Jesaja 31
31
De Har halpt, un aundre Lenda äare Armeeen doonen nich
1Woo saul daut noch met dee,
waut no Ägipten no Help ranen,
un sikj opp Pieed un Woages veloten,
wiels see väl von dee haben,
un sikj opp Rittasch stetten,
wiels dee stoakj sent,
un kjieren sikj nich no däm,
dee en Israel heilich es,
un roopen nich däm Harn aun. #Psa 20,8; Jes 30,1-2
2Oba hee haft daut goot derchjedocht,
un haft Onheil jebrocht;
hee nemt sien Wuat nich trigj.
Hee woat jäajen dee komen, dee orrajcht haundlen,
un jäajen dee, dee daut beese unjastetten. #4Mo 23,19; Amos 3,6
3De Ägipta sent Menschen un nich Gott,
äare Pieed sent Fleesch un nich Jeist.
De Har woat siene Haunt utstrakjen,
un dan woat dee, dee halpen saul, sikj vestaupen,
un dee, dee jeholpen woat, woat hanfaulen.
Dee woaren beid toop omkomen.
4Dit haft de Har mie jesajcht:
Soo aus een junga Leiw ooda een aundret jefäadeljet Tia
äwa daut gnort, waut hee jeschlacht haft,
un sikj vom Jeschrech nich wajch enjsten lat,
wan uk een Deel Hoads am proowen auftojoagen,
soo woat de Har, dee aules rejieet,
sien Enj faust hoolen,
wan hee toom Kaumf opp dän Zions Boajch rauf kjemt.
5Soo aus een Voagel met de Flichten Schutz jeft,
woat de Har, dee aules rejieet, Jerusalem bewoaren;
hee woat an bewoaren un raden,
hee woat an veschoonen un friemoaken. #Mat 23,37
6Jie Israeliten, komt doch trigj no däm, däm jie soo schlemm verot haben. #Jer 7,3-5 7Un wan dee Dach kjemt, woa jie de selwane un goldne Jetta, dee jie to june ieejne Schaund jemoakt haben, aula wajchschmieten. #Jes 2,20
8Dan woat Assur hanjerecht woaren,
oba nich derch eene Armee von Menschen;
waut jratret aus een Schwieet von Menschen
woat de Assiera venichten.
Dee woaren ver dän Fient flichten,
un äare junge Mana woaren to de Oabeit jedwungen woaren. #Jes 37,36
9Dee, opp wäm see sikj veloten,
woat en Angst veschwinjen;
un de Leidasch woaren veschrocken äare Posten veloten.
Dit es waut de Har sajcht,
dee en Zion een Fia aum gonen haft,
un en Jerusalem Gloot jlieejen haft. #5Mo 32,31
Currently Selected:
Jesaja 31: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
