1. Mose 25
25
Abraham siene latste Joaren
(1Chr 1,32-33)
1Abraham haud dan noch eene Fru; daut wia Ketura. 2Abraham un Ketura hauden de Säns Simran, Jokschan, Medan, Midian, Jischbak, un Schuach. 3Jokschan wia Saba un Dedan äa Voda. Dedan siene Nokomen wieren de Aschurita, de Letussita un de Leumita. 4Midian siene Säns wieren Efa, Efer, Henoch, Abida, un Eldaa. Aul dit sent Nokomen von Ketura. 5Abraham vemuak aules waut hee haud opp Isaak. 6De Säns, dee hee met siene Näbenfrues haud, jeef hee Jeschenkja aus hee noch läwd un schekjt dee nom Oosten, wajch von Isaak, om Launt to finjen.
7Abraham läwd 175 Joa. #1Mo 12,4 8Abraham wia goot oolt jeworden un storf no een vollet Läwen. Abraham wort met dee toop begroft, dee aul ea jestorwen wieren. #1Mo 15,15 9Siene Säns, Isaak un Ismael, begrowden am enne Heel bie Machpela, oosten von Mamre. Daut wia je däm Hetita Zohar sien Sän Efron siene Stap jewast, #(9 un 10) 1Mo 23,13-20 10un Abraham haud am dee aufjekoft. Abraham wort doa begroft, wua siene Fru Sara begroft wia. 11No däm daut Abraham storf, säajend Gott sienen Sän Isaak. Isaak wond bie Beer-lahai-roi. #1Mo 17,19; 24,62
Ismael sien Famieljen Rejista
(1Chr 1,28-31)
12Dit sent Ismael siene Nokomen. Ismael wia Abraham un Hagar äa Sän, un Hagar wia Sara äare ägiptische Kjäakjsche. #1Mo 21,13 13Dit sent no de Rieej vom elsten, Ismael siene Säns: Nebajot wia Ismael sien ieeschtjebuarna, dan Kedar, Adbeel, un Mibsam, 14Mischma, Duma, Massa, 15Hadad, Tema, Jetur, Nafisch, un Kedma. 16Dit sent de Nomes von Ismael siene Säns, soo aus dee en äare Darpa un Jäajenden bekaunt sent. Doa sent twalw Stam, jieda met äaren Staumvoda. #1Mo 17,20; 4Mo 1,44 17Ismael wort 137 Joa oolt. Dan storf hee un hee wort met dee begroft, dee aul ea jestorwen wieren. 18Ismael siene Nokomen wonden en de Jäajent tweschen Hawila un Schur, oosten von Ägipten no Assierien opptoo. Dee läwden aula jäajenäwa von äare Breeda. #1Mo 16,12
Isaak un Rebecka äare Kjinja
19Dit es de Jeschicht von Isaak, Abraham sien Sän. 20Isaak wia 40 Joa oolt aus Rebecka siene Fru wort. Rebecka äa Voda wia Betuel, de Aramäa von Mesopotamien, un Laban, de Aramäa, wia äa Brooda.
21Dan bäd Isaak fa siene Fru, wiels see kjeene Kjinja haben kunn. Un de Har horcht no daut Jebäd, un Rebecka wort schwanga. 22De Kjinja streeden sikj em Muttalief, un see säd: Wuarom jeit mie daut soo? Un see jinkj un fruach däm Harn, 23un dee säd ar:
Doa sent twee Velkja en dien Muttalief,
dee sent vom Aunfank aun veschieden.
Eena woat stoakja sennen aus de aundra;
de Elra saul dän jinjren deenen. #1Mo 27,29; Mal 1,2; Reema 9,10-12
24Aus äare Tiet dan om wia, haud see een Poakje. 25De ieeschta waut to Welt kjeem, wia sea rodlich un uk hoarich, un see nanden am Esau. 26Dan wia daut aundre jebuaren, un dee hilt Esau siene Hak enne Haunt. Däm nanden see Jakob. #25,26 Daut bediet dee, dee däm aundren siene Städ en nemt Isaak wia 60 Joa oolt aus de Junges jebuaren worden. #Hos 12,4
27Aus de Junges naun wossen, wia Esau een jeschekjta Jäaja un wist sikj goot oppe opne Stap. Jakob wada wia een ruja Mensch un wia jieren tus. 28Isaak jleicht Esau un daut wille Fleesch waut dee no Hus brocht, un Rebecka jleicht Jakob.
29Eemol aus Jakob eenen Gropen met Borscht koakt, kjeem Esau utjehungat von buten nenn. 30Un Esau säd to Jakob: Jeff mie waut von dienen rooden Borscht. Ekj sie vehungat. Doawäajen nanden see am uk Edom. #25,30 Daut bediet Rodlich 31Un Jakob säd: Vemoak mie ieescht dien Jeburtsrajcht. 32Un Esau säd: Ekj sie aum stoawen! Waut nuzt mie mien Jeburtsrajcht? 33Un Jakob säd: Vespräakj mie daut met een Eit. Un Esau muak een Eit un vemuak Jakob sien Jeburtsrajcht. #1Mo 27,36; Heb 12,16 34Dan jeef Jakob Esau Broot un Borscht von riepe Schaublen. Un Esau eet un drunk un stunt opp un jinkj doavon. Soo jlikjeltich wia Esau äwa sien Jeburtsrajcht.
Currently Selected:
1. Mose 25: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.