1. Mose 38
38
Juda un Tamar
1Dan kjeem daut, daut Juda em Tol nenn trock, wajch von siene Breeda. Hee wond doa met eenen Maun von Adullam, dee Hira heet. 2Un en de Jäajent troff Juda eene Mejal, dee Schua, eenen Kanaanita, siene Dochta wia. Un hee befried sikj met ar un see wieren Maun un Fru. 3Juda un de Fru hauden eenen Sän, un see nanden am Er. 4Un see hauden noch eenen Sän, dän nanden see Onan. 5Un see hauden noch eenen dredden Sän, dän see Schella nanden. Om dise Tiet wonden see en Kessib.
6Juda neem eene Fru fa sienen ieeschtjebuarnen, Er. Dee Schwieedochta äa Nomen wia Tamar. 7Un Er wia schlajcht, un däm Harn jefoll daut nich, soo daut de Har am stoawen leet. 8Un Juda säd to Onan: Go en läw met dienen Brooda siene Fru un doo diene Fliet aus een Schwoaga fa ar, daut dien Brooda soo Nokomen kjricht. #5Mo 25,5-10 9Oba Onan wist, daut de Sän nich wudd siena sennen, un doawäajen, aus hee met ar ligjen jinkj, leet hee dän Somen oppe Ieed faulen, soo daut sien Brooda nich wudd Nokomen haben. 10Dit jefoll däm Harn schlajcht un hee leet Onan uk stoawen. 11Dan säd Juda to Tamar, siene Schwieedochta: Bliew aus eene Wätfru en dienen Voda sien Hus bat mien Sän Schella groot es. Hee haud Angst daut dee uk met eemol stoawen wudd, soo aus siene Breeda. Un Tamar jinkj un läwd en äa Voda sien Hus.
12No eene jewesse Tiet storf Juda siene Fru, dee Schua siene Dochta wia. No siene Truatiet, jinkj hee no Timna wua siene Mana Schop schäaden. Hee jinkj toop met sienen Frint, Hira von Adullam. 13Dan aus Tamar daut to hieren kjrieech daut äa Schwieevoda no Timna jinkj toom Schop schäaren, #Jos 15,57 14läd see äare Wätfrukjleeda tosied, un trock sikj jeweenelje Kjleeda aun. See bedakjt äa Jesecht un jinkj un saut buta de Staut, wua de Wajch von Enajim no Timna jeit. See wist aul daut Schella oppjewossen wia, un daut see nich jenomen wia aus eene Fru fa am. 15Aus Juda ar sach, docht hee see wia eene Hua, wiels see äa Jesecht bedakjt haud. 16Hee jinkj no ar aun de Kaunt Wajch un säd: Komm. Lot mie met die schlopen. Hee wist daut nich daut dit siene Schwieedochta wia. Un see säd: Waut woascht du mie doafäa jäwen, wan du met mie schlopen woascht? #3Mo 18,15 17Un hee säd: Ekj woa die eene kjliene Kos von miene Häad jäwen. Un see säd: Waut woascht du mie birjen daut du dee schekjen woascht? 18Un hee säd: Waut saul ekj birjen? See säd: Dien Rinkj met dän Baunt un dien Gonstock. Un hee jeef ar dee, un hee lach met ar. Boolt doaropp wort ar kloa daut see schwanga wia. 19Aus Juda wajchjinkj, jinkj see uk äaren Wajch un neem daut Duak, waut see äwa äa Jesecht haud auf, un trock sikj äare Wätfru Kjleeda aun.
20Juda schekjt dan de Kos met sienen Frint, von Adullam, om daut Jebirjde trigj to kjrieen, oba hee funk ar noanich. 21Un hee fruach de Mana doa: Wua es de Hua, dee aun de Kaunt Wajch bie Enajim saut? Un dee säden: Hia es kjeene Hua jewast. 22De Adulamita jinkj dan trigj no Juda un säd: Ekj hab ar nich jefungen, un de Mana von doarom sajen, doa es kjeene jewast. 23Un Juda säd: Du weetst daut du ar nich finjen kust, aus wie ar de kjliene Kos schekjten. Lot ar de Dinja fa sikj hoolen, daut see ons nich utlachen.
24Ojjefäa dree Moonat lota kjrieech Juda eene Norecht daut Tamar, siene Schwieedochta, dee sikj aus eene Hua haud oppjestalt, daut see nu schwanga wia. Un Juda säd: Brinjt ar äwadäl. Dee saul vebrent woaren. 25Un aus see ar väabrochten, schekjt see eene Norecht no äaren Schwieevoda: Derch dän Maun, däm dise jehieren, sie ekj schwanga. Un see säd: Kjikj emol wäm sien Rinkj met däm Baunt un wäm sien Gonstock dit sent. 26Juda bekjand fuaz, daut et siene wieren, un säd: See es dolla em rajchten aus ekj, wiels ekj ar nich mienen Sän Schella jejäft hab. Un hee lach nich mea met ar.
27Aus daut bat doa wia, daut daut Kjint jebuaren wort, wia daut een Poakje. 28Un aus see dee Weedoag haud, kjeem een Hauntje rut, un de Weemutta bunk eenen rooden Baunt aun daut Hauntje. See säd: Disa es de ieeschta. 29Dan oba trock daut Hauntje trigj un sien Broodakje wort jebuaren. Un see säd: Soo brakjst du derch! Doawäajen nanden see am Perez. #Rut 4,18; Mat 1,3 30No daut wort sien Brooda jebuaren, dee dän rooden Baunt aun de Haunt haud. Dän nanden see Serach.
Currently Selected:
1. Mose 38: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.