Hesekiel 31
31
Äwa Ägipten
1Aun dän 1. Dach von de 3. Moonat en daut 11. Joa, wort mie kloa, waut de Har to sajen haud. Hee säd: 2Menschensän, saj emol to däm Kjennich von Ägipten un to sien grootet Volkj:
Wäa wia noch soo groot un stoakj aus du?
3Horch emol no waut ekj saj:
Die jeit daut aus een Boom
en Libanon, dee straum
voll Asta stunt un dicht
met Loof bewossen wia,
un huach no de Wolkjen rieekjt.
4Dee woss soo steil un groot,
wiels deepet Wota kjwald
runtom en Streem vebie,
un wessad wieda oppe Stap
uk aundre Beem.
5Soo woss dee jrata aus
sest Beem opp jane Stap;
de Asta wieren lank
un stoakj un dikj belooft,
vom Wota en de Grunt.
6De Väajel saden sikj
en Nasta opp jieda Aust,
un Tieren trocken junge opp
em Schauten von däm Boom.
Un jieda grootet Volkj
wond unja disen Boom.
7De Boom wia groot un schmock,
haud lange Asta rut;
de Wartlen jinjen rauf
wua scheenet Wota lach.
8Kjeene Zeeda, waut doa noch
en Gott sien Goaden wieren,
leeten krakjt soo schmock aus dee.
Kjeen Fichtenboom sien Aust
wia met disen Boom to vejlikjen.
Platanen Asta sent
aus nuscht biesied dit hia.
En Gott sien Goaden wia
nich noch een Boom, dee doa
soo schmock jewossen wia.
9De Har muak dän soo schmock
voll straumet schmocket Loof,
daut jieda Boom dän Gott
en Eden haud jesat,
aufjenstich von dit wieren.
10Un nu sajcht Gott de Har: Wiels hee soo groot wort un siene Asta bat enne Wolkjen nenn rieekjten, un sikj dan groot deed, daut hee soo huach jewossen wia, 11leet ekj de Macht von daut stoakjste von de Velkja opp am komen, daut dee äwa an häajinjen un an bestroften fa daut beese, waut see jedonen hauden. Un ekj vedreef an. 12Soone framde, dee daut jewaultmässichste von de Lenda sent, schmeeten an om un leeten an ligjen. Siene Asta follen oppe Boaj un enne Täla, un sien Struck wia fien vebroaken en aule Läachten em Launt. Aul de Velkja oppe Ieed, dee äaren Schauten doa jekjräajen hauden, musten aundatwäajes hangonen. 13De Väajel kjeemen un saden sikj opp däm jefolnen Boomstaum, un de wille Tieren läden sikj oppe Asta dol. 14Aul dit passieet, soo daut kjeen Boom, waut goot jewessat es, woat soo groot waussen un siene Spetz bat enne Wolkjen rieekjen, un soo huach oppjehowen woaren. Soo aus jieda Boom, dee biem Wota to stonen kjemt, omfaulen un vekomen woat, soo woat de Macht von jieda Volkj tofaul komen un vefulen, soo aus uk aule Menschen.
Een jiedra mott emol stoawen
un rauf jelajcht enne Ieed,
soo jeit daut met aule Menschen,
soo haft Gott daut enjefieet.
15Dit es waut Gott de Har sajcht: Aun dän Dach wan de Boom stoaft un deep enne Ieed to ligjen kjemt, woa ekj daut Gruntwota loten äwa am truaren un de Riefasch woaren opphieren met ranen, soo daut väle groote Wotasch vegonen. De Libanon Woolt woat sea truaren äwa am, un aule Beem oppe Stap woaren vedrieejen. 16Aule Velkja woaren sikj schudren wan see hieren woo dee felt, un daut hee jestorwen un begroft es. Un unjare Ieed, treesten sikj aule Beem von Eden, un uk aul de schmokste un de baste von Libanon, dee bie een Wota jestonen hauden. #(16 un 17) Hes 28,8 17Aule Kjennichs woaren äwareen em Doot nengonen, soo aus dee waut em Kjrich follen; un dee, dee sikj met Ägipten hilden, woaren krakjt soo stoawen. 18Wia doa en Eden wua een Boom, dee soo groot un soo stoakj wia? Oba du woascht met de Beem von Eden toop begroft woaren, un met dee toop to ligjen komen, dee nich beschnäden sent ooda dee em Kjrich omkomen. Daut es woo däm ägiptischen Kjennich un sien stoltet Volkj daut gonen woat, sajcht Gott de Har.
Currently Selected:
Hesekiel 31: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
