Jesaja 15
15
Daut Jerecht äwa Moab
1Dit es woo daut met Moab gonen woat:
Äwa Nacht, woat Ar enne Grunt jebrocht,
un daut es daut Enj von Moab.
Äwa Nacht, es Kir enne Grunt jebrocht,
un daut es daut Enj von Moab.
2De Lied von Dibon gonen no äaren Tempel,
un hielen bie äare huage Opfastäden.
Äwa däm Nebo Boajch un en Medeba
hielen de Moabita.
Een jiedra haft sienen Kopp koljeschoaren,
un sikj dän Boat aufjeschnäden.
3Oppe Gaussen gonen see en Sakkjleeda jekjleet,
opp äare Däakja un enne Staut
truaren see aula un weschen sikj de Tronen.
4En Heschbon un en Elale schrieen de Lied,
daut et bat en Jahaz to hieren es;
un doawäajen schrieen de stoakje Soldoten
en Moab un an veschort de Moot. #(4-9) Jes 16,9-11
5Mie deit daut Leet om Moab,
äare Flichtlinja flichten no Zoar,
un bat Eglat Schelischija.
See gonen opp dän Boajch no Luhit un hielen;
oppem Wajch no Horonajim schrieen see en Trua.
6De Nimrim Riefa es drieech,
un de Stap haft kjeen Graus;
de junge Plaunten sent vewalkjt,
un aulet Jreens es veschwungen.
7Waut see sikj toopjeoabeit hauden
un aules waut see wajchjelajcht hauden,
droagen see wajch
äwa dän Wieden Riefa.
8Bie jieda Jrens woat jehielt;
äa schrieen kjemt bat Eglajim,
äa schrieen kjemt bat Beer Elim.
9Daut Wota bie Dimon es voll Bloot,
doch jäw ekj Dimon noch mea;
mucht een Leiw opp dee komen waut von Moab wajchkomen,
un dee waut em Launt äwabliewen.
Currently Selected:
Jesaja 15: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
