1. Mose 37
37
Aus Josef noch Tus wia
1Jakob wond en daut Launt Kanaan, wua sien Voda uk jewont haud. 2Hia es de Jeschicht von Jakob siene Famielje.
Aus Josef 17 Joa oolt wia, deed hee met siene Breeda toop daut Vee heeden. Hee schauft met Bilha un Silpa äare Säns. Dan kloagd Josef to sienen Voda äwa siene Breeda.
3Jakob jleicht Josef dolla aus irjent sest eenen von siene Kjinja, wiels Josef kjlien wia aus Jakob aul ella jeworden wia. Un Jakob muak Josef eenen schmocken Rock. 4Aus siene Breeda sagen daut de Voda am bäta jleicht aus an, stieed an daut un see kunnen nich mea frintlich to am räden. 5Nu neem sikj daut soo rom, daut Josef eenen Droom haud un daut hee siene Breeda dän vetald. De Droom muak de Breeda noch hasselja. 6Hee säd: Horcht emol no mienen Droom. 7Wie brochten aula Goawen toop oppem Flekj. Un jrodsoo met eemol recht miene Goaw sikj steil aun, un june kjeemen rom dee, un kjneeden sikj ver miene Goaw. 8Un siene Breeda säden: Meest du daut du äwa ons rejieren woascht? Meest du, du woascht Macht äwa ons haben? Aus hee an disen Droom vetald, worden de Breeda noch hasselja. 9Un Josef haud noch eenen Droom un vetald siene Breeda dän. Hee säd: Horcht emol. Ekj hab noch wada jedreemt. Dit mol kjneeden sikj de Sonn un de Mon un alw Stierns ver mie. 10Aus hee sienen Voda un siene Breeda dän Droom vetald, schull sien Voda am un säd: Waut es dit fa een Droom? Sullen ekj un diene Mutta un diene Breeda ons werkjlich ver die bat oppe Ieed kjneeen? 11Un siene Breeda wieren am aufjenstich. Oba sien Voda behilt dit aula.
12Josef siene Breeda wieren en de Jäajent von Sichem jegonen met äaren Voda siene Häaden. #1Mo 33,18-19 13Un Jakob säd to Josef: Diene Breeda sent met daut Vee no Sichem jegonen. Komm, ekj well haben du saust doahan gonen. Un hee säd: Ekj sie reed. 14Un Jakob säd: Dan go un see auf aules goot jeit met an un met de Häaden. Un komm trigj un saj mie daut. Un hee jinkj vom Hebron Tol un kjeem no Sichem. #1Mo 35,27 15Een Maun troff am aus hee doa oppe opne Stap romjinkj, un dee fruach am: No waut sieekjst du? 16Un hee säd: Ekj sieekj miene Breeda. Kaust du mie veleicht sajen, wua see äa Vee heeden? 17Un de Maun säd: Dee sent wieda jegonen von hia. Ekj hieed an sajen, see wullen no Dotan gonen. Un Josef jinkj an hinjaraun un funk an bie Dotan.
18Oba aus hee noch een Enj auf wia, sagen see daut hee kjeem, un see beräden sikj am doot to moaken. 19Un see säden eena toom aundren: Hia kjemt ons Dreema. 20Horcht emol. Well wie am doot schlonen un en eene von de Zistren nenn schmieten. Tus saj wie, daut een willet Tia am oppjefräten haft. Dan woa wie seenen waut von siene Dreem woaren woat. 21Oba aus Ruben dän Plon hieed, proowd hee Josef sien Läwen to raden un säd: Well wie am oba nich doot moaken. #1Mo 42,22 22Un hee säd: Well wie nich een Mensch doot moaken. Well wie am hia enne Wiltnis en eene Zista schmieten, oba doot am nuscht aundret aun. Ruben wull am soo daut Läwen raden un am trigj no äaren Voda brinjen.
23Un aus Josef no siene Breeda kjeem, neemen see am sienen Rock auf, dän besonda schmocken Rock, dän hee brukt, #1Mo 37,3 24un see neemen un schmeeten am en eene Zista. De Zista wia drieech. Doa wia kjeen Wota doabennen. 25Dan saden de Breeda sikj dol toom äten. Oba aus see oppkjikjten, sagen see eene Grupp von Ismaeliten opp Kameelen dee von Gilead kjeemen. Dee fieeden diere scheenrikjenden Kjeen un Baust opp äare Kameelen no Ägipten. 26Un Juda säd to siene Breeda: Waut wudd ons daut halpen, wan wie onsen Brooda doot moaken? Wie brochten doamet bloos Mortschult opp ons. 27Well wie am leewa aun de Ismaeliten vekjeepen. Well wie am nuscht aundoonen, hee es je ons ieejna Brooda. Un siene Breeda horchten no am. 28Un waut Haundelsmana, Ismaeliten von Midian, kjeemen doa vebie, un Josef siene Breeda hoowen Josef ut de Zista rut un vekoften am aun de Ismaeliten fa 20 Selwastekja. Un dee neemen Josef no Ägipten. #1Mo 25,2; 3Mo 27,1-8
29Aus Ruben trigj no de Zista jinkj un sach daut Josef nich doa wia, muak am daut soo truarich, soo daut hee siene Kjleeda twei reet. 30Hee jinkj trigj no siene Breeda un säd: De Jung es wajch! Waut saul ekj bloos doonen? 31Un see neemen Josef sienen Rock un dukten dän en waut Bloot von eene Kos dee see jeschlacht hauden. 32Un see neemen dän schmocken Rock no äaren Voda un säden: Wie haben dit jefungen. Besee die dän un see auf daut dienen Sän siena es. 33Un hee sach daut dit dee Rock wia, un hee säd: Dit es mien Sän sien Rock. Dee mott von een willet Tia vefräten sennen. Josef, mien Sän, es secha veräten worden. #1Mo 37,20 34Dan vereet Jakob siene Kjleeda en Trua, un trock sikj Sakkjleeda rome Lint. Hee truad eene lange Tiet fa am. 35Un aul siene Säns un siene Dajchta vesochten am to treesten, oba kjeen Troost schluach bie am aun. Hee säd: Ekj woa fa mienen Sän truaren bat ekj selfst no daut Doodenrikj go. Soo truad de Voda fa sienen Sän.
36Em tweschen Tiet vekoften de Midianita Josef en Ägipten aun Potifar, eena von däm Kjennich siene aunjestalde, de bowaschta von däm Kjennich siene Wajchta.
Currently Selected:
1. Mose 37: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.