Jesaja 28
28
Waut Samaria vedeent haft
1Woo woat daut doch met de Staut gonen,
dee Kroon met woonen de bedrunkne
en Efraim soo stolt sent?
Gaunz voll Wien, meenen see sikj waut
met de schmocke Bloom dee nu vewalkjt es,
opp däm Boajch en daut Tol daut soo goot drajcht.
2Horcht emol. De Har haft waut reed fa junt.
Daut es soo aus een groota Hoagel un een hunjscha Storm,
aus eene Äwaschwamunk dee aules utritt,
un hee woat daut opp junt noppschmieten. #2Kjen 17,5-6
3De bedrunkne Lied en Efraim
äare groosoatje Staut,
woaren enne Grunt komen,
aus wan dee met Feet vetraumpelt wieren.
4Un de vewalkjte Bloom, dee ieescht soo schmock leet,
opp dän Boajch en daut Tol, daut goot drajcht,
woat daut gonen aus de ieeschte riepe Fiej verem Somma:
wäa dee daut ieeschte sitt, nemt dee un at dee opp.
5Wan dee Dach kjemt, woat de Har, dee aules rejieet,
opp dee, dee äwajebläwen sent,
een schmocka Kraunz un Kroon sennen;
6un hee woat fa däm, dee em Rechtastool sett,
een Jeist sennen, dee daut rajchte Jerecht jeft.
Hee woat de Macht sennen fa dee,
dee dän Fient bie daut Puat aufhoolen.
7Soogoa de Priesta un de Profeeten sent bedrunken,
dee haben Wien un Bea jedrunken,
daut see nich jlikj gonen kjennen.
De Wien haft de Profeeten benomen,
daut an daut nich kloa woat,
waut de Har an wiesen well;
un de Priesta sent soo dieslich,
daut see sikj vestaupen,
wan see eene Entscheidunk jäwen sellen.
8Kjeene von äare Deschen sent noch rein,
wiels see doanopp jekolkjt un jespäajen haben.
9De Lierasch sent soo kjinjrich jeworden
aus eena waut jrod gonen lieet.
Woo kjennen dee noch wäm waut lieren?
Woo kjennen dee waut utlajen?
10See sajen utwendich opp,
waut see selfst nich vestonen;
un sajen emma wada väa,
waut see selfst nich nokomen.
11Daut es aus wan daut en eene framde Sproak,
ooda daut en onvestentelje Wieed es,
wan de Har de Menschen sajcht, #5Mo 28,49; Jer 5,15; 1Kor 14,21
12soo aus hee vesproaken haft:
Siet ruich, hia es june Städ;
jie brucken junt nich meed moaken;
hia kjenn jie en Fräd läwen.
Oba jie jehorchten am nich, #Jes 30,15; Mat 11,28-29
13un nu sent junt däm Harn siene Wieed
aus wan ekj waut utwendich saj,
daut nich to vestonen es;
un aus wan ekj emma wada saj
waut nich notokomen es.
Un jie woaren junen Wajch gonen un dolfaulen,
jie woaren enne Grunt komen,
un faustjenomen un wajchjefieet woaren.
14Jie Leidasch en Jerusalem,
dee jie soo spotten,
horcht emol no waut de Har sajcht.
15Jie meenen daut jie haben eenen Bunt jemoakt
met däm Doot un daut Doodenrikj.
Jie meenen daut met lieejen un väajäwen
hab jie junt von dän grooten Schoden beschizt.
16Na, Gott de Har sajcht to junt:
Horcht emol, ekj sat en Zion eenen Akjsteen,
een sea fausta Steen, dee nich veschift,
een wieetvolla Steen, dee hoolen woat.
Wäa Gloowen helt, woat nich ut Angst tekjen. #Psa 118,22; Jes 7,9; Efs 2,20
17Ekj woa aufmäten auf rajcht jedonen woat,
un aus met een Bliejewicht aufschazen waut opprechtich es.
Daut woat sennen aus wan de Hoagel
jun Schutz von Läajes tweijeschloagen haft,
un eene Äwaschwamunk en jun Hus nenjekomen es. #Hiob 38,22-23
18Jun Bunt met däm Doot un daut Doodenrikj
woat to Enj komen un nuscht wieet sennen.
Wan de groota Schoden komen woat,
woat dee junt dolschlonen.
19Jiedatsmol wan dee kjemt, woat dee junt wajchfieren.
Daut woat Dach fa Dach äwa junt komen;
jie woaren daut Dach un Nacht uthoolen motten.
Un wan jie de Norecht to Hoat nämen woaren,
woat junt daut gruslich grulen.
20Dan woat daut sennen soo aus jie noch emol sajen:
Daut Bad es too kort toom sikj utstrakjen,
un de Dakj es too schmaul toom sikj enrollen.
21De Har woat sikj äwahäa moaken aus emol opp däm Boajch Perazim,
hee woat aungonen aus emol em Gibeon Tol.
Hee woat siene Oabeit derchfieren,
oba woo framd schient ons de Oabeit.
Hee woat siene Sach nogonen,
oba woo butajeweenlich es de Sach. #2Sam 5,20; 1Chr 14,11.16
22Dan lot nu no met jun spotten,
daut june Kjäd nich fausta jetrocken woat;
wäajen Gott de Har, dee aules rejieet,
haft mie weeten jeloten
daut een grootet vedoawen
äwa daut gaunze Launt komen woat. #Jes 10,22-23
23Horcht no waut ekj saj,
un paust opp waut ekj vetal:
24Wan de Foarma verem seien plieecht,
blift hee dan en eent biem plieejen un opplokren?
25Es daut nich leewa,
daut wan hee jeoabeit haft,
dan plaunt hee Dell un Peetaselje,
un seit Weit un Joascht wua hee daut well,
un Spelz delenjd de Kaunten?
26Sien Gott haft am dän rajchten Wajch jelieet;
dee haft am daut kloa jemoakt.
27Un de Dell woat nich met de Schlap jedrascht,
un de Päpakjieena nich met eene Waulz.
De Dell woat met eenen dennen Stock jeklopt,
un de Päpakjieena met dän kjlienen Kloppstock.
28Daut Jeträajd, waut Brootmäl jäwen saul,
woat nich en eent wajch jepitscht un veklunjt,
soo daut et aula fien schleit;
daut Pieet un de Utfoasteen foaren doa bloos,
bat daut eemol utjedrascht es.
29Dee Har, dee aules rejieet,
haft uk doatoo daut Vestentnis jejäft;
sien Rot es wundaboa;
sien Wajch kjemt emma goot ut.
Currently Selected:
Jesaja 28: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
