Hesekiel 42

De Priesta Stowen

1Un hee brocht mie en dän Väahoff nenn, no de nuadne Sied, jäajenäwa vom Tempelhoff un de Stowen nuaden vom Tempel. #(1-3) Hes 40,17; 41,9-10.13 2Daut Jebied, daut nuaden vom Tempel stunt, wia 100 Ellen lank un 50 Ellen breet. 3Aun eene Sied wia daut jäajen dän opnen Plauz vom Bennahoff, dee 20 Ellen breet wia, un de aundre Sied wia jäajen dän Väahoff. Daut Jebied wia opp dree veschiedne Hechten, eent aum aundren. 4Em Bennahoff wia doa een Stich velenjd de Stowen. Dee wia 10 Ellen breet un 100 Ellen lank. De Däaren wieren aun de nuadne Sied. 5De Stowen en de bowaschte Rieej wieren schmaula aus dee en de aundre beid Rieejen, wiels de Hechten nich jenuach Rum jeloten hauden. 6De dree Rieej, eene een bät hecha aus de aundre, hauden nich Past, soo aus de Stowen em Bennahoff. Un nu wieren de bowaschte Stowen kjarta aus de meddelste Rieej un de unjaschte Rieej. 7Buten aun de Sied nom Väahoff ver de Stowen, wia eene Mia von Steena, dee 50 Ellen lank wia. 8De Stowen, waut opp dän Väahoff kjikjten, wieren 50 Ellen lank, un de Stowen aun de Tempel Sied wieren 100 Ellen. 9Unjen aun de Stowen wia een Gank, dee nom Oosten, nopp op wia, toom vom Väahoff doa nenn to gonen. 10Aun de siedne Sied, jäajen de Mia vom Väahoff un jäajen dän opnen Plauz em Bennahoff, wieren uk soone Stowen. 11Un ver de Stowen wia een Gank, krakjt soo aus aun de nuadne Sied. Un aules wia krakjt soo lank un soo breet, met krakjt soone Däaren un Enrechtungen un Jenj. 12Un eena jinkj krakjt soo vom Väahoff en daut oostne Enj von dän Gank aun de siedne Sied von de Stowen. Un doa wia krakjt soone Mia delenjd.

13Un de Maun säd to mie: De Stowen aun de nuadne Sied un de Stowen aun de siedne Sied Jebied, dee oppem Väahoff komen, sent de heilje Stowen fa de Priestasch dee ver däm Harn komen, un dit es wua de Priestasch de aulaheilichste Opfa äten. Hia brinjen see daut aulaheilichste Opfa, daut Speisopfa, daut Sindopfa un daut Schultopfa han, un dise Städ es heilich. 14Un wan de Priestasch em Heilichtum nengonen, sellen see nich fuaz em Väahoff komen. See sellen sikj en de Stowen äare Kjleeda, en dee see jedeent haben, auftrakjen. De Kjleeda sent heilich. Un see sellen sikj doa äare aundre Kjleeda auntrakjen, ea see rutgonen wua daut Volkj es. #Hes 44,19

15Un aus hee aulawäajen em Tempel jemäten haud, brocht hee mie rut derch daut oostne Puat, un maut woo wiet daut runtom däm Hoff wia. 16Un hee maut de oostne Mia, un dee wia 500 Lenjd von sienen Motstock. 17Un de nuadne Sied maut uk 500 Lenjd von sienen Motstock, 18un de siedne Sied wia uk 500 Lenjd von sienen Motstock. 19Un hee jinkj no de wastne Sied, un dee maut uk 500 Lenjd von sienen Motstock. 20Hee maut jieda eene von de vea Sieden. Un doa wia eene Mia runtom em veakaunt, 500 Lenjd vom Motstock aun jieda Sied. Soo wia daut Heilje, von daut waut nich heilich es, oppoat jesat.

Currently Selected:

Hesekiel 42: PB

Highlight

Copy

Compare