja läwen.

17Daut es mie doch toom gooden jewast,

daut ekj soo hab lieden must.

En diene Leew hast du mien Läwen

ut daut Loch jerat,

wua ekj wudd vedorwen sennen;

du hast daut, waut ekj veschulcht hab,

aula hinja die wajchjeschmäten. #Psa 32,5; Micha 7,18-19

18De Vestorwne preisen die nich,

un ieren die nich met äare Leeda;

dee, dee begroft sent, luaren nich mea

daut du woascht wiesen woo truhoatich du best. #Psa 6,6; 115,17

19Daut sent dee waut läwen, waut die lowen,

soo aus ekj die vondoag doo.

Een Voda sajcht sien Kjint,

woo truhoatich du best.

20De Har haft mie jerat,

un doawäajen preis ekj am;

soo lang aus wie läwen,

woa wie Instrumenten spälen

om die em Tempel to lowen.

21Un Jesaja haud ea jesajcht: Brinjt een Plosta von Fiejen un lajcht daut opp Hiskia sien Schwäa, soo daut hee jesunt woaren woat. 22Un Hiskia säd to Jesaja: Waut von Tieekjen woat doa sennen, daut de Har mie jesunt moakt, un daut ekj wada en däm Harn sien Hus woa noppgonen.

Currently Selected:

Jesaja 38: PB

Highlight

Compare

Copy