Hosea 12
12
Soo hinjarigjsch aus Jakob
1En Efraim sent emma wada Läajes jäajen mie,
un de Israeliten heichlen mie väa;
Juda jeit wajch von Gott,
un von däm Heiljen, dee tru es.
2Efraim recht sikj nom Wint,
un jajcht dän dachäwa dän Oostwint hinjaraun;
see lieejen aule Dach dolla,
un eewen mea Jewault.
Eemol moaken see een Bunt met Assur,
daut näakjste mol brinjen see Eelj no Ägipten. #Hos 5,13
3De Har brinjt Juda ver daut Jerecht,
hee woat Jakob siene Nokomen strofen
fa daut, waut see jedonen haben,
un doafäa, woo hee jewast es.
4Em Muttalief zankt hee
sikj met sienen Brooda,
un aus hee een Maun wia,
street hee sikj met Gott. #1Mo 25,22.26; 32,25-29
5Hee rauzt sikj met een Enjel,
un leet sikj nich dol schmieten,
oba hield un prachad.
Bie Betel troff hee Gott,
un doa hieed hee am uk räden. #1Mo 35,15
6De Gott, dee aules rejieet,
sien Nomen es, de Har,
säd to am: #Psa 83,19
7Komm trigj no dienen Gott;
sie truhoatich leeftolich,
un stal diene Sachen trajcht;
velot die gaunz opp dienen Gott.
8Du best een Hendla
met eene faulsche Wichtschol,
un schummelst wellich.
9Efraim sajcht sikj:
Ekj sie rikj un hab nu Macht;
en aules waut ekj jedonen hab,
woat kjeena met dän Finja wiesen
opp soont waut Sind es. #Opb 3,17
10Ekj sie de Har dien Gott,
aul von dan aus du en Ägipten wieescht,
un woa die wada loten en Zelten wonen,
soo aus to jane Tiet. #Hos 13,4
11Ekj räd to de Profeeten,
un hab an foaken jewäsen, woo daut sennen sull;
ekj jeef de Profeeten äare Bildasproak.
12En Gilead eewen see oppscheiseljet,
un doafäa woaren see unjagonen;
en Gilgal opfren see Ossen,
un doawäajen woaren äare Aultoaren
to Steenaklompes oppe Stap woaren. #Hos 6,8; 9,15
13Jakob must no Aram flichten,
Israel deed Vee heeden om sikj siene Fru to vedeenen, #1Mo 27,43; 28,5; 29,20
14un lota, brocht de Har de Israeliten,
derch eenen Profeet ut Ägipten, rut.
Hee deed an met een Profeet heeden. #2Mo 3,10
15Nu es hee äwa Efraim vebettat,
un de Har woat äare Schult
loten äwa an trigjkomen;
hee woat an doafäa trigjtolen,
daut see soo frajch jewast sent.
Currently Selected:
Hosea 12: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
