Jesaja 3
3
Woo schlemm daut en Jerusalem un Juda es
1Paust opp!
De Aulmajchtja, de Har, dee aules rejieet,
woat von Juda un Jerusalem daut wajchnämen,
waut see brucken un needich haben,
beides dän Väarot von Broot,
un uk dän Väarot von Wota. #3Mo 26,26; Hes 4,16
2Hee woat de jeeewde un de jeweenelje Soldoten,
de Rechta un de Profeeten,
de Woasaja un de Stautsvodasch,
3de Armee Leidasch un de Volkjs Leidasch,
de Liera un de utjelieede Oabeida,
un dee waut veschiednet dieden kjennen,
aula wajchnämen.
4Dee waut noch nich utjewossen sent
woaren äare Leidasch sennen,
un Kjinja woaren an rejieren. #Liera 10,16
5Lied woaren sikj unjarenaunda utnutzen,
auf daut Nobasch sent ooda nich;
de junge woaren de oole trotzen,
un de Schosel, dän, dee aunjeseenen es.
6Dan woat eena däm aundren,
dee von sien Frintschoft es,
proowen to beräden un sajen:
Du hast noch auntotrakjen;
wie woaren die aunstalen,
daut du waut met dit Wrak deist.
7Oba dee woat sikj wäaren un sajen:
Ekj vesto soont nich trajcht to moaken.
Wie haben bie ons nuscht to äten ooda auntotrakjen;
moakt mie nich to junen Leida.
8Oba Jerusalem stolpat,
un Juda es hanjefollen;
met daut waut see räden un doonen,
vestrieden see däm Harn
siene Iea un siene Krauft.
9See veschuldjen sikj selfst,
soo aus see eenem äwa däm aundren väatrakjen.
Krakjt soo aus de Menschen en Sodom,
schämen see sikj nich met äare Sinden,
un proowen dee nich to vestäakjen.
Woo woat an daut doch gonen,
met daut beese waut see opp sikj brinjen. #1Mo 19,5-9
10Un jie dee jie bie daut rajchte bliewen,
jie haben daut goot
un woaren junt freien to daut waut jie doonen.
11Woo woat dee daut oba gonen waut orrajcht doonen?
Dee woat daut schlajcht gonen;
un daut waut see jedonen haben
woat an trigj oppem Kopp komen.
12Mien Volkj lat sikj unjadrekjen
von dee waut nich weis sent;
daut woat von Frues rejieet.
June Leidasch veleiden junt,
un vewerren junt dän Wajch
dän jie gonen sullen.
13De Har es oppjestonen
un haft sienen Plauz jenomen
om sien Volkj to rechten.
14De Har beschulcht de Leidasch un väaschte von sien Volkj:
Jie haben dän Wiengoaden vedorwen,
un junt daut oppjespikjat waut de oame jehieet. #Jes 5,7
15Waut hab jie väa, daut jie
mien Volkj unjadrekjen,
un de oame daut Jesecht aufriewen?
sajcht Gott de Har, dee aules rejieet.
16De Har sajcht:
Wiels de Frumenschen en Zion,
soo huachnäsich romgonen,
un daut Jenekj soo strakjen,
un met nieschieeje Uagen romkjikjen,
un han un häa triplen,
daut de Schnalen aun äare Schoo kjlinjren, #1Tim 2,9
17woat de Aulmajchtja de Frues en Zion
dän Kopp aufdakjen;
de Har woat an kolkoppich moaken.
18Wan dee Tiet kjemt, woat de Aulmajchtja daut Straums von äare Feet, un vom Kopp un Oarms, 19de Uarinj, de Haulskjäden, un Schleia, 20de Hauben, Oarmbenja un Mauntels, daut Parfum un waut see droagen daut see goodet Jlekj haben, 21de Finjarinj un Näsrinj, 22de besondre Kjleeda toom Heljedach, dän Äwarock, daut Duak un de Tausch, 23daut Kjnepje, de Weesten, Koppbinjen un de Koppbedakjunk aufstreepen.
24Enne Städ scheen rikjen, woaren see stinkjen;
enne Städ eenen Mauntel, woaren see eenen Strank droagen;
enne Städ jepuzte Hoa, woaren see kol sennen;
enne Städ sindoagsche Kjleeda, haben see eenen Sak,
un enne Städ Straums, een Brauntmol.
25Äare Mana woaren vom Schwieet omjebrocht woaren,
un äare Soldoten woaren em Kjrich stoawen.
26Bie daut Stautspuat woaren see truaren un hielen,
un see woaren veloten oppe Ieed setten.
Currently Selected:
Jesaja 3: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
