Hesekiel 3

1Un hee säd to mie: Menschensän, at waut du ver die hast. At dise Schreftroll, waut hia ver die es, un dan go un räd to de Israeliten. #(1-3) Jer 15,16; 1,9; Opb 10,9-11 2Un ekj muak mien Mul op un eet de Roll dee hee mie jeef. 3Un hee säd to mie: Menschensän, du saust dise Schreftroll, dee ekj die jäw, oppäten, un dien Buck doamet fellen. Un ekj eet dee, un mie schmakjt dee soo seet aus Honnich. #Psa 119,103

4Un hee säd to mie: Menschensän, go no de Israeliten un lot an weeten, waut miene Wieed sent. 5Ekj schekj die nich no een Volkj waut eene framde Sproak haft. Ekj schekjt die no de Israeliten. 6Ekj schekj die nich no soone Velkja, dee eene framde Sproak ooda met schwoare Wieed räden, soone aus du nich vestonen wurscht. Wan ekj daut deed, wudden see no die horchen. 7Oba de Israeliten wellen nich no die horchen, wiels see wellen mie nich hieren. Daut gaunze Volkj es heltablessich un ieejenkoppich. 8Oba ekj woa dien Jesecht soo stiew moaken aus äat es, un dien Stiern soo hoat aus äara es. #Jes 50,7; Jer 1,18 9Ekj hab dienen Stiern soo hoat aus een Diamaunt jemoakt, dee doch hoada aus een Fiasteen es. Nu brukst du die nich enjsten, un die daut nich aunjriepen loten, wäajen waut see doonen. See sent een stieekopjet Volkj.

10Un hee säd to mie: Menschensän, horch no aules waut ekj die saj, un nemm daut to Hoat. 11Un go no de veschlapte von dien Volkj un räd to an. Saj an: “Dit es waut Gott de Har sajcht”, eendoont auf see doano horchen ooda nich. #Hes 2,5.7

12Un aus däm Harn siene Harlichkjeit von doa opphoof, hoof de Jeist mie opp. Un ekj hieed hinja mie een grootet Jetees, soo aus een Ieedbäben. #Hes 1,28 13Daut ruzhen kjeem von de Flichten von de vea, dee eena aum aundren schluagen, un uk daut Jelud von de Räda, waut biesied an wieren. Aules toop wia daut een Jetees aus bie een grootet Ieedbäben. 14De Krauft vom Harn kjeem stoakj opp mie, un sien Jeist hoof mie opp un neem mie wajch. En mie wia ekj betta un vestieet. 15Un ekj kjeem no de Grupp von veschlapte, waut en Tel Abib bie däm Kebar Riefa wonden. Fa säwen Doag saut ekj doa veduzt von aules, waut ekj jeseenen haud.

De Profeet saul een Wajchta sennen

(Hesek 33,1-9)

16Aus dee säwen Doag om wieren, wort mie wada kloa waut de Har von mie wull: 17Menschensän, ekj hab die aunjestalt daut du saust een Wajchta sennen fa de Israeliten, un du saust an en mienen Nomen woarnen, jiedatsmol wan du een Wuat von mien Mul hieescht. #Jes 52,8; Hes 33,7; Heb 13,17 18Wan ekj äwa eenem, dee nich aun mie jleeft, saj, dee woat stoawen, un du sajchst am daut nich un woarnst am nich, daut dee met siene Sind opphieet un dän Wajch läwen kaun, dan woat dee waut nich aun mie jleeft en siene Sind stoawen, un du woascht schuldich sennen ver mie, daut dee soo jestorwen es. #Hes 14,10 19Oba wan du däm Sinda woarnst, un dee nich opphieet met de Sinden en sien Läwen, woat dee en de Sind stoawen, oba du woascht dien Läwen jerat haben. 20Ooda, wan een jerajchta Mensch von sien jerajchtet Läwen wajchdreit, un orrajcht deit, dan woa ekj am tofaul brinjen un dee woat stoawen. Hee woat en siene Sind stoawen un sien jerajchtet Läwen woat am nich toojeräakjent sennen; un wiels du am nich jewoarnt hast, woascht du veauntwuatlich sennen fa sien Doot. #Hes 18,24 21Oba wan du däm jerajchten woarnst daut hee nich Sind begonen saul, un hee deit nich sindjen, dan woat hee läwen. Soona haft sikj woarnen loten un du hast dien Läwen jerat.

22Un dan kjeem daut, daut de Krauft vom Harn stoakj opp mie kjeem, un hee säd to mie: Sto opp un go oppe Stap. Doa woa ekj to die räden. #(22 un 23) Hes 1,3 23Un ekj stunt opp un jinkj oppe Stap nopp; un weetst waut, doa stunt däm Harn siene Harlichkjeit, soo aus ekj dee biem Kebar Riefa jeseenen haud. Un ekj foll oppem Jesecht han. #Hes 1,28 24Un de Jeist fua en mie nenn, un stald mie opp miene Feet. Un hee säd to mie: Go emol un schlut die en, en dien Hus. #Hes 2,2 25Un Menschensän, see woaren Strenj aun die brucken un die faustbinjen, soo daut du nich mank de Lied gonen kaust. 26Ekj woa die diene Tung aum Bän von dien Mul aunbaken loten, soo daut du nuscht sajen kaust un an nich mea dän rajchten Wajch wiesen kaust. Dit es wiels dee soon stieekopjet Volkj sent. 27Dan oba wan ekj met die räden woa, dan woa ekj dien Mul opmoaken, daut du an wada sajen kaust: “Dit es waut Gott de Har sajcht.” Un wäa doano horchen well, däm lot horchen, un wäa doa nich no horchen woat, däm lot toch. Wiels dit es een stieekopjet Volkj. #Hes 2,5.7

Currently Selected:

Hesekiel 3: PB

Highlight

Copy

Compare