Jesaja 32
32
De gooda Kjennich
1Horcht emol. Doa woat een Kjennich rejieren,
dee daut woat väahäwen, waut jerajcht es;
un siene aunjestalde woaren rechtich haundlen. #Jes 33,17; Jer 23,5
2Dee woaren fa daut Volkj soo sennen
aus Schulinj em Storm,
ooda een Dak, wan de Räajen prosselt;
soo aus een Stroom en eene drieeje Jäajent
ooda de Schauten von eenen grooten Steen
en een drieejet Launt.
3Dan woaren dee, dee seenen kjennen, nich de Uagen toohoolen;
un dee, dee hieren kjennen woaren horchen.
4Dee oschuldje woaren kluak sennen,
un dee, dee stomaden, woaren goot un kloa räden kjennen. #Jes 35,6
5Dee, dee schoslich es, woat nich mea huach aunjestalt woaren,
un de Spetzbub woat nich huach jeacht woaren. #Spr 28,16
6De Schosel rät soont waut nich toophelt,
un hee nemt sikj väa, waut orrajcht es:
hee eeft een gottlooset Läwen,
hee sajcht soont äwa däm Harn, waut nich soo es,
hee lat de hungaje hungrich bliewen,
un helt Wota trigj von dee waut darscht.
7Dän Spetzbub siene Wäaj sent bees;
hee moakt eenen beesen Plon,
daut hee de oame met siene Läajes utnuzt,
uk wan dee verem Jerecht opp daut bestonen, waut rajcht es.
8Oba dee, wäa aunjeseenen es,
nemt sikj waut aunjeseenet väa,
un blift bie daut, waut aunjeseenen es.
9Jie Frulied, dee soo eendoontich sent,
horcht emol no waut ekj saj;
jie Mejales, dee jie junt soo secha sent,
paust opp no waut ekj saj. #Jes 3,16—4,1
10En een bät äwa een Joa,
woaren dee, dee sikj soo secha wieren, schudren,
wiels doa woaren kjeene Wiendruwen toopjeläst woaren,
un doa woat kjeene Frucht aun de Beem sennen.
11Flautat, dee jie soo eendoontich sent,
un schudat junt, dee jie soo secha sent;
trakjt june schmocke Kjleeda auf
un nämt junt daut Truakjleet om.
12Klaupt junt oppem Brostknoaken,
wäajen, waut opp daut schmocke Flekj jeworden es,
un waut em Wiengoaden vedorwen es;
13truat äwa mien Volkj äa Launt,
wua nu Onkrut un Distlen waussen,
un uk äwa de schaftje Hiesa en de jlekjelje Staut.
14Wiels de Paulausts woaren ladich stonen,
un de Staut, wua soo väl Menschen wieren,
woat onbewont sennen.
En de vesechade Städa un Torms
woaren bloos noch wille Tieren husen,
un de Häaden woaren doa weiden.
Wan de Jeist ieescht kjemt
15Wan de Jeist von bowen opp ons woat utjegoten woaren,
woat de Wiltnis een fruchtboaret Launt sennen,
un daut fruchtboare Launt woat driewen aus een Woolt. #Jes 29,17; 44,3
16Dan woat enne Wiltnis un opp daut fruchtboare Launt
aulawäajen nom rajcht jeseenen woaren.
17Un wiels daut rajchte jedonen woat,
woat doa Fräd sennen;
un daut woat opp emma stell un secha sennen,
18un mien Volkj woat en een rujet Launt wonen,
wua äare Hiesa lang stonen woaren.
See woaren onvestieet un tofräd sennen. #Jer 33,16
19De Hoagel woat dän Woolt dolschlonen,
un de Staut woat enne Grunt jebrocht woaren.
20Jie woaren sea jlekjlich sennen,
daut jie emma biem Stroom akren kjennen,
un jun Vee un june Äsels woaren frie oppe Weid gonen.
Currently Selected:
Jesaja 32: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
