Jesaja 29
29
Woo Jerusalem daut gonen woat
1Oba Jerusalem, de Staut wua mien Aultoa es,
un de Staut wua David sien Loaga oppschluach,
lot de Joaren eent nom aundren vebie ranen
un hoolt aul de Heljedoag.
2(Wan jie dee nich woaren iernsta nämen,)
dan woa ekj jun Zentrum en Jefoa brinjen,
daut jie jaumarieren un truaren woaren;
un Jerusalem woat een Opfadesch sennen.
3Ekj woa junt runtom beloagren,
un woa mie runtom Torms un Oppfoaten buen. #Luk 19,43
4Dan woascht du von enne Ieed räden,
un vesieekjen waut Wieed väatobrinjen;
du woascht eene Stemm aus een Jeist enne Ieed haben,
ooda aus wan em Stoff jefuschelt woat.
5Aul june väle Fiend woaren aus fienet Stoff sennen,
un de väle waut junt unjadrekjten,
woaren aus Haksel em Wint sennen.
Plazlich un onverhofs
6woat de Har, dee aules rejieet, met junt veräakjnen;
daut woat rumlen, die Ieed woat schedren,
un daut woat lud häagonen.
Daut woat soo aus een Stormwint sennen,
un soo aus een ruzhendet Fia, daut sikj derchfrat.
7Un aul dee väle von de Lenda,
waut jäajen Jerusalem strieden,
un jäajen june stoakje Mieren kjamfen,
un aul dee, dee junt soo enjsten,
woaren jewast sennen aus een Droom,
dee eenem enne Nacht kloa woat.
8Daut woat fa june Fiend soo sennen
aus fa eenem däm doa hungat,
un dan dreemt, daut hee at,
wan hee oba oppwakjt, hungat am noch emma.
Ooda soo aus fa däm waut darscht
un hee dreemt hee drinkjt,
un wan hee oppwakjt darscht am noch.
Krakjt soo woat aul dee väle Velkja daut gonen,
dee jäajen dän Zions Boajch kjamfen.
Sikj selfst waut väamoaken.
9Doot junt schoslich un woat Schosels;
doot junt blint, un kjikjt nich opp;
dee äa Denkjen es derch eenaunda, oba nich von Wien;
dee stolpren, oba nich wäajen waut stoakjet.
10Nä, de Har haft soo lang to junt jerät,
daut jie schleeprich jeworden sent;
de Profeeten, waut Sachen sullen kloa woaren,
es de Kopp bedakjt un daut Uag toojegonen.
11Doawäajen es daut waut de Profeeten säden
aus een veschlotna Breef fa junt.
Wan dee wäm jejäft woat, dee läsen kaun,
un jie sajen hee saul läsen,
dan sajcht hee, hee kaun nich, wiels daut veschloten es.
12Un wan dee eenem jejäft woat, dee nich läsen kaun,
un jie sajen hee saul läsen,
dan sajcht hee, hee kaun nich läsen.
13De Har sajcht:
Wiels dit Volkj schmocke Wieed rät,
un feine Dinja von mie sajcht,
oba sikj nich werkjlich no mie kjieet,
– dee wiesen mie äare Forcht bloos met Menschen Räajlen
dee see haben lieet nosajen – #Jes 1,15; 58,2-3; Mat 15,8-9
14doawäajen woa ekj wada soont doonen waut an een Rotsel es,
daut see sikj wundren un wundren woaren.
Un de Weisheit von de kluake woat veschwinjen,
un daut Vestentnis von de jelieede woat sikj nich wiesen. #Mat 11,25; 1Kor 1,19
15Woo woat dee daut doch gonen,
dee sikj waut väanämen un meenen,
see hoolen daut stell von däm Harn;
un krakjt soo fa dee waut sikj entschuljen met:
Wäa haft daut jeseenen? Wäa weet doa waut von? #Psa 10,11
16Daut es je gaunz vedreit.
Es de Toppstrikja soo to vejlikjen met däm Leem?
Kaun daut waut eena jemoakt haft daut vestrieden,
daut deejanja daut jemoakt haft?
Kaun daut waut eene Form jekjräajen haft,
sajen daut dee wäa daut formd nuscht wist? #Jes 45,9
17Woat de Libanon Woolt nich boolt goodet Akalaunt sennen,
un daut goode Akalaunt met Woolt bewossen woaren?
18Wan dee Tiet kjemt, woaren de doowe
hieren, waut en een Buak jeschräwen es;
un de blinje woaren von en äare
diestre un dunkle Welt seenen kjennen. #(18 un 19) Jes 35,5; Mat 11,5
19Dee, waut nich huach aunjeseenen sent,
woaren niee Freid em Harn haben;
un de oamste Menschen woaren sikj freien
äwa däm, dee en Israel heilich es.
20Dee waut aundre utnutzen ooda vespotten,
woaren dan nich mea rom sennen;
un dee waut doano ut sent, Onheil aun to rechten
woaren doljeschloagen sennen.
21Dit sent dee waut aundre met een Wuat schuldich moaken,
un eene Faul oppstalen fa däm,
dee sikj em Jerecht rajchtfoadjen well,
ooda met lieejen däm oschuldjen sien rajcht wajchnämen. #Amos 5,10
22De Har, dee Abraham jerat haft,
sajcht nu to Jakob siene Nokomen:
De Israeliten sellen nich mea beschämt sennen;
dee woaren nich mea aus schwak aunjeseenen woaren.
23Wan de Israeliten woaren seenen waut ekj doo,
wooväl ekj an wada jemoakt hab,
woaren see mie aunseenen aus dän heiljen Gott.
See woaren dän, dee en Israel heilich es,
aus heilich aunseenen,
un met staunen ver Israel äaren Gott stonen.
24Dee waut vewert en äaren Jeist wieren,
woat daut kloa woaren;
un dee waut grumsaujden,
woaren sikj belieren loten.
Currently Selected:
Jesaja 29: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
