Jesaja 37

De Kjennich sieekjt Help

(2Kjen 19,9-37)

1Aus de Kjennich Hiskia daut hieed, reet hee siene Kjleeda twei un trock sikj een Sak äwa. Hee jinkj en däm Harn sien Hus, 2un schekjt Eljakim, dee de Äwasechta fa däm Paulaust wia, un Schebna, dee de Schriewa wia, un uk de leidende Priestasch, aula en Sakj jekjleet, no däm Profeet Jesaja, Amoz sien Sän. 3Un see säden to am: Dit es, waut Hiskia sajcht: Dit es een schlemma Dach. Wie sent tosied jestat un beschämt worden. Daut es aus wan een Kjint saul to Welt komen, un doa nich de Krauft doatoo es. 4Veleicht haft de Har, dien Gott, jehieet waut de Rabschake fa sienen Harn, dän assierischen Kjennich jesajcht haft, un woo hee dän läwendjen Gott toom Spott jebrukt haft. Veleicht bestroft de Har, dien Gott, janem fa de Dinja, waut hee von am jehieet haft. Bäd fa dee, dee noch en Jerusalem äwajebläwen sent.

5Un aus Kjennich Hiskia siene aunjestalde Mana no Jesaja kjeemen, 6säd Jesaja to an: Sajcht junen Harn, dän Kjennich Hiskia: Dit es waut de Har sajcht: Enjst die nich fa daut, waut du jehieet hast, daut, met waut de aunjestalde von däm assierischen Kjennich mie jelastat haben. 7Horch emol, ekj woa däm assierischen Kjennich waut loten groot woaren, soo daut wan hee eene jewesse Norecht hieet, woat hee trigj en sien Launt trakjen. Un doa en sien Launt, woa ekj am loten met daut Schwieet doljeschloagen woaren.

8Un de Rabschake hieed daut de assierischa Kjennich sikj haud von Lachisch trigjetrocken, un met siene Armee jäajen Libna jegonen wia. Un soo veleet de Rabschake Jerusalem.

9De Kjennich von Assierien haud jehieet daut de Kjennich Tirhaka von Kusch met siene Armee jäajen am jekomen wia. Un de assierischa Kjennich schekjt wada Mana no Hiskia un bestald aun dän, 10see sullen Hiskia, dän Kjennich von Juda, sajen: Lot dienen Gott, opp dän du die velatst, die nich hinjat Licht fieren, wan hee vesproaken haft, daut Jerusalem nich woat unja de Macht von däm assierischen Kjennich jejäft woaren. 11Horch emol, du hast jehieet waut de assierische Kjennichs en aule Lenda jedonen haben, un woo see dee gaunz venicht haben. Jleefst du bloos du woascht jerat woaren. 12Haben de Jetta von dee Velkja, dee miene Vodasch venichten deeden, an jerat? Weetst du nich waut en Gosan, Haran, Rezef, un met de Lied von Eden, dee en Telasar wieren, jeworden es? #Jes 36,18 13Wua sent nu de Kjennich von Hamat ooda de Kjennich von Arpad un de Kjennichs von de Städa Sefarwajim, un Hena un Awa?

14Aus Hiskia disen Breef, woonen de Mana brochten, jekjräajen un jeläst haud, jinkj hee doamet no däm Harn sien Hus un muak dän doa ver däm Harn op. 15Un Hiskia bäd däm Harn aun un säd: 16Har, dee du aules rejieescht, dee du en Israel Gott best, dee du dienen Troon huach äwa de Cheruben hast, du best de eensja Gott äwa aule Kjennichrikjs oppe Ieed. Du best deejanja wäa dän Himmel un de Ieed jemoakt haft. 17Har, brinj dien Ua een bät noda un horch; Har, moak diene Uagen op un kjikj emol. See emol aules, waut de Sanherib jeschräwen haft, un woo hee dän läwendjen Gott jelastat haft. 18Daut es soo, Har, daut de Kjennichs von Assierien aule Lenda vedorwen haben. 19Daut es soo, daut see dee äare Jetta haben em Fia jeschmäten. Oba daut wieren je nuzloose Jetta. Daut wieren Dinja dee Menschenhenj von Holt un Steen jemoakt hauden. Daut es waut see vedorwen haben. 20Un nu, Har ons Gott, bäd ekj, rad ons von siene Macht, soo daut aule Velkja oppe Ieed enseenen woaren, daut du Har auleen Gott best. #Jes 40,5; Dan 6,27

21Dan schekjt Jesaja, Amoz sien Sän, eene Norecht no Hiskia un säd to am: Dit es waut de Har, Israel äa Gott sajcht: Ekj hab jehieet waut du jebät hast äwa Sanherib, dän assierischen Kjennich. 22Dit es waut de Har äwa am to sajen haft:

Dee oschuldje scheene Zion veacht die un spott äwa die;

un daut scheene Jerusalem scheddat dän Kopp hinja dien Rigjen.

23Äwa wäm hast du jespott un jelastat?

Äwa wäm hast du soo lud jerät, un opp wäm hast du soo rauf jekjikjt?

Daut hast du jäajen dän Heiljen von Israel jedonen.

24Du hast derch diene Mana dän Harn veacht un jesajcht:

Ekj sie met aul miene Woages bat huach enne Boaj,

un bat em hinjaschten Woolt en Libanon jewast.

Ekj hab de jratste Zeeda un de baste Taunenbeem doljehakt.

Ekj sie bat opp dän hinjaschten Boajch em Woolt,

wua daut aum gaunz dichsten wia, jewast. #Jes 14,8

25Ekj hab en framde Lenda no Wota jegroft un uk jedrunken,

un ekj hab aul de ägiptische Riefasch met miene Steewel Solen utjezopt.

26Hast du daut noch nienich jehieet,

daut ekj mie lang doaropp reed jemoakt hab,

un to jane Tiet aul doaropp jeplont hab,

waut ekj nu äwadäl brinj,

daut du Städa met Mieren dolbrakjst

un en Steenahupes ligjen latst?

27Un dee, dee doabennen wonden, hauden kjeene Krauft;

see enjsten sikj un musten sikj schämen.

See wieren aus daut Graus oppe Stap un daut jreene Krut;

see wieren aus Graus waut oppem Dak kjient

un vedrieecht ea daut groot es.

28Ekj weet goot om, wua du blifst,

un wanea du rut jeist un wanea du nenn kjemst,

un daut du jäajen mie jetoopt hast.

29Wiels du soo jäajen mie toopst,

un ekj jehieet hab woo äwamootich du best,

woa ekj die eenen Rinkj enne Näs nenmoaken

un mien Jebett en dien Mul saten,

un die trigj delenjd dän Wajch leiden,

woonen du kjeemst.

30Un dan säd Jesaja to Hiskia: Dit saul daut Tieekjen fa die sennen: At dit Joa waut von selfst waust, un daut näakjste Joa waut dan noch waust, un en daut dredde Joa saust du seien un arnten, du saust Wiengoades aunplaunten un von dee äten. 31Un daut, waut von daut Volkj Juda äwablift, woat unjen fresche Wartlen rutschmieten un bowen Frucht haben. 32Doa woaren dee komen waut von Jerusalem äwabliewen, un vom Zion Boajch jerat sent. De Har, dee aules rejieet, dee daut nich vedrajcht, daut see von sest wäm jenomen woaren, woat dit doonen. #Jes 9,6

33Un doawäajen es dit waut de Har äwa dän assierischen Kjennich sajcht: Hee woat nich en dise Staut nenkomen un woat kjeene Feil doa nenn scheeten. Hee woat sien Schilt nich no junt dreien un woat kjeene Ieed oppschedden jäajen june Mia. 34Hee woat schmock dän Wajch trigj gonen, woonen hee jekomen es, un woat nich en dise Staut nenkomen. De Har sajcht dit. 35Ekj woa dise Staut mienen Schutz jäwen un dee raden. Dit doo ekj, soo daut et to seenen es, daut mie to vetruen jeit, un om David, dee mie deend, sient haulwen.

36Dan jinkj däm Harn sien Enjel un schluach 185.000 Maun en daut assierische Loaga. Un tiedich zemorjes, sagen dee waut doa don wieren, daut aules voll Doodes lach. #Jes 17,14; 31,8 37Dan riemd Sanherib, de assierischa Kjennich, siene Sachen toop un jinkj wajch. Hee jinkj met aules no Hus un bleef en Ninive. 38Un een Dach aus hee en däm Tempel fa sienen Gott Nisroch bäden deed, schluagen twee von siene Säns, Adramelech un Sarezer, am doot. See kjeemen met äa Läwen doavon un vestuaken sikj en daut Launt Ararat. Un sien Sän Asarhadon wort Kjennich no am.

Currently Selected:

Jesaja 37: PB

Highlight

Compare

Copy