Hesekiel 30

Gott woat Ägipten strofen

1Un dan wort mie wada kloa, waut de Har to sajen haud. Hee säd: 2Menschensän, go un profezei to de Menschen un saj: Dit es waut Gott de Har sajcht:

Hielt un sajcht:

Woo woat daut bloos

aun janen Dach gonen.

3Daut kaun nich mea lang dieren,

un dan woat de Har sikj seenen loten.

Daut woat een diestra Dach sennen

un sea schlemm sennen fa de Velkja. #Joel 1,15; Zef 1,14

4Doa woat een Kjrich opp Ägipten komen,

un en Kusch woaren see sikj grulen,

äwa de Doodes en Ägipten.

Aul äare goode Sachen woaren jestolen woaren,

un äaren Grunt woat oppjebroaken woaren.

5Kusch un Putt un Lud, met veschiednet framdet Volkj, un Kub, met dee waut sikj met an toop hoolen, woaren aula unja daut Schwieet komen. #Jer 46,9

6Dit es waut de Har sajcht:

Aul dee waut Ägipten unjastetten,

woaren tofaul komen,

un äare stolte ägiptische Armee woat faulen.

Von Migdol bat Sieen woaren dee jeschloagen woaren,

sajcht Gott de Har. #Hes 29,10

7See woaren eene Wiltnis enne Medd von velotne Jäajenden sennen, un äare Städa woaren Steenahupes mank vedorwne Städa sennen. 8Wan ekj ieescht Ägipten un aul dee waut an halpen vebrenn, un äare Nobasch enne Grunt brinj, dan woaren see enseenen, daut ekj de Har sie. 9Un wan daut ieescht woat, dan woa ekj Mana en Schäp schekjen, daut see de jelaussene Lied en Kusch veschrakjen. Wan Ägipten felt, woat an daut enjsten, un daut woat boolt komen. #Jes 20,3-4

10Dit es waut Gott de Har sajcht: Ekj woa däm babelonischen Kjennich Nebukadnezar brucken toom een Enj moaken von de Ägipta äare goode Joaren. 11Dee woat met siene Menschen, dee daut hunjschste von aule Lenda sent, no Ägipten komen un daut Launt vedoawen. See woaren äare Schwieed äwa Ägipten brucken, soo daut aulawäajen em Launt woaren Doodes ligjen. #Hes 28,7 12Ekj woa dän Riefa loten utdrieejen, un woa schlajchte Menschen daut Launt jäwen. Ekj woa de framde loten daut Launt vedoawen met aules waut doabennen es toop. Dit hab ekj, de Har jesajcht. #Jes 19,5

13Dit es waut Gott de Har sajcht: Ekj woa de Jetta utroden un en Memfis daut Jestal, waut see aunbäden, dolbräakjen. Doa woat nich mea een Kjennich en Ägipten sennen, un de Lied woaren veenjst sennen. 14Ekj woa Patros loten eene Wiltnis woaren, Zoan met Fia vebrennen, un No verem Jerecht brinjen. #Nah 3,8-9 15Ekj woa mien Oaja äwa de Staut Sin komen loten, wua de Ägipta soo väl Väarot haben toom sikj wäaren, un ekj woa de rikje Staut No loten enne Grunt komen. 16Ekj woa Ägipten loten met Fia vebrennen un Sin woat sikj fa Angst nich weeten; No woat äare Mia enjebroaken kjrieen un Memfis woat jieda Dach en Jefoa stonen. 17De junge Mana von On un Piebesset woaren em Kjrich faulen un de Frues woaren faustjenomen un wajchjefieet woaren. 18En Tachpanhes woat daut dän Dach diesta woaren, wan ekj Ägipten äare Macht bräakj, un een Enj moak von de Armee, met dee see sikj soo väl meenden. De Staut woat dän Dach dikj bewolkjt sennen, un de Darpa runtom woaren veschlapt woaren. #Jer 43,9 19Ekj woa eemol no daut aundremol daut Jerecht äwa Ägipten utfieren, un see woaren enseenen, daut ekj de Har sie.

20Aun däm 7. Dach von de 1. Moonat en daut 11. Joa, wort mie kloa, waut de Har to sajen haud. Hee säd: 21Menschensän, ekj hab däm ägiptischen Kjennich sien Oarm jebroaken; un horch emol, see haben dän nich trajchtjemoakt ooda enjebungen, daut dee kaun soo väl bäta woaren, daut hee woat kjennen een Schwieet hoolen. 22Doawäajen sajcht Gott de Har nu: Horch emol, ekj stal mie jäajen däm Kjennich von Ägipten un woa siene Oarms bräakjen, beid dän jesunden un dän jebroaknen, soo daut am daut Schwieet woat ut de Haunt faulen. 23Un ekj woa de Ägipta mank de Velkja vestreien un en de Lenda vejoagen. 24Oba de Oarms von däm babelonischen Kjennich woa ekj stoakj moaken un am mien Schwieet enne Haunt jäwen, wan ekj däm ägiptischen Kjennich siene Oarms bräakjen woa, soo daut hee ver janem stänen woat aus eena de toom stoawen vewunt es. #Hes 29,20 25Ekj woa de Oarms von däm Kjennich von Babel stoakj moaken, oba de Oarms von däm Kjennich von Ägipten woaren faulen. Un wan ekj däm Kjennich von Babel mien Schwieet enne Haunt jäw un am daut lot jäajen Ägipten brucken, woat Ägipten daut enseenen, daut ekj de Har sie. 26Un ekj woa de Ägipta mank de Velkja vestreien un mank de Lenda vejoagen, un see woaren daut enseenen daut ekj de Har sie.

Currently Selected:

Hesekiel 30: PB

Highlight

Copy

Compare