1. Mose 26
26
Isaak un Rebecka en Gerar
1Nu kjeem noch eemol eene Hungaschnoot em Launt, eene aundre aus dee to Abraham siene Tiet. Un Isaak trock no Gerar, wua Abimelech Kjennich äwa de Filista wia. 2Un de Har kjeem no am un säd: Go nich rauf no Ägipten. Bliew en daut Launt, woont ekj die sajen woa. 3Bliew aus framda en dit Launt, un ekj woa met die sennen un die säajnen. Ekj well die un diene Nokomen dit gaunze Launt jäwen, un ekj woa mienen Eit, dän ekj to dienen Voda Abraham jeschwuaren hab, utfieren. #1Mo 17,19; 22,16.17 4Ekj woa die soo väl Nokomen jäwen aus doa Stierns aum Himmel sent, un ekj woa diene Nokomen dise gaunze Jäajent jäwen. Derch diene Nokomen woaren aule Velkja oppe Ieed jesäajent. #1Mo 15,5 5Dit es wäajen Abraham miene Wieed jehorcht un hee miene Jesazen un Väaschreften hilt. 6Soo läwd Isaak en Gerar. 7Aus de Mana en de Jäajent no siene Fru forschten, säd hee: Daut es miene Sesta. Hee haud Angst to sajen, daut see siene Fru wia, wiels ar leet daut schmock, un hee docht de Mana wudden am wäajen ar ombrinjen.
8Aus see dan ieescht een stoot wieren doa jewast, kjikjt Abimelech de Filista Kjennich eenen Dach utem Fensta un sach daut Isaak siene Fru Rebecka omfoot. 9Doaropp roopt Abimelech Isaak un säd: Kjikj emol, daut es diene Fru! Wuarom sätst du to mie, daut see diene Sesta wia. Un Isaak säd: Ekj docht, aundasch brinjen see mie wäajen ar noch om. 10Un Abimelech säd: Waut hast du ons met dit aunjedonen? Eena von onse Mana haud ar nämen kunt, un dan haud wie, derch waut du sätst, Schult opp ons jebrocht. 11Dan woarnd Abimelech aul siene Menschen un säd: Deejanja, dee disen Maun ooda siene Fru aunschieet, saul doot jemoakt woaren.
12Isaak seid en daut Launt un kjrieech daut Joa eene hundat dobbelde Arnt. De Har säajend am, #Spr 10,22 13daut hee rikja un rikja wort. Hee wia eefach sea goot auf. 14Hee haud Häaden von Schop un Vee un sea väl Deena, soo daut de Filista am aufjenstich worden.
15De Filista hauden aul de Borms, dee Isaak sien Voda Abraham siene Deena to äare Tiet jegroft hauden, voll Ieed jeschett. #(15-33) 1Mo 21,22-34 16Un Abimelech säd to Isaak: Trakj von onse Jäajent wajch, wiels du best väl stoakja aus wie. 17Dan trock Isaak wieda von doa, un loagad sikj em Gerar Tol. 18Un Isaak growd de Borms op, dee to sienen Voda Abraham siene Tiet, jegroft wieren. De Filista hauden dee no sien Voda sienen Doot toojeschoaft. Isaak jeef de Borms de selwje Nomes, dee Abraham dee jejäft haud. 19Oba aus Isaak siene Deena em Tol eenen Borm growden un goot Wota kjrieejen, 20kjeemen de Hoads von Gerar un streeden sikj met Isaak siene Hoads. See meenden daut Wota wia äat. Isaak nand dän Borm Essek, wiels see sikj doa streeden. 21See growden noch eenen Borm un streeden sikj uk äwa dän. Dän nanden see Sitna. 22See trocken von doa wieda un growden noch eenen Borm, un äwa däm streeden see sikj nich. Disen Borm nanden see Rehobot. Isaak säd: Ekj jeef de Städ dän Nomen, wiels de Har haft ons Rum jejäft, daut wie ons hia oppbuen kjennen.
23Von doa trock Isaak no Beerscheba. 24Doa kjeem de Har no am de ieeschte Nacht un säd: Ekj sie dien Voda Abraham sien Gott. Hab nich Angst. Ekj sie met die un woa die säajnen un väl Nokomen jäwen, om Abraham sient haulwen, dee mie deend. 25Doaropp bud hee doa eenen Aultoa un bäd däm Harn aun. Doa stald Isaak sien Zelt opp un siene Deena growden doa eenen Borm. #1Mo 12,8
26Dan kjeem Abimelech de Kjennich von Gerar met Ahusat, sien Rotjäwa, un Pichol, de Kommandaunt von siene Armee, no Isaak. 27Un Isaak säd to an: Wuarom kom jie no mie, no däm, daut jie mie fientlich behaundelden un mie von junt wajch schekjten? 28Un see säden: Wie kjennen daut kloa seenen daut de Har met die es. Nu kom wie no die daut wie ons eenjen kjennen. Well wie met een Eit eenen Bunt moaken. #5Mo 29,3; Mat 13,13 29Vespräakj ons, daut du ons kjeen Schoden aundoonen woascht, krakjt soo aus wie die nuscht buta goodet jedonen haben, un die en Fräd wieda jeschekjt haben. Du best nu dee däm de Har säajent. 30Un Isaak muak eene Moltiet fa an, un see eeten un drunken. 31Tiedich dän näakjsten Morjen stunden see opp un vespruaken met eenen Eit, daut see sikj unja eenaunda frädlich wudden sennen. Dan neemen see Aufscheet von Isaak un veleeten frädlich.
32Dän selwjen Dach kjeemen Isaak siene Oabeida un säden am, daut see eenen Borm jegroft hauden un Wota jefungen hauden. 33Isaak nand dän Borm Scheba. Doawäajen wort de Staut Beerscheba jenant.
34Aus Esau 40 Joa oolt wia, neem hee Beeri däm Hetita siene Dochta Jehudit, un Elon däm Hetita siene Dochta Basemat aus siene Frues. #1Mo 36,2-3 35Dit wia Isaak un Rebecka sea schwoa.
Currently Selected:
1. Mose 26: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.